Edinyan̄a Se Enye Enen̄erede Ọwọrọ

‘NTE afo emenyene edinyan̄a?’ Ediwak ini, mbon oro ẹsibụpde mbụme emi ẹsikere ẹte ke mmimọ imenyene edinyan̄a koro mmimọ ‘imenyịme Jesus nte ọkpọkpọ Andinyan̄a mmimọ.’ Edi ediwak owo ẹkere ke nsio nsio usụn̄ odu ndinyene edinyan̄a ye nte ke adan̄a ini nte ‘Jesus odude fi ke esịt,’ se afo enịmde ke akpanikọ m̀mê idem ufọkabasi emi afo akade ifịnake.

Bible ọdọhọ ete ke edi uduak Abasi nte “kpukpru [orụk, NW] owo ẹnyene edinyan̄a.” (1 Timothy 2:3, 4) Ke ntem edinyan̄a odu ọnọ kpukpru owo oro ẹdinyịmede ndibọ enye. Edi ndinyene edinyan̄a ọwọwọrọ nso? Nte enye enen̄ede edi n̄kpọ oro akam etịbede ọnọ fi ye esisịt ukeme m̀mê ye unana ukeme ndomokiet ke n̄kan̄ fo?

Ikọ oro “edinyan̄a” ọwọrọ “ndifak nsio ke n̄kpọndịk m̀mê nsobo.” Ata edinyan̄a ke ntre esịne n̄kpọ akan ifụre ifụre idaha ekikere. Enye ọwọrọ ndidi se ẹnyan̄ade ẹsio ke nsobo idiọk editịm n̄kpọ emi odude kemi ndien ke akpatre ndidi se ẹnyan̄ade ẹsio ke n̄kpa! Edi mmanie ke Abasi edinyan̄a? Ke ndibọrọ, ẹyak nnyịn idụn̄ọde se Jesus Christ ekekpepde ke ibuot nneme emi. Se idinyenede ito ndụn̄ọde emi ekeme ndikpa fi idem.

Edinyan̄a—Nte Ẹkụt ke Kpukpru Ido Ukpono?

Ke idaha kiet, Jesus ama enyene nneme ye n̄wan a-Samaria. Okposụkedi enye mîkedịghe owo Jew, enye ama enen̄ede enịm nte enende ete ke Messiah “emi ekerede Christ” eyedi. (John 4:25) Ndi utọ edinịm ke akpanikọ oro ama ekem ndinam ẹnyan̄a enye? Baba, koro Jesus ama asian n̄wan oro uko uko ete: “Mbufo ẹtuak ibuot ẹnọ se mbufo mîfiọkke.” Jesus ama ọfiọk ete ke edieke anade n̄wan emi enyene edinyan̄a, enye enyene ndikpụhọde usụn̄ utuakibuot esie. Jesus ke ntre ama anam an̄wan̄a ete: “Edi ini ke edi, omonyụn̄ ededi ama, eke ata mme andituak ibuot ẹdituakde ibuot ẹnọ Ete ke spirit ye ke akpanikọ: koro edi mmọ eke ẹtiede ntem ke Ete oyom ete ẹtuak ibuot ẹnọ Imọ.”—John 4:22, 23.

Idaha efen oro Jesus akayararede ekikere esie kaban̄a edinyan̄a akabuana mme Pharisee, ọwọrọiso n̄ka Ido Ukpono Mme Jew. Mme Pharisee ẹma ẹtọn̄ọ ndutịm utuakibuot ẹnyụn̄ ẹnịm ke akpanikọ ẹte ke enye enyene unyịme Abasi. Edi kop mme ikọ oro Jesus eketịn̄de ye mme Pharisee: “Mbufo mbon mbubịk! Isaiah ama enen ke ini enye eketịn̄de prọfesi aban̄a mbufo ete: ‘Mbon ẹmi ẹkpono mi ke n̄kpọkinua mmọ, edi esịt mmọ ada nsannsan ye ami. Mmọ ẹkpono mi ke ikpîkpu; mme ukpepn̄kpọ mmọ ẹdi sụk mme ewụhọ ẹmi mme owo ẹkpepde.’”—Matthew 15:7-9, New International Version.

Nso kaban̄a akpakịp otu ido ukpono mfịn oro ẹdọhọde ke imenịm Christ ke akpanikọ? Ndi Jesus eyenyịme kpukpru mmọ nte nnennen usụn̄ ndinyene edinyan̄a? Iyomke nnyịn itetie ikere n̄kpọ emi, koro Jesus ama etịn̄ in̄wan̄în̄wan̄ ete: “Idịghe kpukpru owo ẹmi ẹkotde Mi ẹte, Ọbọn̄, Ọbọn̄, ẹdidụk ke Obio Ubọn̄ Heaven; edi owo eke anamde uyo Ete Mi emi odude ke heaven. Ediwak owo ẹyedọhọ Mi ke usen oro, ẹte, Ọbọn̄, Ọbọn̄, nte nnyịn iketịn̄ke nte prọfet ke enyịn̄ Fo, inyụn̄ idaha enyịn̄ Fo iduọn̄ọ mme demon, inyụn̄ idaha enyịn̄ Fo inam ediwak n̄kpọ odudu? Ndien nyọdọhọ mmọ adan̄aoro, nte, Akananam ndiọn̄ọke mbufo: ẹdianade Mi, mbufo mme anam ukwan̄ido.”—Matthew 7:21-23.

Nnennen Ifiọk Aban̄ade Jesus Edi Akpan N̄kpọ Kaban̄a Edinyan̄a

Mme ikọ Jesus ẹmi ẹsịne ntotụn̄ọ ekikere. Mmọ ẹwụt ẹte ke ediwak owo oro ẹnyenede ifịk ke ẹkpu ‘ndinam uduak Ete.’ Didie, ndien, ke owo ekeme ndinyene ata edinyan̄a? Akpa Timothy 2:3, 4 ọbọrọ ete: “[Abasi oyom] kpukpru owo ẹnyene edinyan̄a, ẹnyụn̄ ẹsịm ifiọk akpanikọ.” (Sịghisịghi ubọkn̄wed edi eke nnyịn.)—Men Colossae 1:9, 10 domo.

Utọ ifiọk oro edi akpan n̄kpọ ke ndinyene edinyan̄a. Ke ini ekpeme ufọk-n̄kpọkọbi owo Rome okobụpde apostle Paul ye nsan̄a esie, Silas, ete, “Nnyene ndinam nso man ẹnyan̄a mi?” mmọ ẹma ẹbọrọ ẹte: “Buọt idem ye Ọbọn̄ Jesus, ndien ẹyenyan̄a fi ye ufọk fo.” (Utom 16:30, 31) Ndi oro ọwọrọ ete ke ofụri se ekpeme ufọk-n̄kpọkọbi oro ye ubon esie ẹkenyenede ndinam ekedi ndinyene ndusụk ekikere ke esịt mmọ? Baba, n̄kpọ kiet edi, mmọ ikemeke ndinen̄ede ‘mbuọt idem ke Ọbọn̄ Jesus’ ibọhọke mmọ ẹnyene ndusụk ifiọk ẹban̄a enyeemi Jesus edide, se enye akanamde, ye se enye ekekpepde.

Ke uwụtn̄kpọ, Jesus ama ekpep aban̄a ediwụk ukara eke heaven—“obio ubọn̄ Abasi.” (Luke 4:43, NW) Enye n̄ko ama ọnọ mme edumbet kaban̄a eti ido uwem ye edu Christian. (Matthew, ibuot 5-7) Enye ama owụt idaha oro mme mbet esie ẹdidade ke mme mbubehe ukara. (John 15:19) Enye ama ọtọn̄ọ utom unọ ukpep ofụri ererimbot onyụn̄ owụk mme anditiene enye ndibuana ke esịt. (Matthew 24:14; Utom 1:8) Ih, ‘ndibuọt idem ke Jesus’ ọkọwọrọ ndifiọk ekese n̄kpọ! Eyịghe idụhe, ndien, Paul ye Silas ‘ẹkekwọrọde ikọ Ọbọn̄ ẹnọ [ekpeme ufọk-n̄kpọkọbi oro], ye kpukpru mmọemi ẹdude ke ufọk esie’ mbemiso ẹkenịmde mbufa mme andinịm ke akpanikọ ẹmi baptism.—Utom 16:32, 33.

Nnennen Ifiọk Abasi Edi Akpan N̄kpọ N̄ko

Akpan ikpehe kiet ke ndinen̄ede mbuọt idem ke Jesus abuana ndituak ibuot nnọ Abasi oro Jesus ke idemesie akatuakde ibuot ọnọ. Jesus ọkọbọn̄ akam ete: “Ndien nsinsi uwem oro edi ndifiọk Fi, ata Abasi kierakiet, ye Enyeemi Afo ọkọdọn̄de, kpa Jesus Christ.”—John 17:3.

Ke ini utom ukwọrọikọ esie ke isọn̄, Eyen Abasi okodụri ntịn̄enyịn kpukpru ini ọnọ Ete esie idịghe idemesie. Akananam enye ikọdọhọke ke imọ ikedi Ata Ọkpọsọn̄ Abasi. (John 12:49, 50) Ke ediwak idaha Jesus ama anam idaha esie ke ndutịm Abasi an̄wan̄a ke nditịn̄ nte ke imọ idu ke idak Ete imọ. (Luke 22:41, 42; John 5:19) Kamse, Jesus ọkọdọhọ ete: “Ete omokpon akan Mi.” (John 14:28) Nte ido ukpono fo ekpep fi aban̄a nnennen itie ebuana ke ufọt Abasi ye Christ? Mîdịghe ndi ẹnam fi enịm ke akpanikọ nte ke Jesus ke idemesie edi Ata Ọkpọsọn̄ Abasi? Edinyan̄a fo ọkọn̄ọ ke ndinyene nnennen ifiọk.

Ke Akam Ọbọn̄, Jesus eketeme mme mbet esie ndibọn̄ akam nte: “Yak ẹnam enyịn̄ fo asana.” (Matthew 6:9, NW) Ata ediwak edikabade Bible ẹdịp enyịn̄ Abasi, ẹkabarede enye nte “Ọbọn̄.” Edi ke mme ikpan̄wed “Akani Testament” eke eset, enyịn̄ Abasi odu awak akan utịm ike tọsịn itiokiet! Psalm 83:18 ke ntem okot ete: “Ndien owo ẹyefiọk ẹte ke afo emi enyịn̄ fo ikpọn̄ ekerede Jehovah, edi Ata Edikon̄ ke ofụri ererimbot.” (Sịghisịghi ubọkn̄wed edi eke nnyịn.) Nte ẹkpep fi ndida enyịn̄ Abasi oro, Jehovah? Edieke owo mîkpepke, edinyan̄a fo odu ke itiendịk, koro “ẹyenyan̄a kpukpru owo eke ẹsemede ẹkot enyịn̄ Jehovah”!—Utom 2:21; men Joel 2:32 domo.

Ke Spirit ye ke Akpanikọ

Jesus Christ n̄ko ama odụri ntịn̄enyịn owụt Ikọ Abasi, kpa Bible. Ke ini anamde ekikere Abasi an̄wan̄a kaban̄a ndusụk n̄kpọ, enye ekesiwak ndidọhọ: “Ẹma ẹwet ẹte.” (Matthew 4:4, 7, 10; 11:10; 21:13) Okoneyo oro mbemiso enye akakpade, Jesus ama ọbọn̄ akam aban̄a mme mbet esie ete: “Da akpanikọ Fo dianade mmọ nịm nọ Idemfo: ikọ Fo edi akpanikọ.”—John 17:17.

Ke ntre, ndinyene ifiọk mban̄a mme ukpepn̄kpọ eke Ikọ Abasi, kpa Bible, edi n̄kpọ efen oro ẹyomde kaban̄a edinyan̄a. (2 Timothy 3:16) Bible ikpọn̄ ọbọrọ mme utọ mbụme nte: Nso ke uwem ọwọrọ? Ntak emi Abasi ayakde idiọkido aka iso ke anyan ini ntre? Nso itịbe inọ owo ke ini enye akpade? Nte Abasi enen̄ede otụhọde mme owo ke ikan̄îkan̄ hell? Nso idi uduak Abasi kaban̄a isọn̄?a Owo ikemeke ndituak ibuot nnọ Abasi nte odotde ke mînyeneke nnennen ifiọk iban̄a mme n̄kpọ ẹmi, koro Jesus ọkọdọhọ ete: “Ata mme andituak ibuot [ẹdituak] ibuot ẹnọ Ete ke spirit ye ke akpanikọ.”—John 4:23.

Mbuọtidem Onụk Ẹnam N̄kpọ

Edinyan̄a esịne n̄kpọ akan ikpîkpu edinyene ntọt. Ke esịt oro enyenede udọn̄ ndinam n̄kpọ, nnennen ifiọk Abasi anam ẹnyene mbuọtidem. (Rome 10:10, 17; Mme Hebrew 11:6) Utọ mbuọtidem oro onụk owo ndinam n̄kpọ. Ke uwụtn̄kpọ, Bible ọnọ item ete: “Ẹkabade esịt ndien, ẹnyụn̄ ẹfiak edem, man ẹsọhi mme idiọkn̄kpọ mbufo ẹfep; man otodo ini edidemede edito ke iso Jehovah esịm mbufo.”—Utom 3:19.

Ih, edinyan̄a abuana n̄ko owo ndikama idemesie ekekem ye mme idaha Abasi kaban̄a eduuwem ye edisana ido. Ke idak odudu Ikọ Abasi emi ekemede ndinam owo okpụhọde, mme ndammana edu nte usu nsu ye abian̄a ẹkpọn̄ itie ẹnọ edinam akpanikọ ye editịn̄ akpanikọ. (Titus 2:10) Ẹkpọn̄ mme oburobụt edinam, utọ nte idan̄ ukem uduot, efịbe, ye use, ẹnyụn̄ ẹda edisana ido uwem ẹkpụhọ ke itie mmọ. (1 Corinth 6:9-11) Emi idịghe edision̄o idem n̄kpọn̄ ke ekpri ini emi ọkọn̄ọde ke ntụk owo edi edi nsinsi ukpụhọde emi otode editịn̄ enyịn n̄kpep nnyụn̄ nda Ikọ Abasi nsịn ke edinam.—Ephesus 4:22-24.

Nte ini akade, ima ye esịtekọm ẹnyenede ẹnọ Abasi onụk owo oro enyenede esịt akpanikọ ndiyak idem ọyọhọ ọyọhọ nnọ Abasi nnyụn̄ nyarade enye ebe ke baptism mmọn̄. (Matthew 28:19, 20; Rome 12:1) Mme Christian oro ẹnade baptism ẹnyene edinyan̄a ke enyịn Abasi. (1 Peter 3:21) Ke ini nsobo idiọk ererimbot emi edide, Abasi ayanyan̄a mmọ ọyọhọ ọyọhọ ebe ke ndinam mmọ ẹbe akwa ukụt.—Ediyarade 7:9, 14.

Se Edinyan̄a Ekemede Ndiwọrọ nnọ Fi

An̄wan̄a oto ekpri nneme emi nte ke ndinyene edinyan̄a esịne n̄kpọ akan ‘edinyene Ọbọn̄ Jesus ke esịt fo.’ Enye ọwọrọ ndinyene nnennen ifiọk mban̄a Jehovah Abasi ye Jesus Christ nnyụn̄ nnam mme ukpụhọde oro ẹyomde ke uwem owo. Ndinam emi ekeme nditie nte ọkpọsọn̄ n̄kpọ, edi Mme Ntiense Jehovah ẹben̄e idem ndin̄wam fi ke afan̄ emi. Ebede ke ukpepn̄kpọ Bible mfọn, mmọ ẹkeme ndin̄wam fi ọtọn̄ọ ndisan̄a ke usụn̄ oro adade esịm ata edinyan̄a.b

Ke ikerede iban̄a nte usen ikpe Abasi emi edide ekperede, ndinam ntre edi ata usọp usọp n̄kpọ akan nte akanam edide! Ini edi emi ndinam mme ikọ prọfet emi: “Ke ikan̄ iyatesịt Jehovah mîka-isịmke mbufo. Mbufo kpukpru sụn̄sụn̄ mbio isọn̄ ẹmi ẹnamde ikpe esie, ẹyom Jehovah; mbufo ẹyom edinen ido, ẹyom sụn̄sụn̄ ido: m̀mê mbufo ẹyedịbe ke usen iyatesịt Jehovah.”—Zephaniah 2:2, 3.

[Mme Ikọ idakisọn̄]

[Ekebe ke page 6]

EDINYAN̄A OTO...

◻ Edinyene nnennen ifiọk mban̄a Abasi ye Jesus.—John 17:3.

◻ Edinyene mbuọtidem.—Rome 10:17; Mme Hebrew 11:6.

◻ Edikabade esịt nnyụn̄ nnam ukpụhọde.—Utom 3:19; Ephesus 4:22-24.

◻ Uyakidem nnọ ye baptism.—Matthew 16:24; 28:19, 20.

◻ Edika iso n̄kwọrọ ikọ an̄wan̄wa.—Matthew 24:14; Rome 10:10.

[Ndise ke page 7]

Ndikpep Bible, ndida se ẹkpepde nsịn ke edinam, uyakidem nnọ, ye baptism ẹdi mme usio-ukot ẹdade ẹsịm edinyan̄a