“Mbufo Ẹmekpụhọde Ekikere Mi Kaban̄a Mme Ntiense Jehovah”
NTRE ke akwa owo utom ufọk-n̄kpọkọbi kiet ke Poland eketịn̄ aban̄a ibuotikọ oro aban̄ade utom Mme Ntiense Jehovah, nte ẹketọtde ke nsiondi nnyịn eke October 15, 1998. Ibuotikọ oro, “Ke Ini Mme Esịt Itiat Ẹkabarede Ẹmem,” eketịn̄ aban̄a unen oro Mme Ntiense Jehovah ẹkekụtde ke ndinam utom ke otu mbon n̄kpọkọbi ke Wołów, Poland.
Mbemiso ẹkesiode magazine Enyọn̄-Ukpeme oro ẹsiakde ke enyọn̄ emi an̄wan̄wa, ẹma ẹdiomi san̄asan̄a mbono ndida mmen enye nnọ mbon n̄kpọkọbi ke September 13, 1998, ke ufọk-n̄kpọkọbi Wołów. Mbon oro ẹkenọde ikot ndidụk ẹma ẹsịne Mme Ntiense n̄kann̄kụk, mbon n̄kpọkọbi oro ẹma ẹkena baptism ye mbon en̄wen oro ẹnyenede udọn̄, ye ediwak ikpọ owo utom ufọk-n̄kpọkọbi. Se itienede mi ẹdi ndusụk ikọ oro mbon oro ẹkedụkde ẹtịn̄de.
Jerzy, kiet ke otu Mme Ntiense Jehovah emi akanade baptism ke ufọk-n̄kpọkọbi ke se ibede isua ition ẹmi ẹkebede, ọkọdọhọ ete: “Esịt enem mi etieti, nte n̄kemede ndikot mfịn emi mban̄a adan̄a ukeme oro nditọete ke mme esop n̄kann̄kụk ẹkesịnde man ẹn̄wam nnyịn.” Enye ama adian ete: “Mmaka iso ndomo ndinam n̄kọri ke idemmi, ndien mmekeme ndikụt nte Jehovah enen̄erede mi.”
Owo n̄kpọkọbi en̄wen, ekerede Zdzisław, eketịn̄ aban̄a utom unọ ikọ ntiense ke ufọk-n̄kpọkọbi ete: “Kan̄a ke emi, mbon n̄kpọkọbi inan̄ ke ẹtịm idem ẹnọ baptism, ndien mbon oro ẹnyenede udọn̄ obufa obufa ke ẹka iso ndidụk mme mbono esop ke ufọkmbono nnyịn. Ibuotikọ emi edi okopodudu n̄kpọ nsịnudọn̄ ọnọ nnyịn ndika iso nnam utom ke an̄wautom enye emi.” Nso in̄wan̄în̄wan̄ edu ke emi edi ntem, ke ikerede nte ke Zdzisław osụk enyenyene isua 19 ndidu ke ufọk-n̄kpọkọbi!
Ke ama okokot ibuotikọ aban̄ade ufọk-n̄kpọkọbi Wołów, akwa owo utom ufọk-n̄kpọkọbi kiet ọkọdọhọ ete: “Ẹmenen̄ede ẹkpono nnyịn. Akananam n̄kekereke ke ufọk-n̄kpọkọbi emi eyenyene utọ eti etop oro ke usem 130 ke ererimbot. Mmama mbufo, ndien mmowụt esịtekọm ke mme ukeme oro mbufo ẹsịnde ke ibuot mbon n̄kpọkọbi.” Akwa owo utom en̄wen ama adian ete: “Mbufo ẹmekpụhọde ekikere mi kaban̄a Mme Ntiense Jehovah. Ke mbemiso, n̄kese mbufo nte mme enyene ukwan̄ ifiopesịt ido ukpono. Idahaemi mmokụt ke mbufo ẹdi mbon oro ẹdade edumbet ẹdu uwem.”
Adausụn̄ ke ufọk-n̄kpọkọbi Wołów, Marek Gajos, ama atuak inua imam onyụn̄ ọdọhọ ete: “Ke akpa ini nnyịn ikekere ke mbufo ẹdikụt ata esisịt unen. Nnyịn ikekere ke mbufo ẹkedi sụk ido ukpono en̄wen emi enyenede ikpọ udọn̄ ndida Bible n̄kpụhọde mbon n̄kpọkọbi. Nte ededi, ke ima ikokụt mme utịp akpa edinam mbufo, nnyịn ima ibiere ndinen̄ede ndiana kiet ye mbufo. Mbufo ẹmesidi mi ye unana edikpa mba ke isua usụkkiet idahaemi, ndien mmowụt esịtekọm etieti mban̄a se mbufo ẹnamde kan̄a ke emi.”
Nte ededi, didie ke ofụri mbon ufọk-n̄kpọkọbi ke Wołów ẹkenam n̄kpọ ẹban̄a ibuotikọ oro? Mbon n̄kpọkọbi ẹma ẹnyene ọkpọsọn̄ udọn̄ tutu Mme Ntiense ke ufọk-n̄kpọkọbi ẹnọ mme magazine mmọ ẹma. Ikpọ owo utom ufọk-n̄kpọkọbi ẹma ẹwụt udọn̄ tutu mmọ ẹyom idem 40 efen efen eke idemmọ. Man ẹyụhọ n̄kaiso udọn̄ oro, mme esop n̄kann̄kụk ẹma ẹn̄wam ke ndinọ nditọete ke ufọk-n̄kpọkọbi idem 100 efen efen. Ke ukem ini oro, ibat mme andidụk mbono esop ke ufọk-n̄kpọkọbi ama ọdọk.
Piotr Choduń, akwa owo utom ufọk-n̄kpọkọbi kiet emi ekenen̄erede adiana kiet ye Mme Ntiense Jehovah, ọkọdọhọ ete: “Nnyịn ima ibiere ndikụbọde ibuotikọ emi nsịn ke kpukpru ekebe akrasi udọn̄ n̄kpọ n̄wụt ke ufọk-n̄kpọkọbi nnyịn. Nnyịn imodori enyịn nte ke kpukpru mbon n̄kpọkọbi oro mîkpepke kan̄a Bible ye mbufo ẹyekot magazine emi.”
Eti uwụtn̄kpọ Mme Ntiense ye mme ifịk ifịk ukeme mmọ ẹka iso ndinyene nti utịp. Ke adianade ye mbon n̄kpọkọbi 15 oro ẹma ẹkenam n̄kọri ẹkesịm edina baptism, ikpọ mbonutom 2 ke ufọk-n̄kpọkọbi ẹmeyak uwem mmọ ẹnọ Jehovah, ndien akwa owo utom ufọk-n̄kpọkọbi efen omoyom ukpepn̄kpọ Bible. Nte ededi, nditọete oro ẹkwọrọde ikọ ke ufọk-n̄kpọkọbi Wołów ẹnọ Jehovah kpukpru itoro ke unen oro mmọ ẹkụtde.—Men 1 Corinth 3:6, 7 domo.
[Ndise ke page 28]
Ntiense ita ye owo n̄kpọkọbi kiet ke ini unọ magazine ke ufọk ukpepn̄kpọ ufọk-n̄kpọkọbi