Mbụme Oro Mme Andikot Ẹbụpde
Ndi Mme Ntiense Jehovah Ẹnịm ke Mmimọ Kpọt ke Ẹdinyan̄a?
Mme Ntiense Jehovah ẹnịm ke mmimọ imokụt ido ukpono akpanikọ. Edieke mîkpedịghe ntre, mmọ ẹkpekpụhọ ido ukpono mmọ. Ukem nte ediwak mme aka ido ukpono eken, Mme Ntiense Jehovah ẹdori enyịn ke ẹyenyan̄a mmimọ. Nte ededi, mmọ ẹnịm n̄ko ke idịghe mbubehe mmimọ ndibiere m̀mê anie ke ẹdinyan̄a. Abasi edi Ebiereikpe. Enye edibiere.—Isaiah 33:22.
Ikọ Abasi ọdọhọ ke mbon oro ẹdinyan̄ade inaha ẹyom edinyan̄a kpọt edi ke ana mmọ ẹnam se Andinyan̄a ọdọhọde. Ke ndinam an̄wan̄a: “Yak idọhọ ke akaisan̄ osop usụn̄. Enye enen̄ede oyom ndiwọrọ ke ebiet oro. Ndi enye ayatak do, mîdịghe ndi enye oyokụt usụn̄ ọwọrọ? Nte enye anamde n̄kpọ aban̄a un̄wam oro ẹnọde enye edibiere se iditịbede inọ enye. Ntan̄idem ekeme ndinam enye esịn ndibọ un̄wam ke ini ẹdide ndinyan̄a enye. Edi edieke enye osụhọrede idem ẹtiene ndausụn̄ oro ẹnọde, enye oyokụt usụn̄ ọwọrọ.
Ukem ntre, ẹdinyan̄a mbon oro ẹnamde se Jehovah Abasi, kpa Andinyan̄a ubonowo, ọdọhọde. Edinyan̄a edi enọ Abasi, edi idịghe kpukpru owo ke ẹdinyan̄a. Jesus Eyen Abasi ọkọdọhọ ete: “Idịghe kpukpru mbon oro ẹkotde mi ẹte, ‘Ọbọn̄, Ọbọn̄,’ ẹdidụk ke obio ubọn̄ heaven, edi enye emi anamde uduak Ete mi emi odude ke heaven edidụk.”—Matthew 7:21.
Mme Ntiense Jehovah ẹnịm ke Abasi edinyan̄a sụk mbon oro ẹbuọtde idem ke uwa ufak Jesus ẹnyụn̄ ẹnamde mme n̄kpọ oro enye ekekpepde. (Utom 4:10-12) Kere ban̄a akpan n̄kpọ ita oro Ikọ Abasi ọdọhọde owo anam man enyene edinyan̄a.
(1) Jesus ọkọdọhọ mme ufan esie ete: “Edieke mbufo ẹnyenede ima ke otu idem mbufo, kpukpru owo ẹyeda emi ẹfiọk ẹte mbufo ẹdi mbet mi.” (John 13:35) Uwụtn̄kpọ oro Jesus ekenịmde ke ndikpa ke ibuot mbon en̄wen owụt ke oyom nnyịn ima mbon en̄wen. Mbon oro ẹmade mbon en̄wen ẹnyene edu oro edinamde ẹnyan̄a mmọ.
(2) Jesus ọkọdọhọ ke akam oro enye ọkọbọn̄de ọnọ Ete esie ete: “Mmanam mmọ ẹfiọk enyịn̄ fo.” (John 17:26) Jesus ama ọfiọk nte ọkpọkpọ enyịn̄ Abasi, Jehovah, ekedide akpan n̄kpọ ọnọ Ete esie. Jesus ama ọbọn̄ akam ete ẹnam enyịn̄ Ete imọ “asana.” (Matthew 6:9) Ndinam enyịn̄ Abasi asana esịne ndifiọk enyịn̄ oro nnyụn̄ nda enye ke akpan n̄kpọ ye ke edisana. Ukem nte Jesus, ana mbon oro ẹyomde edinyan̄a ẹseme ẹkot enyịn̄ Abasi. Ana mmọ n̄ko ẹkpep mbon en̄wen enyịn̄ ye mme edu Abasi. (Matthew 28:19, 20) Ke akpanikọ, mbon oro ẹsemede ẹkot enyịn̄ Abasi kpọt ke edinyan̄a.—Rome 10:13.
(3) Jesus ọkọdọhọ Pontius Pilate ete: “Obio ubọn̄ mi idịghe ubak ererimbot emi.” (John 18:36) Ibat ibat owo mfịn ẹbuọt idem ke Obio Ubọn̄ m̀mê ukara Abasi, emi Jesus edide Edidem. Ediwak owo ẹbuọt idem ke ukara owo utu ke ukara Abasi. Edi mbon oro ẹdinyan̄ade ẹsọn̄ọ ẹda ẹnọ Obio Ubọn̄ Abasi ibetedem ẹnyụn̄ ẹkpep mbon en̄wen nte enye edinyan̄ade kpukpru mbon oro ẹnamde akpanikọ.—Matthew 4:17.
Ke ini mme mbet Jesus ẹkefiọkde ndusụk n̄kpọ oro anade mmọ ẹnam man ẹnyan̄a mmimọ, mmọ ẹkebụp ẹte: “Anie ndien ekeme ndibọhọ?” Jesus ọkọbọrọ ete: “Se owo mîkemeke ndinam, Abasi emekeme ndinam.” (Luke 18:18-30) Mme Ntiense Jehovah ẹnen̄ede ẹsịn ukeme ẹnam mme n̄kpọ oro Abasi oyomde inam man ẹnyan̄a nnyịn. Mmọ n̄ko ẹnen̄ede ẹsịn ukeme ẹn̄wam mbon en̄wen man ẹnyan̄a mmọ nde.