Ntọt M’ọkwọrọ Obio Ubọn̄
Ndisuan N̄kpasịp Obio Ubọn̄ ke Kpukpru Idaha
IKỌ Abasi, kpa Bible, esịn udọn̄ ọnọ edinyene ifịk. Edidem Solomon ọkọdọhọ ete: “Suan n̄kpasịp fo ke usenubọk; kûnyụn̄ ufara ubọk fo ke mbubịteyo: koro afo mûfiọkke ubak eke ediwọrọde usụn̄, m̀mê emi, m̀mê oro; unyụn̄ ufiọkke m̀mê mbiba ẹdifọn ukem ukem.”—Ecclesiastes 11:6.
Ke kpukpru idaha oro ẹdotde, Mme Ntiense Jehovah ẹsuan “n̄kpasịp” ebe ke ndikwọrọ eti mbụk Obio Ubọn̄ Abasi. Ke se ibede idụt ye mme otu isuo 230, mmọ “idopke uyo ndikpep nnyụn̄ n̄kwọrọ, ẹte Jesus edi Christ.” (Utom 5:42) Mme ifiọkutom ẹtienede mi ẹwụt nte Mme Ntiense Jehovah ‘mîfarake ubọk’ ke utom ukwọrọikọ.
◻ Ke Republic of Cape Verde, kiet ke otu Mme Ntiense Jehovah ama asan̄a ebe ke ufọk-n̄kpọkọbi ke adan̄aemi anamde utom ukwọrọikọ. Ke okụre ufọk-n̄kpọkọbi, ndusụk mbon n̄kpọkọbi ẹma ẹbere ke eto ẹduọk odudu. Ke ẹdade ẹkụt Ntiense oro ke usụk usụk, mbon n̄kpọkọbi oro ẹma ẹfiori ẹyom ndusụk magazine. Ntiense oro ama etebe ediwak magazine Enyọn̄-Ukpeme ye Awake! ke itiat onyụn̄ otop esịn ke ufọk-n̄kpọkọbi. Nte utịp akpa udọn̄ emi, ẹma ẹtọn̄ọ ukpepn̄kpọ Bible 12. Owo ita ke otu mbon n̄kpọkọbi oro ẹma ẹyak uwem mmọ ẹnọ Abasi ẹnyụn̄ ẹna baptism. Kiet ke otu mbon n̄kpọkọbi oro ke anam utom nte ọkwọrọikọ ofụri ini, m̀mê asiakusụn̄, ke se ibede isua kiet idahaemi. Edi, didie ke mmọ ẹnam utom an̄wautom ke ufọk-n̄kpọkọbi? Akpa ẹbahade ufọk-n̄kpọkọbi oro ẹdọn̄ ke mme efakutom. Ekem Mme Ntiense ita ẹmi ẹdeme efakutom emi ke otu idemmọ ẹnyụn̄ ẹnam utom to ke ubet-n̄kpọkọbi sịm ubet-n̄kpọkọbi. Mme anditan̄a Obio Ubọn̄ ẹmi ẹsifiak ẹbịne mbon oro ẹwụtde udọn̄ ke ata ukem ukem usụn̄ oro Mme Ntiense Jehovah ke ofụri ererimbot ẹsinamde—ebe ke ndinam mme mfiakn̄ka. Nte ededi, ukpụhọde kiet edi nte ẹnịmde ukpepn̄kpọ Bible ke ubọk ke ubọk. Utu ke ndikpep Bible ini kiet m̀mê ikaba kpọt ke urua ke n̄kpọ nte hour kiet m̀mê akande oro, ndusụk mbon n̄kpọkọbi ẹsikpep n̄kpọ kpukpru usen! Adianade do, etubom ufọk-n̄kpọkọbi ọnọ Mme Ntiense ẹmi unyịme ndinịm kpukpru mbonoesop ke esịt ufọk-n̄kpọkọbi.
◻ N̄wan kiet ke Portugal ama enyene ediwak n̄wed Watch Tower nte n̄kpọ akpa oto ekaeka esie ke ama akakpa. Sia enye mîkedịghe kiet ke otu Mme Ntiense Jehovah, enye ikenyeneke udọn̄ nditịm mme n̄wed oro nnịm. Nte ededi, enye ikoyomke ndiduọn̄ọ mmọ. Usen kiet enye ama asian kiet ke otu Mme Ntiense Jehovah emi akawahade edem esie ke utom ukwọrọikọ esie eke enyịnusụn̄ ke enyịn̄usụn̄ aban̄a mme n̄wed oro. Ntiense oro ama obụp m̀mê enye enyene ifiọk ndomokiet aban̄a ata ufọn oro mme n̄wed ẹmi ẹnyenede. N̄wan oro ama ọbọrọ ete: “Ke nditịn̄ akpanikọ, mfiọkke ata ufọn mmọ, edi ndisan̄a didie mfiọk?” N̄wan oro ama enyịme ukpepn̄kpọ Bible, ndien ikebịghike enye ama ada mme n̄wed ekaeka esie oro ke ọsọn̄urua n̄kpọ. Idahaemi enye n̄ko edi Ntiense Jehovah oro ama akana baptism. Akan oro, eyen esie an̄wan ye n̄kpet n̄kpet ufan ke ubon esie ke ẹkpep Bible n̄ko. Nso ọsọn̄urua n̄kpọ akpa ke mme n̄wed ẹmi ẹdi ntem!