Ntọt M’ọkwọrọ Obio Ubọn̄

“Kpukpru Mbet Fo Ẹnyụn̄ Ẹdi Akpanikọ”

ESISỊT ini mbemiso n̄kpa esie, Moses ama eteme mbon Israel ete ẹsụk ibuot ẹnọ kpukpru mbet Jehovah. Enye ọkọdọhọ ete: “Mbufo ẹsịn esịt mbufo ke kpukpru ikọ ẹmi ami ntịn̄de ke otu mbufo mfịn emi, emi mbufo ẹditemede nditọ mbufo, man ẹkpeme ndinam kpukpru ikọ mbet emi. Koro enye mîdịghe n̄kpọ mbubru ye mbufo: koro edide uwem mbufo.”—Deuteronomy 32:46, 47.

Ediwak isua ikie ke ukperedem, andiwet psalm ama owụt ufọn emi ofụri ukpepn̄kpọ Abasi enyenede ke ini enye ọkọdọhọde ete: “O Jehovah, afo emekpere: kpukpru mbet fo ẹnyụn̄ ẹdi akpanikọ.” (Psalm 119:151) Ke akpa isua ikie, Jesus ke idemesie ama etịn̄ otụk ufọn emi “kpukpru ikọ eke ẹwọrọde Abasi ke inua” ẹnyenede. (Matthew 4:4) Ndien apostle Paul ke idak ndausụn̄ Abasi ama ewet ete ke “kpukpru N̄wed Abasi ẹdi se ẹkedade odudu spirit Abasi ẹwet ẹnyụn̄ ẹdi se inọde ufọn.”—2 Timothy 3:16, NW.

Nte an̄wan̄ade, Jehovah Abasi odori enyịn mme andituak ibuot nnọ enye ndinọ akpan ntịn̄enyịn ke ofụri etop oro ẹwetde ẹnọ nnyịn ke mme page Ikọ esie. Idụhe udọn̄ikọ ndomokiet ke Bible emi mînyeneke ufọn. Ntre ke Mme Ntiense Jehovah ẹse Ikọ Abasi, nte ifiọkutom emi otode Mauritius mi owụtde.

Ete D—— okodụn̄ ke nsannsan obio-in̄wan̄ kiet, emi enye akanamde utom nte ekpeme okoneyo. Ke anyanini, enye ke esịt akpanikọ ama esiyom nnennen usụn̄ ndituak ibuot nnọ Abasi. Okoneyo ke ini ukpeme esie, enye ama ọtọn̄ọ ndikot Bible. Ekem enye ama okot n̄wed oro ama. Enye ama ekpep nte ke enyịn̄ Abasi edi Jehovah—kpa enyịn̄ oro odude ediwak ini ke Bible esie eke usem Hindi. Enye ama okụt nte ke n̄wed Ediyarade ama enen̄ede akama nduaidem.

Ekem enye ama obụp idemesie ete m̀mê odu ido ukpono emi etienede Bible ofụri ofụri. Enye ama okụt ete ke ido ukpono oro imọ ikemehede, ke mfọn n̄kaha, eketiene ndusụk ikpehe Bible. Ndusụk ido ukpono ẹma ẹnyịme N̄wed Abasi Usem Hebrew ẹnyụn̄ ẹsịn N̄wed Abasi Christian Usem Greek. Mme ido ukpono eken ẹma ẹfụmi N̄wed Abasi Usem Hebrew, ẹdọhọde ke N̄wed Abasi Christian Usem Greek kpọt enyene ata ufọn.

Usen kiet Ete D—— ama okụt ebe ye n̄wan nte ẹbọn̄ọde edịm onyụn̄ okot mmọ ete ẹdidak edịm ke ufọk imọ. Mmọ ẹkedi Mme Ntiense Jehovah. N̄wan ama akama n̄wed oro Ediyarade—Ubọn̄ Ubọn̄ Ata-Utịt Esie Emekpere!a Inikiet inikiet Ete D—— ama obụp mmọ aban̄a n̄wed oro. Mme Ntiense oro ẹma ẹkere ẹte ke n̄kpọ oro odude ke prọfesi Ediyarade oro idin̄wan̄ake enye, ntre mmọ ẹma ẹnọ enye n̄wed en̄wen ke itie esie. Edi Ete D—— ama eyịre ete ẹnọ imọ n̄wed Ediyarade.

Ke ama ọkọbọ eke esie, enye ama okot n̄wed oro usọp usọp. Ekem enye ama onyịme ukpepn̄kpọ Bible ye Mme Ntiense Jehovah. Ikebịghike akpanikọ oro nte ke Mme Ntiense ẹda ofụri Bible ke ata ọsọn̄urua n̄kpọ ama otụk enye. Enye ama ọtọn̄ọ ndidụk mme mbonoesop kpukpru ini ke Ufọkmbono Obio Ubọn̄ eke Mme Ntiense Jehovah, ke ebiet emi ẹsikpepde N̄wed Abasi Usem Hebrew ye N̄wed Abasi Christian Usem Greek ye ntịn̄enyịn. Idahaemi enye edi anditan̄a Obio Ubọn̄ ye andibuana ke esop Christian emi anade baptism.

[Ikọ idakisọn̄]