Mme Mbụme Ẹtode Mme Andikot
“Enyọn̄-Ukpeme” eke August 15, 1996, ọkọdọhọ ete: “Ke akpatre ikpehe ukụt oro, ‘owo’ emi efehede akada ke n̄kan̄ Jehovah eyebọhọ.” Ndi oro ọnọ ekikere nte ke akpa ikpehe akwa ukụt oro ebede, ediwak mbufa owo ẹyedi ẹdida ke n̄kan̄ Abasi?
Idịghe se ẹketịn̄de edi oro.
Mme ikọ Jesus oro ẹkụtde ke Matthew 24:22 ẹdisu akpan akpan ke ini iso ebe ke edinyan̄a mbe akpa ikpehe akwa ukụt oro edide, kpa en̄wan ẹn̄wanade ye ido ukpono. Ibuotikọ oro ọkọdọhọ ete: “Ti ete ke ‘owo’ eyebọhọ, nsụhọ oro ẹyetde aran ye ‘akwa otuowo,’ ke ini Akwa Babylon osụhọrede usọp usọp ye ofụri ofụri ke nsobo ke akpa ikpehe ukụt oro.”
Mme utọ anam-akpanikọ oro ididụhe ke itiendịk ke ini Jesus ye udịmekọn̄ esie eke heaven ẹdinamde n̄kpọ ke akpatre ikpehe ukụt oro. Edi mmanie ndien ẹdibọhọ ikpehe ukụt oro? Ediyarade 7:9, 14 owụt ete ke akwa otuowo oro ẹnyenede idotenyịn eke isọn̄ ẹyebọhọ. Nso kaban̄a mme Christian oro ẹyetde aran ke spirit? “Mme Mbụme Ẹtode Mme Andikot” ke Enyọn̄-Ukpeme eke August 15, 1990, ama etịn̄ ntak emi nnyịn mîkemeke ndibiere n̄kpọ nnịm mban̄a ini oro ẹdimende nsụhọ ke otu mbon oro ẹyetde aran ẹka heaven. Ntre ibuotikọ eke ndondo emi (August 15, 1996) iketịn̄ke n̄kpọ oro iyarade, etịn̄de ọsọ ikọ oro: “Kpasụk ntre ke akpatre ikpehe ukụt oro, ‘owo’ emi efehede akada ke n̄kan̄ Jehovah eyebọhọ.”
Kaban̄a m̀mê mbufa owo ekededi ẹyekeme ndikpep akpanikọ nnyụn̄ n̄wọrọ n̄kada ke n̄kan̄ Abasi ke akwa ukụt ọtọn̄ọde, tịm fiọk mme ikọ Jesus oro ẹwetde ke Matthew 24:29-31. Ke ukụt oro ama ọkọtọn̄ọ, idiọn̄ọ Eyen owo oyowụt idem. Jesus ọkọdọhọ ke kpukpru esien isọn̄ ẹyetịm idemmọ ẹnyụn̄ ẹseme. Enye iketịn̄ke n̄kpọ ndomokiet iban̄a mme owo ndidu ke edidemede idaha oro, n̄kabade esịt, nda ke n̄kan̄ Abasi, nnyụn̄ n̄kabade ndi mme ata mbet.
Ukem ntre, ke n̄ke erọn̄ ye ebot, Eyen owo ọbiọn̄ọde ndien ke ido ikpe abahade mme owo ke ntak n̄kpọ oro mmọ ẹkenamde m̀mê se mîkanamke ke ini edem. Jesus iketịn̄ke n̄kpọ ndomokiet iban̄a mme owo oro ke anyanini ẹkewụtde edu mbietebot nte ẹkabarede esịt inikiet inikiet ẹnyụn̄ ẹkabarede ẹtie nte erọn̄. Enye edi ndibiere ikpe ọkọn̄ọde ke nte mme owo ẹma ẹkewowụt se mmọ ẹdide.—Matthew 25:31-46.
Edi, ke afan̄ emi, ntak ndomokiet idụhe ndibiere n̄kpọ nnịm ke n̄kpọ emi. Ikọt Abasi, nsụhọ ye akwa otuowo, ẹdiọn̄ọ se mmọ ẹnyenede ndinam idahaemi—ndikwọrọ ikọ nnyụn̄ nnam mme mbet. (Matthew 28:19, 20; Mark 13:10) Idahaemi edi ini nnyịn ndinam item emi: “Nte mme abuana-utom ye Abasi, nnyịn ikpe mbufo ubọk ite, ẹkûyak mfọn Abasi, emi mbufo ẹkebọde, ọwọrọ ikpîkpu; (koro Enye ọdọhọ ntem ete, Mma nyere fi ke ini mfọn-ido, mma nnyụn̄ nnyan̄a fi ke usen edinyan̄a. Sese, ini mfọn-ido mi; sese, usen edinyan̄a mi).”—2 Corinth 6:1, 2.