Mme Erọn̄ En̄wen Ye Obufa Ediomi

“Amaedi nditọ isenowo . . . , kpukpru mmọ eke ẹnịmde sabbath, mbak ẹdibiat enye, ẹnyụn̄ ẹmụmde ediomi mi ẹkama: nyada mmọ n̄ko ndi ke edisana obot mi.”—ISAIAH 56:6, 7.

1. (a) Nte ekemde ye n̄kukụt John, nso ke ẹyọhọ ke ini ẹmụmde ofụm ubiereikpe Jehovah ẹkama? (b) Nso n̄wọrọnda otuowo ke John okokụt?

KE ỌYỌHỌ n̄kukụt inan̄ ke n̄wed Ediyarade, apostle John ama okụt nte ẹmụmde ofụm ubiereikpe nsobo Jehovah ẹkama tutu ẹkụre edinịm kpukpru mme andibuana ke “Israel Abasi” idiọn̄ọ. Mmọ ẹmi ẹdi akpa mbon ẹdidiọn̄de ebe ke Jesus, akpan ubak mfri Abraham. (Galatia 6:16; Genesis 22:18; Ediyarade 7:1-4) Ke ukem n̄kukụt oro, John ama okụt “akwa otuowo, eke baba owo kiet mîkemeke ndibat, eke ẹtode ke kpukpru obio ye esien ye idụt ye usem . . . , ẹnyụn̄ ẹfiori ke ọkpọsọn̄ uyo, ete, Yak edinyan̄a enyene Abasi nnyịn emi etiede ke ebekpo, Onyụn̄ enyene Eyenerọn̄.” (Ediyarade 7:9, 10) Ke ndidọhọ, “Yak edinyan̄a . . . enyene Eyenerọn̄,” akwa otuowo ẹwụt ẹte ke ẹdiọn̄ mmimọ n̄ko ebe ke Mfri Abraham.

2. Ini ewe ke akwa otuowo owụt idem, ndien didie ke ẹdiọn̄ọ enye?

² Ẹkediọn̄ọ akwa otuowo emi ke edem ko ke 1935, ndien mfịn enye awak ebe miliọn ition. Ke ẹnịmde idiọn̄ọ ẹnọ edibọhọ akwa ukụt, ẹdibahade mme andibuana ke enye ẹnọ nsinsi uwem ke ini Jesus abaharede “erọn̄” osio ke “ebot.” Mme Christian eke akwa otuowo ẹbuana ke “mme erọn̄ en̄wen” eke n̄ke Jesus aban̄ade mme ufọkerọn̄. Mmọ ẹdori enyịn ndidụn̄ ke nsinsi ke paradise isọn̄.—Matthew 25:31-46; John 10:16; Ediyarade 21:3, 4.

3. Didie ke mme Christian oro ẹyetde aran ẹkpụhọde ye mme erọn̄ en̄wen ke ebuana ye obufa ediomi?

³ Kaban̄a 144,000, ẹnọ mme edidiọn̄ eke ediomi Abraham ebe ke obufa ediomi. Nte mme andibuana ke ediomi emi, mmọ ẹdu “ke idak mfọn” ye “ke idak ibet Christ.” (Rome 6:15; 1 Corinth 9:21) Ntem, owo 144,000 kpọt ẹmi ẹdide mme andibuana ke Israel Abasi ẹsidia mme n̄kpọ idiọn̄ọ ke Editi n̄kpa Jesus nte odotde, ndien Jesus akanam ediomi esie kaban̄a Obio Ubọn̄ ye mmọ kpọt. (Luke 22:19, 20, 29) Mme andibuana ke akwa otuowo idịghe ubak obufa ediomi. Nte ededi, mmọ ẹdiana ye Israel Abasi ẹnyụn̄ ẹdụn̄ ye mmọ ke “obio” mmọ. (Isaiah 66:8) Ntre owụt ifiọk ndidọhọ nte ke mmọ n̄ko ẹdu ke idak mfọnido Jehovah oro owo mîdotke ye ke idak ibet Christ. Ke adan̄aemi mîdịghe mme andibuana ke obufa ediomi, mmọ ẹdi mme adia ufọn esie.

“Isenowo” ye “Israel Abasi”

4, 5. (a) Nte ekemde ye Isaiah, ewe otu ẹdinam n̄kpọ inọ Jehovah? (b) Didie ke Isaiah 56:6, 7 osu akwa otuowo ke idem?

⁴ Prọfet Isaiah ekewet ete: “Ama edi nditọ isenowo n̄ko ẹmi ẹdiande idem ye Jehovah, ẹnyụn̄ ẹnamde n̄kpọ esie, ẹnyụn̄ ẹmade enyịn̄ Jehovah, ẹnyụn̄ ẹdide ikọt esie: kpukpru mmọ eke ẹnịmde sabbath, mbak edibiat enye, ẹnyụn̄ ẹmụmde ediomi ẹkama; nyada mmọ ndi ke edisana obot mi, nnyụn̄ nnam mmọ ẹdat esịt ke ufọk akam mi: ndifọp uwa mmọ ye uwa emem mmọ ẹyedi n̄kpọ inem ke itieuwa mi.” (Isaiah 56:6, 7) Ke Israel, emi ọkọwọrọ ete ke “isenowo,” ẹmi mîkedịghe nditọ Israel, ẹyetuak ibuot ẹnọ Jehovah—ẹmade enyịn̄ esie, ẹnịmde se ibuanade ke Ibet ediomi, ẹnịmde Sabbath, ẹnyụn̄ ẹfọpde uwa ke temple, “ufọk akam” Abasi.—Matthew 21:13.

⁵ Ke eyo nnyịn, “nditọ isenowo ẹmi ẹdiande idem ye Jehovah” ẹdi akwa otuowo. Mmọ ẹmi ẹnam n̄kpọ ẹnọ Jehovah ke ebuana ye Israel Abasi. (Zechariah 8:23) Mmọ ẹwa ukem uwa emi enemde nte eke Israel Abasi. (Mme Hebrew 13:15, 16) Mmọ ẹtuak ibuot ke temple Abasi eke spirit, “ufọk akam” esie. (Men Ediyarade 7:15 domo.) Nte mmọ ẹsinịm Sabbath eke urua ke urua? Owo iwụkke mmọ oro ẹyetde aran m̀mê mme erọn̄ en̄wen ndinam emi. (Colossae 2:16, 17) Nte ededi, Paul ọkọdọhọ mme Christian ẹdide mme Hebrew ẹmi ẹyetde aran ete: “Nduọkodudu sabbath osụhọ ọnọ ikọt Abasi. Koro owo ama odụk ke nduọkodudu Abasi, enye odop utom esie, kpa nte Abasi okodopde utom Esiemmọ.” (Mme Hebrew 4:9, 10) Mme Hebrew oro ẹma ẹdụk “nduọk-odudu sabbath” emi ke ini mmọ ẹkesụkde idemmọ ẹnọ “edinen ido Abasi” ẹnyụn̄ ẹduọkde odudu ke edin̄wana ndida mme utom Ibet n̄wụt nte mmimọ inende. (Rome 10:3, 4) Mme Christian ẹdide mme Gentile ẹmi ẹyetde aran ẹdara ukem nduọkodudu oro ebe ke ndisụk idemmọ nnọ edinen ido Jehovah. Akwa otuowo ẹdiana ye mmọ ke nduọkodudu oro.

6. Didie ke mme erọn̄ en̄wen mfịn ẹyịre obufa ediomi?

⁶ N̄ko-n̄ko, mme erọn̄ en̄wen ẹsọn̄ọ ẹmụm obufa ediomi ukem nte isenowo eke eset ẹkesọn̄ọde ẹmụm Ibet ediomi ẹkama. Ke nso usụn̄? Idịghe ke ndidi mme andibuana ke enye edi ke ndisụk ibuot nnọ mme ibet ẹmi ẹsan̄ade ye enye ye ke ndibọ ufọn nto mme ndutịm esie. (Men Jeremiah 31:33, 34 domo.) Ukem nte nsan̄a mmọ oro ẹyetde aran, mme erọn̄ en̄wen ẹnyene ibet Jehovah oro ẹwetde ‘ke esịt mmọ.’ Mmọ ẹnen̄ede ẹma ẹnyụn̄ ẹnịm mme ewụhọ ye mme edumbet Jehovah. (Psalm 37:31; 119:97) Ukem nte mme Christian oro ẹyetde aran, mmọ ẹfiọk Jehovah. (John 17:3) Nso kaban̄a mbobi? N̄kpọ nte isua 1,500 mbemiso ẹnamde obufa ediomi, Moses ama akpak nditọ Israel ete: “Mbufo ẹnịm ndien esịt mbufo mbobi.” (Deuteronomy 10:16; Jeremiah 4:4) Ke adan̄aemi mbobi ikpọkidem emi ekedide se anade ẹnịm ekebede efep ye Ibet, ana mmọ oro ẹyetde aran ye mme erọn̄ en̄wen “ẹnịm [esịt mmọ] mbobi.” (Colossae 2:11) Ke akpatre, Jehovah efen idiọkn̄kpọ mme erọn̄ en̄wen ke isọn̄ ‘iyịp ediomi’ Jesus emi ẹkeduọkde. (Matthew 26:28; 1 John 1:9; 2:2) Abasi idaha mmọ idisịn nte nditọ eke spirit, nte enye anamde ye owo 144,000. Edi enye etebe mme erọn̄ en̄wen ikpe, ke usụn̄ifiọk oro eketebede Abraham ikpe nte ufan Abasi.—Matthew 25:46; Rome 4:2, 3; James 2:23.

7. Nso idotenyịn iberede inọ mme erọn̄ en̄wen mfịn, emi ẹtebede ikpe nte ẹketebede Abraham?

⁷ Kaban̄a owo 144,000, nditebe mmọ ikpe eberede usụn̄ ọnọ mmọ ndinyene idotenyịn edikara ye Jesus ke Obio Ubọn̄ eke heaven. (Rome 8:16, 17; Galatia 2:16) Kaban̄a mme erọn̄ en̄wen, nditebe mmọ ikpe nte mme ufan Abasi anam mmọ ẹnyene idotenyịn edidu uwem ke nsinsi ke paradise isọn̄—edide ebe ke ndibọhọ Armageddon nte ubak akwa otuowo mîdịghe ebe ke ‘ediset ke n̄kpa nti owo.’ (Utom 24:15) Nso akwa ifet ke edi ntem ndinyene utọ idotenyịn oro ndinyụn̄ ndi ufan Andikara ekondo, nnyụn̄ ndi “andidụn̄ ke tent [esie]”! (Psalm 15:1, 2) Ih, ẹdiọn̄ mbon oro ẹyetde aran ye mme erọn̄ en̄wen ke utịbe utịbe usụn̄ ebe ke Jesus, Mfri Abraham.

N̄kponn̄kan Usen Usio-Isop

8. Nso ke uwa Usen Usio-Isop eke idak Ibet akada aban̄a?

⁸ Ke ini enemede aban̄a obufa ediomi, Paul ama eti mme andikot n̄wed esie aban̄a Usen Usio-Isop eke isua ke isua ke idak Ibet ediomi. Ke usen oro, ẹma ẹsiwa nsio nsio uwa—kiet kaban̄a esien Levi eke mme oku ye efen kaban̄a mme esien 12 ẹmi mîkedịghe eke oku. Ẹma ẹnam emi an̄wan̄a ke anyan ini nte adade aban̄a akwa uwa Jesus oro edinamde ufọn ọnọ owo 144,000 ẹmi ẹnyenede idotenyịn eke heaven ye ediwak miliọn owo ẹmi ẹnyenede idotenyịn eke isọn̄.a Paul ama owụt ete ke edisu ẹdinọ mme ufọn uwa ufak Jesus ebe ke n̄kponn̄kan Usen Usio-Isop ke idak obufa ediomi. Nte Akwa Oku n̄kponn̄kan usen emi, Jesus ama ọnọ mfọnmma uwem esie nte uwa usio-isop man ọbọ “nsinsi ufak” ọnọ ubonowo.—Mme Hebrew 9:11-24.

9. Ke ẹdude ke obufa ediomi, nso ke mme Christian ẹdide mme Hebrew ẹkekeme ndibọ?

⁹ Ediwak Christian ẹkedide mme Hebrew ke akpa isua ikie ẹkesụk “[ẹnyenyene] ọkpọsọn̄ ufụp ẹban̄a ibet [Moses].” (Utom 21:20) Nte odotde, ndien, Paul ama eti mmọ ete: “[Jesus] edi esịne-ufọt obufa ediomi, man, sia kiet ama akakpa ndifak owo nsio ke mme ndudue eke mmọ ẹkesịnede ke idak akpa ediomi ẹdue, mmọ ẹmi ẹkekotde ẹkpebọ un̄wọn̄ọ nsinsi udeme.” (Mme Hebrew 9:15) Obufa ediomi ama osio mme Christian ẹkedide mme Hebrew ke akani ediomi, emi akayararede idiọkido mmọ. Ke ntak obufa ediomi, mmọ ẹkeme ndibọ “un̄wọn̄ọ nsinsi udeme [eke heaven].”

10. Kaban̄a nso ke mbon oro ẹyetde aran ye mme erọn̄ en̄wen ẹkọm Abasi?

¹⁰ “Owo ekededi” emi “ọbuọtde idem ye Eyen” ọyọbọ ufọn oto uwa ufak oro. (John 3:16, 36) Paul ọkọdọhọ ete: “Christ, ke ẹkewade Enye ini kiet ete obiom idiọkn̄kpọ ediwak owo, ọyọtọn̄ọ ntak ọbiọn̄ọde; edi Enye ididịghe ndinyene mbubehe ye idiọkn̄kpọ, edi edidi ndinyan̄a mmọ ẹmi ẹtiede ẹbet Enye.” (Mme Hebrew 9:27b) Mfịn, mbon oro ẹnen̄erede ẹyom Jesus ẹsịne mme Christian oro ẹyetde aran ke otu Israel Abasi oro ẹsụk ẹdude ye ediwak miliọn owo oro ẹnamde akwa otuowo, ẹmi n̄ko ẹnyenede nsinsi udeme. Otu mbiba ẹmi ẹkọm Abasi kaban̄a obufa ediomi ye mme ọnọ-uwem edidiọn̄ oro ẹsan̄ade ye enye, esịnede n̄kponn̄kan Usen Usio-Isop ye utom Akwa Oku oro, Jesus, ke Ata Edisana eke heaven.

Ndisịn Idem Nnam Edisana Utom

11. Ye ubieresịt oro ẹnamde asana ebe ke uwa Jesus, nso ke mbon oro ẹyetde aran ye mme erọn̄ en̄wen ẹnam idara idara?

¹¹ Ke n̄wed esie oro ekewetde ọnọ ẹsọk mme Hebrew, Paul ama ọsọn̄ọ etịn̄ nte ekọmurua uwa Jesus okponde ke ndutịm obufa ediomi ke ẹmende ẹdomo ye mme uwa idiọkido ke idak akani ediomi. (Mme Hebrew 9:13-15) Mfọnn̄kan uwa Jesus ekeme “ndiyet esịt nnyịn, anam nnyịn ibọhọ utom n̄kpa, inyụn̄ inam n̄kpọ inọ Abasi uwem.” Ye mme Christian ẹkedide mme Hebrew, “utom n̄kpa” ama esịne “mme ndudue eke mmọ ẹkesịnede ke idak akpa ediomi ẹdue.” Ye mme Christian mfịn, mmọ ẹsịne mme idiọkn̄kpọ ẹmi ẹkenamde ke ini edem oro ẹnen̄erede ẹkabade esịt Abasi onyụn̄ efende ọnọ. (1 Corinth 6:9-11) Ye ubieresịt emi ẹnamde asana, mme Christian ẹmi ẹyetde aran ẹnam “edisana utom ẹnọ odu uwem Abasi.” Ntre n̄ko ke akwa otuowo ẹnam. Ke ẹnamde ubieresịt mmọ asana ebe ke “iyịp Eyenerọn̄,” mmọ ẹdu ke akwa temple Abasi eke spirit, “ẹnam n̄kpọ ẹnọ Enye uwemeyo ye okoneyo.”—Ediyarade 7:14, 15.

12. Didie ke nnyịn iwụt nte ke imenyene “ọyọhọ mbuọtidem”?

¹² Ke adianade do, Paul ọkọdọhọ ete: “Ẹyak nnyịn isan̄a ikpere ye esịt akpanikọ ke ọyọhọ mbuọtidem, ye esịt eke esịmede ẹsio ifiọk idiọkn̄kpọ ẹfep, ye idem eke ẹyetde ke ata mmọn̄.” (Mme Hebrew 10:22) Didie ke nnyịn ikeme ndiwụt nte ke nnyịn imenyene “ọyọhọ mbuọtidem”? Paul ama eteme mme Christian ẹdide mme Hebrew ete: “Ẹnyụn̄ ẹyak nnyịn isọn̄ọ imụm ikọ eke idade iyarade idotenyịn [eke heaven] ikama, mbak edibọhọ nnyịn oyok; koro Enye emi ọnọde nnyịn un̄wọn̄ọ edi Abasi akpanikọ: ẹyak nnyịn inyụn̄ ikere nte ikpedemerede kiet eken inọ ima ye nti utom; ikûnyụn̄ isịn ndisop idem ọtọkiet, nte edu ndusụk owo edide, edi inọ kiet eken item; ndien mbufo ẹkpedọdiọn̄ ẹnam ntem, adan̄a nte mbufo ẹkụtde ẹte usen oro ke asan̄a ekpere.” (Mme Hebrew 10:23-25) Edieke mbuọtidem nnyịn enyenede uwem, nnyịn n̄ko ‘idisịnke ndisop idem ọtọkiet.’ Eyenem nnyịn ndidemede nditọete nnyịn nnyụn̄ ndi se mmọ ẹdemerede ẹnọ ima ye nti utom nnyụn̄ ndi se ẹsọn̄ọde idem kaban̄a akpan utom ediyarade idotenyịn nnyịn an̄wan̄wa, edide edi eke heaven m̀mê eke isọn̄.—John 13:35.

“Nsinsi Ediomi”

13, 14. Ke nso mme usụn̄ ke obufa ediomi edi nsinsi?

¹³ Nso iditịbe ke ini akpatre ke otu 144,000 ẹbọde idotenyịn eke heaven mmọ? Nte ẹyetre ndida obufa ediomi nnam n̄kpọ? Ke ini oro, andibuana ke Israel Abasi ndomokiet oro osụhọde ke isọn̄ ididụhe aba. Kpukpru mme andibuana ke ediomi oro ẹdidu ye Jesus “ke Obio Ubọn̄ Ete [esie].” (Matthew 26:29) Edi nnyịn imeti mme ikọ Paul emi enye ekewetde ke leta esie ọnọ ẹsọk mme Hebrew: “Abasi emem, [akanam] akwa Ekpemerọn̄ asan̄a ke iyịp nsinsi ediomi eset ke n̄kpa.” (Mme Hebrew 13:20, sịghisịghi ubọkn̄wed edi eke nnyịn; Isaiah 55:3) Ke nso usụn̄ ke obufa ediomi edi nsinsi?

¹⁴ Akpa, ke mîbietke Ibet ediomi, owo idikpụhọke enye tutu amama. Udiana, mme utịp edinam esie ẹdi ke nsinsi, idem kpa nte itie edidem Jesus edide. (Men Luke 1:33 domo ye 1 Corinth 15:27, 28.) Obio Ubọn̄ eke heaven enyene nsinsi itie ke uduak Jehovah. (Ediyarade 22:5) Ndien ọyọhọ ita, mme erọn̄ en̄wen ẹyekaiso ndibọ ufọn nto ndutịm obufa ediomi. Ke ini Tọsịn Isua Ukara Christ, mbon oro ẹnamde akpanikọ ẹyeka iso “ẹnam n̄kpọ ẹnọ [Jehovah] uwemeyo ye okoneyo ke temple esie” kpa nte mmọ ẹnamde idahaemi. Jehovah idifiakke idemede mme idiọkn̄kpọ mmọ ẹmi ẹma ẹkefen ke isọn̄ “iyịp ediomi” Jesus. Mmọ ẹyeka iso ẹdara edinen idaha nte mme ufan Jehovah, ẹyenyụn̄ ẹwet mbet esie ke esịt mmọ.

15. Tịn̄ nte itie ebuana Jehovah ye mme andituak ibuot nnọ enye eke isọn̄ editiede ke obufa ererimbot.

¹⁵ Nte Jehovah eyekeme ndidọhọ adan̄aoro mban̄a mme asan̄autom ẹmi ẹdide owo ete: ‘Ami ndi Abasi mmọ, mmọ ẹnyụn̄ ẹdi ikọt mi’? Ih. “Enye oyonyụn̄ odụn̄ ye mmọ; ndien mmọ ẹyedi ikọt esie, Abasi ke idem esie oyonyụn̄ odu ye mmọ.” (Ediyarade 21:3, sịghisịghi ubọkn̄wed edi eke nnyịn.) Mmọ ẹyekabade ẹdi “nna nti ikọt Abasi,” mme andida ke ibuot ‘edima obio,’ n̄wanndọ Jesus Christ eke heaven, emi ẹdude ke isọn̄. (Ediyarade 14:1; 20:9; 21:2) Ofụri emi ekeme nditịbe ke ntak mbuọtidem mmọ ke ‘iyịp ediomi’ Jesus oro ẹkeduọkde ye nsụkibuot mmọ nnọ ndidem ye mme oku eke heaven, ẹmi ke ini ẹkedude ke isọn̄ ẹkedide Israel Abasi.—Ediyarade 5:10.

16. (a) Nso mme idaha ẹna ẹbet mbon oro ẹdinamde ẹset ke n̄kpa ke isọn̄? (b) Nso mme edidiọn̄ ẹdidi ke utịt tọsịn isua?

¹⁶ Nso kaban̄a mme akpan̄kpa oro ẹdinamde ẹset ke isọn̄? (John 5:28, 29) Ẹyenọ mmọ n̄ko ikot “ndikụt mfọn” eke otode ke Jesus, Mfri Abraham. (Genesis 22:18) Mmọ n̄ko ẹyema enyịn̄ Jehovah, ẹnamde n̄kpọ ẹnọ enye, ẹwade inem uwa, ẹnyụn̄ ẹnamde edisana utom ke ufọk akam esie. Mmọ oro ẹnamde ntre ẹyedụk ke nduọkodudu Abasi. (Isaiah 56:6, 7) Etisịm utịt tọsịn isua oro, ẹyeda kpukpru mme anam akpanikọ ẹsịm mfọnmma ebe ke utom Jesus Christ ye mme nsan̄a oku 144,000 esie. Mmọ ẹdidi ndinen, idịghe ikpîkpu editebe ikpe nte mme ufan Abasi. Mmọ “ẹyedu uwem,” ẹbọhọde udọn̄ọ ye n̄kpa ẹmi ẹkedade ẹto Adam ofụri ofụri. (Ediyarade 20:5; 22:2) Nso edidiọn̄ ke oro edidi ntem! Ọkọn̄ọde ke idaha ekikere nnyịn mfịn, etie nte ke utom itie oku Jesus ye eke 144,000 oyokụre adan̄aoro. Eyedi ẹma ẹda mme edidiọn̄ n̄kponn̄kan Usen Usio-Isop ẹnam n̄kpọ ọyọhọ ọyọhọ. N̄ko-n̄ko, Jesus ‘ayayak itie ubọn̄ ọnọ Abasi, kpa Ete Esie.’ (1 Corinth 15:24) Akpatre udomo oyodu ọnọ ubonowo, ndien ekem ẹyesobo Satan ye mme demon esie ẹfep ke nsinsi.—Ediyarade 20:7, 10.

17. Ke ikerede iban̄a idatesịt oro anade ebet nnyịn, nso ke nnyịn owo kiet kiet ikpebiere ndinam?

¹⁷ Nso udeme, edieke edidude, ke “nsinsi ediomi” edinyene ke aduai-owo-idem ini oro editọn̄ọde adan̄aoro? Oro inyeneke nnyịn nditịn̄. Se Jehovah ayararede ekem kan̄a ke emi. Enye ọyọhọ nnyịn ye uten̄e. Kam kere—nsinsi uwem nte ubak “obufa enyọn̄ ye obufa isọn̄”! (2 Peter 3:13) Akpakam n̄kpọ ndomokiet inamke udọn̄ nnyịn ndida un̄wọn̄ọ oro nnyene emem. Ekeme ndidi ndisọn̄ọ nda ididịghe mmemmem n̄kpọ. Paul ọkọdọhọ ete: “Ana nte mbufo ẹnyene ime man ẹbọ se Abasi ọkọn̄wọn̄ọde, ke ẹma ẹkenam se Enye amade.” (Mme Hebrew 10:36) Nte ededi, ti nte ke mfịna ekededi eke ẹnyenede ndikan, ubiọn̄ọ ekededi eke ẹnyenede ndikan, imenke udomo ye idatesịt oro anade ebet nnyịn. (2 Corinth 4:17) Ntem, akpakam nnyịn ndomokiet “idịghe mbon mfiakedem n̄ka nsobo.” Utu ke oro, akpakam nnyịn iwụt idem nnyịn nte idide “mmọ ẹmi ẹbuọtde idem isịm edinyan̄a ukpọn̄.” (Mme Hebrew 10:39) Akpakam kpukpru nnyịn inyene ọyọhọ mbuọtidem ke Jehovah, Abasi mme ediomi, isịm nsinsi edidiọn̄ nnyịn owo kiet kiet.

[Mme Ikọ idakisọn̄]

Nte Ama An̄wan̄a Fi?

◻ Ke ẹsiode mme Christian oro ẹyetde aran ẹfep, mmanie ke ẹdiọn̄ ebe ke Mfri Abraham?

◻ Ke ndidi se ẹdiọn̄de ke obufa ediomi, didie ke mme erọn̄ en̄wen ẹbiet mme okpono Abasi ke ido mme Jew ke idak akani ediomi?

◻ Didie ke ẹdiọn̄ mme erọn̄ en̄wen ebe ke ndutịm n̄kponn̄kan Usen Usio-Isop?

◻ Ntak emi Paul okokotde obufa ediomi “nsinsi ediomi”?

[Ekebe ke page 21]

Edisana Utom Ke Temple

Akwa otuowo ẹtuak ibuot ye mme Christian oro ẹyetde aran ke okụre akwa temple Jehovah eke spirit ke isọn̄. (Ediyarade 7:14, 15; 11:2) Ntak ndomokiet idụhe ndibiere nte ke mmọ ẹdu ke san̄asan̄a Okụre mme Gentile. Ke ini Jesus okodude ke isọn̄, Okụre mme Gentile ama odu ke temple. Nte ededi, ke mme ndutịm temple Solomon ye Ezekiel oro ẹkenọde ke odudu spirit, ufan̄ ikodụhe inọ Okụre mme Gentile. Ke temple Solomon, etehe ama odu ke an̄wa emi nditọ Israel ye mme okpono Abasi ke ido mme Jew, iban ye iren, ẹketuakde ibuot ọtọkiet. Emi edi ntịn̄nnịm uwụtn̄kpọ okụre temple eke spirit ke isọn̄, emi John okokụtde akwa otuowo nte ẹnamde edisana utom.

Nte ededi, mme oku ye mme Levi ikpọn̄ ẹkekeme ndidụk okụre oro okodude ke esịt esịt, emi akwa itie uwa okodude; mme oku ikpọn̄ ẹkekeme ndidụk Edisana; ndien akwa oku ikpọn̄ ekekeme ndidụk Ata Edisana. An̄wan̄a nte ke okụre oro okodude ke esịt esịt ye Edisana ẹkeda ẹban̄a n̄wọrọnda idaha eke spirit mme Christian oro ẹyetde aran ke isọn̄. Ndien Ata Edisana ada aban̄a heaven ke idemesie, emi mme Christian oro ẹyetde aran ẹbọde uwem oro mîkemeke ndikpa ye Akwa Oku eke heaven mmọ.—Mme Hebrew 10:19, 20.

[Ndise ke page 23]

Ke ikerede iban̄a idatesịt oro anade ebet nnyịn, ẹyak nnyịn ‘ibuọt idem isịm edinyan̄a ukpọn̄’