Mme N̄kponn̄kan Edidiọn̄ Ẹbede Ke Obufa Ediomi

“[Jesus edi] esịne-ufọt ke ediomi eke ọfọnde akan.”—MME HEBREW 8:6.

1. Anie okowụt nte idide ‘mfri n̄wan’ emi ẹken̄wọn̄ọde ke Eden, ndien didie ke ‘ẹkenuak enye nditịn̄-ikpat’?

KE Adam ye Eve ẹma ẹkenam idiọkn̄kpọ, Jehovah ama ebiere ikpe ọnọ Satan, enye emi akabian̄ade Eve, ọdọhọde ete: “Nyonyụn̄ nsịn usua ke ufọt fo ye n̄wan, ye ke ufọt ubon fo ye ubon esie; enye ayanuak fi ibuot, afo oyonyụn̄ anuak enye nditịn̄-ikpat.” (Genesis 3:15) Ke ini Jesus akanade baptism ke Akpa Jordan ke 29 E.N., Mfri emi ẹken̄wọn̄ọde ke Eden ama owụt idem ke akpatre. Ke n̄kpa esie ke eto ndutụhọ ke 33 E.N., ẹma ẹsu ubak prọfesi eset oro. Satan ama ‘anuak nditịn̄-ikpat’ Mfri oro.

2. Nte ekemde ye mme ikọ Jesus, didie ke n̄kpa esie enyene ufọn ọnọ ubonowo?

² Nte enemde, unan oro, okposụkedi eketịmde abiak, ikedịghe ke nsinsi. Ẹma ẹnam Jesus eset ke n̄kpa ọbọ uwem eke spirit emi mîkemeke ndikpa onyụn̄ ọdọk ebịne Ete esie ke heaven, ke ebiet emi enye ekekpede ekọmurua iyịp emi enye ọkọduọkde “ndifak ediwak owo.” Ntem, mme ikọ esie ẹma ẹdi akpanikọ: “Ana nte ẹdimen Eyen Owo ke enyọn̄: man owo ekededi eke ọbuọtde idem ye Enye enyene nsinsi uwem. Koro Abasi akamama ererimbot ntem, tutu Enye osio ikpọn̄îkpọn̄ Eyen emi Enye obonde ọnọ, man owo ekededi eke ọbuọtde idem ye Enye okûtak, edi enyene nsinsi uwem.” (Matthew 20:28; John 3:14-16; Mme Hebrew 9:12-14) Obufa ediomi enyene akpan udeme ke edisu ntin̄nnịm ikọ Jesus.

Obufa Ediomi

3. Ini ewe ke ẹkebem iso ẹkụt nte obufa ediomi odude ke edinam?

³ Esisịt ini mbemiso n̄kpa esie, Jesus ama asian mme anditiene enye ete ke iyịp imọ emi ẹduọkde ekedi ‘iyịp obufa ediomi.’ (Matthew 26:28; Luke 22:20) Usen duop ke ama ọkọdọk aka heaven, ẹma ẹkụt nte obufa ediomi odude ke edinam ke ini ẹken̄wan̄ade edisana spirit ẹduọk n̄kpọ nte mbet 120 ẹmi ẹkebohode ke ubet enyọn̄ ke Jerusalem. (Utom 1:15; 2:1-4) Ẹdida mbet 120 ẹmi ndisịn ke obufa ediomi okowụt ete ke “akani” ediomi, Ibet ediomi, ikenyeneke aba ufọn.—Mme Hebrew 8:13.

4. Nte akani ediomi ama okpu? Nam an̄wan̄a.

⁴ Nte akani ediomi ama okpu? Baba-o. Edi akpanikọ, sia ẹma ẹkekpụhọde enye ke emi, Israel eke obụk ikedịghe aba san̄asan̄a ikọt Abasi. (Matthew 23:38) Edi oro ekedi ke ntak nsọn̄ibuot Israel ye edisịn Enye Oro Jehovah Ekeyetde Aran. (Exodus 19:5; Utom 2:22, 23) Mbemiso ẹkekpụhọde Ibet oro, nte ededi, enye ama anam ekese. Enye ama ọnọ usụn̄ ndibịne Abasi onyụn̄ ekpeme ọbiọn̄ọ nsunsu ido ukpono ke ediwak isua ikie. Enye ama ebem iso owụt nte obufa ediomi editiede onyụn̄, ye n̄kaiso uwa esie, owụt ediyom emi owo oyomde edifak nsio ke idiọkn̄kpọ ye n̄kpa ke mbrenyịn. Ke akpanikọ, Ibet ekedi “andikpeme nnyịn, emi adade nnyịn ọsọk Christ.” (Galatia 3:19, 24; Rome 3:20; 4:15; 5:12; Mme Hebrew 10:1, 2) Nte ededi, ebede ke obufa ediomi ke ẹkụt edidiọn̄ emi ẹken̄wọn̄ọde ẹnọ Abraham ọyọhọ ọyọhọ.

Mme Idụt Ẹkụt Mfọn Otode ke Mfri Abraham

5, 6. Ke ntọn̄ọ ntọn̄ọ edisu ediomi Abraham ke n̄kan̄ eke spirit, anie edi Mfri Abraham, ndien ewe idụt ekebem iso ọbọ edidiọn̄ ebe ke enye?

⁵ Jehovah ama ọn̄wọn̄ọ ọnọ Abraham ete: “Kpukpru mme idụt ke ererimbot ẹyenyụn̄ ẹkụt mfọn eke otode ke [mfri] fo.” (Genesis 22:18) Ke idak akani ediomi, ẹma ẹdiọn̄ ediwak isenowo ẹkedide mbon nsụkesịt ebe ke ebuana mmọ ye Israel, idụt mfri Abraham. Ke akpa edisu esie ke n̄kan̄ eke spirit, nte ededi, Mfri Abraham ekedi mfọnmma owo kiet. Paul ama anam emi an̄wan̄a ke ini enye ọkọdọhọde ete: “Ẹken̄wọn̄ọ mme un̄wọn̄ọ ẹnọ Abraham ye eyen emi enye edibonde. Idọhọke enye ite, Nditọ emi afo edibonde, nte n̄kpọ eke mmọ ẹdide ediwak; edi etịn̄ nte owo etịn̄ aban̄a owo kiet, ete, Eyen emi afo edibonde; ndien Eyen oro edi Christ.”—Galatia 3:16.

⁶ Ih, Jesus edi Mfri Abraham, ndien ebede ke Enye mme idụt ẹbọ edidiọn̄ emi akande se ededi oro Israel eke obụk ekekemede ndibọ. Ke akpanikọ, akpa idụt ndibọ edidiọn̄ emi ekedi Israel ke idemesie. Esisịt ini ke Pentecost 33 E.N. ebede, apostle Peter ama ọdọhọ otu mme Jew ete: “Mbufo ẹdi nditọ mme prọfet, ye nditọ ediomi oro Abasi okodụkde ye mme ete mbufo, ke adan̄aemi Enye ọdọhọde Abraham ete, Ndien oto ke [mfri] fo kpukpru orụk owo ke ererimbot ẹyekụt ufọn. Sia Abasi ama akanam Owo Esie adaha ada, Enye ebem iso ọdọn̄ Enye ete edidiọn̄ mbufo, ke edinam mbufo kpukpru ẹwọn̄ọde ẹkpọn̄ mme idiọkn̄kpọ mbufo.”—Utom 3:25, 26.

7. Mme idụt ewe ke ẹkediọn̄ ebe ke Jesus, Mfri Abraham?

⁷ Ikebịghike ẹma ẹnam edidiọn̄ oro atara esịm mbon Samaria ndien ekem mme Gentile. (Utom 8:14-17; 10:34-48) Ndusụk ini ke ufọt ufọt 50 ye 52 E.N., Paul ama ewet n̄wed ọnọ ẹsọk mme Christian ke Galatia ke Asia Minor ete: “N̄wed Abasi, sia ekebemde iso okụt ete Abasi eyetebe mme Gentile ikpe ke ntak mbuọtidem, ebem iso ọkwọrọ ikọ ufọn ọnọ Abraham ete, Oto fi ke kpukpru mme idụt ẹyekụt ufọn. Mmọdo ndien mmọ eke mbuọtidem ẹtiene Abraham emi ọkọbuọtde idem ẹkụt ufọn.” (Galatia 3:8, 9; Genesis 12:3) Okposụkedi ediwak Christian ke Galatia ẹkedide “mme Gentile,” ẹma ẹdiọn̄ mmọ ebe ke Jesus ke ntak mbuọtidem mmọ. Ke nso usụn̄?

8. Kaban̄a mme Christian eke eyo Paul, nso ikabuana ke ndidi se ẹdiọn̄de ebe ke Mfri Abraham, ndien owo ifan̄, ke akpatre, ẹbọ utọ edidiọn̄ oro?

⁸ Paul ama ọdọhọ mme Christian ke Galatia, ẹketode idaha ekededi ke uwem, ete: “Edieke mbufo ẹdide eke Christ, mbufo ẹnyụn̄ ẹdi [mfri] Abraham; nte un̄wọn̄ọ edide, mbufo ẹdi mme ada udeme nnyene.” (Galatia 3:29) Kaban̄a mbon Galatia oro, edidiọn̄ ebede ke Mfri Abraham ama abuana mmọ ndidi mme andibuana ke obufa ediomi ye edidi nsan̄a mme ada udeme nnyene ye Jesus, mme nsan̄a ye Jesus ke mfri Abraham. Nnyịn idiọn̄ọke nte owo ẹkewakde ke Israel eset. Nnyịn n̄kukụre ifiọk ite ke enye ama awak “nte ntan emi odude ke mben inyan̄ ke uwak.” (1 Ndidem 4:20) Nnyịn, nte ededi, imọdiọn̄ọ akpatre ibat nsan̄a Jesus ke mfri eke spirit—144,000. (Ediyarade 7:4; 14:1) Owo 144,000 oro ẹto “kpukpru esien, ye usem, ye obio, ye idụt” ubonowo ẹnyụn̄ ẹbuana ke ndinọ mmọ en̄wen n̄ko mme edidiọn̄ ediomi Abraham.—Ediyarade 5:9.

Ẹma Ẹsu Prọfesi

9. Didie ke mbon oro ẹdude ke obufa ediomi ẹnyene mbet Jehovah ke esịt mmọ?

⁹ Ke ebemde iso etịn̄ aban̄a obufa ediomi, Jeremiah ekewet ete: “Koro emi edide ediomi eke ndidiomide ye ufọk Israel, ke mme usen oro ẹma ẹbe, Jehovah ọdọhọ: nyesịn mmọ mbet mi ke esịt, nnyụn̄ n̄wet mmọ ke ọwọn̄esịt.” (Jeremiah 31:33) Edi edu mbon oro ẹdude ke obufa ediomi nte mmọ ẹnam n̄kpọ Jehovah ke ima. (John 13:35; Mme Hebrew 1:9) Ẹwet ibet Jehovah ke esịt mmọ, ndien mmọ ẹnen̄ede ẹyom ndinam uduak esie. Edi akpanikọ, ndusụk owo oro ẹkenamde akpanikọ ke Israel eset ẹma ẹnyene ufiop ufiop ima ẹnọ ibet Jehovah. (Psalm 119:97) Edi ediwak owo ikenyeneke. Kpa ye oro mmọ ẹkesụk ẹdi ubak idụt oro. Owo ndomokiet ikemeke ndisịne ke obufa ediomi edieke owo mîkewetke ibet Abasi ke esịt esie.

10, 11. Kaban̄a mbon oro ẹdude ke obufa ediomi, ke nso usụn̄ ke Jehovah “edi Abasi mmọ,” ndien didie ke kpukpru mmọ ẹdifiọk enye?

¹⁰ Jehovah ama akaiso ọdọhọ aban̄a mbon ẹmi ẹdude ke obufa ediomi ete: “Nyonyụn̄ ndi Abasi mmọ, ndien mmọ ẹyedi ikọt mi.” (Jeremiah 31:33) Ke Israel eset ediwak owo ẹkekpono abasi mme idụt, edi mmọ ẹkesụk ẹdi nditọ Israel. Ke isọn̄ obufa ediomi oro, Jehovah ama obot idụt eke spirit, “Israel Abasi,” man ada itie Israel eke obụk. (Galatia 6:16; Matthew 21:43; Rome 9:6-8) Nte ededi, owo ndomokiet idịghe ubak obufa idụt oro edieke enye etrede ndituak ibuot nnọ Jehovah kpa enye ikpọn̄.

¹¹ Jehovah n̄ko ama ọdọhọ ete: “Kpukpru mmọ, n̄kpri ye ikpọ, ẹyefiọk mi.” (Jeremiah 31:34) Ke Israel, ediwak owo ẹma ẹfụmi Jehovah, ke nditịm ntịn̄ ẹdọhọde ẹte: “Jehovah idinamke eti n̄kpọ, idinyụn̄ inamke idiọk.” (Zephaniah 1:12) Owo ndomokiet ikaha iso idi ubak Israel Abasi edieke enye ofụmide Jehovah m̀mê asabarede edisana utuakibuot. (Matthew 6:24; Colossae 3:5) Nditọ Israel eke spirit ẹdi “mmọ eke ẹfiọkde Abasi mmọ.” (Daniel 11:32) Mmọ ẹdat esịt ‘ndifiọk ata Abasi kierakiet ye Jesus Christ.’ (John 17:3) Ndidiọn̄ọ Jesus anam ifiọk Abasi mmọ otụn̄ọ koro, ke n̄wọrọnda usụn̄, Jesus edi ‘enye emi ayararede Abasi.’—John 1:18; 14:9-11.

12, 13. (a) Ke nso isọn̄ ke Jehovah efen idiọkn̄kpọ mbon oro ẹdude ke obufa ediomi? (b) Kaban̄a edifen mme idiọkn̄kpọ, didie ke obufa ediomi ọfọn akan akani ediomi?

¹² Ke akpatre, Jehovah ama ọn̄wọn̄ọ ete: “Nyefen mme idiọkido mmọ, ndinyụn̄ ntịghi aba mme oburobụt ido mmọ.” (Jeremiah 31:34b) Ibet Moses ama esịne item emi ẹwetde-wet ke mme itie ikie oro ẹkedọhọde nditọ Israel ẹnịm. (Deuteronomy 28:1, 2, 15) Kpukpru mbon oro ẹkebiatde Ibet oro ẹma ẹsiwa uwa ndifụk mme idiọkido mmọ. (Leviticus 4:1-7; 16:1-31) Ediwak mme Jew ẹma ẹdinịm ke akpanikọ ẹte ke mmimọ imekeme ndikabade ndi ndinen ebe ke mmọ ndinam utom Ibet. Mme Christian, nte ededi, ẹdiọn̄ọ ẹte ke mmimọ ikemeke-keme ndinyene edinen ido ebe ke utom mmimọ. Mmọ ikemeke ndifep ndinam idiọkn̄kpọ. (Rome 5:12) Ke idak obufa ediomi, ẹkeme ndinyene edinen idaha ke iso Abasi ke isọn̄ uwa Jesus ikpọn̄. Nte ededi, utọ idaha oro edi enọ, mfọnido Abasi oro owo mîdotke. (Rome 3:20, 23, 24) Jehovah osụk oyoyom n̄kopitem oto mme asan̄autom esie. Paul ọdọhọ ke mbon oro ẹdude ke idak obufa ediomi ẹdu “ke idak ibet Christ.”—1 Corinth 9:21.

¹³ Ntem, uwa idiọkn̄kpọ odu ọnọ mme Christian n̄ko, edi edi kiet emi etịmde ọsọn̄ urua akan mme uwa eke idak Ibet ediomi. Paul ekewet ete: “Kpukpru oku [ke idak Ibet ediomi] ẹda ẹnam n̄kpọ ẹnọ Abasi ke usen ke usen, ẹnyụn̄ ẹwak ndiwa orụk uwa kiet eke mîkemeke ndimen mme idiọkn̄kpọ mfep: Edi [Jesus], ke ini Enye ama akawa uwa kiet aban̄a mme idiọkn̄kpọ, osụhọde etetie ke ubọk nnasia Abasi ke nsinsi.” (Mme Hebrew 10:11, 12) Sia mme Christian ke obufa ediomi ẹwụtde mbuọtidem ke uwa Jesus, Jehovah anam ikpe etebe mmọ, ẹnana idiọkn̄kpọ, ntem ẹdude ke idaha ndidi se ẹyetde aran nte nditọ esie eke spirit. (Rome 5:1; 8:33, 34; Mme Hebrew 10:14-18) Ke ini mmọ ẹnamde idiọkn̄kpọ ke ntak unana mfọnmma owo, mmọ ẹkeme ndiben̄e Jehovah efen ọnọ mmimọ, ndien ke isọn̄ uwa Jesus, Jehovah efen ọnọ mmọ. (1 John 2:1, 2) Nte ededi, edieke mmọ ẹmekde usụn̄ n̄koinnam idiọkn̄kpọ, mmọ ẹtaba edinen idaha mmọ ye ifet edidi mme andibuana ke obufa ediomi.—Mme Hebrew 2:2, 3; 6:4-8; 10:26-31.

Akani Ediomi ye Obufa

14. Nso mbobi ke ẹkeyom ke idak Ibet ediomi? ke idak obufa ediomi?

¹⁴ Ẹma ẹsinịm irenowo ke akani ediomi mbobi nte idiọn̄ọ nte ke mmọ ẹkedu ke idak Ibet. (Leviticus 12:2, 3; Galatia 5:3) Ke ini esop Christian ama ọkọtọn̄ọ, ndusụk owo ẹma ẹkere ke mme Christian oro mîdịghe mme Jew ẹkenyene ndina mbobi n̄ko. Edi mme apostle ye mbiowo ke Jerusalem, ke ndausụn̄ Ikọ Abasi ye edisana spirit, ẹma ẹkụt ẹte ke emi ikedịghe se ẹyomde. (Utom 15:1, 5, 28, 29) Isua ifan̄ ke ukperedem, Paul ama ọdọhọ ete: “Idịghe owo emi edide Jew enyọn̄ enyọn̄ edi ata Jew; inyụn̄ idịghe enyọn̄ enyọn̄ mbobi, emi esịnede ke obụkidem, edi ata mbobi: edi ata Jew edi enye emi edide Jew ke esịt esịt; ata mbobi onyụn̄ edi n̄kpọ ọwọn̄esịt, odu ke spirit, idụhe ke item eke ẹwetde.” (Rome 2:28, 29) Ata ata edina mbobi, idem ye mme Jew eke obụk, ikenyeneke ufọn ke n̄kan̄ eke spirit aba ke enyịn Jehovah. Kaban̄a mbon oro ẹdude ke obufa ediomi, ana ẹnịm mbobi ke esịt, idịghe ke ikpọkidem. Ana ẹsion̄o kpukpru n̄kpọ ẹmi mînemke Jehovah esịt m̀mê ẹdehede ke enyịn Jehovah ẹfep ke ekikere, udọn̄, ye uduak mmọ.a Ediwak owo mfịn ẹdi mme odu uwem ntiense ẹban̄a odudu edisana spirit ndikpụhọde mme idaha ekikere ke usụn̄ emi.—1 Corinth 6:9-11; Galatia 5:22-24; Ephesus 4:22-24.

15. Didie ke Israel eke obụk ye Israel Abasi ẹbiet kiet eken kaban̄a itie ukara ndidem?

¹⁵ Ke ndutịm Ibet ediomi, Jehovah ekedi Edidem Israel, ndien nte ini akakade enye ama owụt itie edikara esie ebe ke ndidem ẹdide owo ke Jerusalem. (Isaiah 33:22) Jehovah edi n̄ko Edidem Israel Abasi, Israel eke spirit, ndien ọtọn̄ọde ke 33 E.N., enye akara ebe ke Jesus Christ, emi ọkọbọde “ofụri odudu ke heaven ye ke isọn̄.” (Matthew 28:18; Ephesus 1:19-23; Colossae 1:13, 14) Mfịn, Israel Abasi ọdiọn̄ọ Jesus nte Edidem Obio Ubọn̄ Abasi eke heaven, emi ẹkewụkde ke 1914. Jesus edi ata eti Edidem akan idem nte Hezekiah, Josiah, ye mme anam-akpanikọ ndidem Israel eset eken ẹkedide.—Mme Hebrew 1:8, 9; Ediyarade 11:15.

16. Nso orụk itie oku ke Israel Abasi edi?

¹⁶ Israel ikedịghe obio ubọn̄ ikpọn̄îkpọn̄ edi n̄ko ama enyene itie oku emi ẹkeyetde aran. Ke 33 E.N., Israel Abasi ama ada itie Israel eke obụk onyụn̄ akabade edi “owo” Jehovah, “ntiense” esie. (Isaiah 43:10) Mme ikọ oro Jehovah eketịn̄de ọnọ Israel oro ẹwetde ke Isaiah 43:21 ye Exodus 19:5, 6 ẹma ẹnyene n̄kpọ ndinam tọn̄ọde ke emi ye Israel Abasi eke spirit. Obufa idụt eke spirit Abasi idahaemi ekedi “ubon eke ẹmekde, ẹdi mme oku edidem, ẹdi edisana obio, ẹdi ikọt eke Abasi enịmde ọnọ Idem Esie,” ẹmi ẹkenyenede ‘nditan̄a mme utịbe edinam Jehovah.’ (1 Peter 2:9) Ofụri owo ke Israel Abasi, iren ye iban, ẹnam otu itie oku. (Galatia 3:28, 29) Nte udiana ubak mfri Abraham, mmọ ẹdọhọ idahaemi ẹte: “Mbufo mme idụt, ẹtiene ikọt esie ẹsion̄o n̄kpo idara.” (Deuteronomy 32:43) Ubak Israel eke spirit oro ẹsụk ẹsụhọde ke isọn̄ mfịn ẹnam “asan̄autom emi anamde akpanikọ, onyụn̄ enyenede ọniọn̄.” (Matthew 24:45-47) Ebede ke ndibuana ye mmọ kpọt ke ẹkeme ndinam edisana utuakibuot oro Abasi enyịmede nnọ enye.

Obio Ubọn̄ Abasi —Akpatre Edisu

17. Nso emana ke mbon oro ẹdude ke obufa ediomi ẹmana?

¹⁷ Nditọ Israel ẹmi ẹkemanade ke 1513 M.E.N. ama ekebe ẹkemamana ẹdidụk Ibet ediomi. Mbon oro Jehovah adade edisịn ke obufa ediomi n̄ko ẹma ẹmana—eke mmọ, emana eke spirit. Jesus ama etịn̄ emi ọnọ Pharisee oro Nicodemus ke ini enye ọkọdọhọde ete: “Ke akpanikọ ke ndọhọ fi nte, Edieke owo mîtọn̄ọke ntak imana, enye ikemeke ndikụt Obio Ubọn̄ Abasi.” (John 3:3) Mbet 120 oro ke Pentecost 33 E.N. ẹkedi akpa mme anana-mfọnmma owo ndimana obufa emana emi. Ke ẹtebede ikpe ke idak obufa ediomi, mmọ ẹma ẹbọ edisana spirit nte “akpa ubak udeme” eke udeme ubọn̄ mmọ. (Ephesus 1:14) Mmọ ẹma ‘ẹmana oto spirit’ ndikabade ndi nditọ Abasi ẹmi ẹdade edisịn, emi anamde mmọ ẹdi nditọete Jesus ye “nsan̄a mme ada udeme nnyene ye Christ.” (John 3:6; Rome 8:16, 17) Mmọ ‘nditọn̄ọ ntak mmana’ ama eberede usụn̄ ọnọ mme utịbe utịbe idotenyịn.

18. Ndimana obufa eberede usụn̄ nso utịbe utịbe idotenyịn ọnọ mbon oro ẹdude ke obufa ediomi?

¹⁸ Ke ini anamde n̄kpọ nte esịne-ufọt obufa ediomi oro, Jesus ama anam ediomi efen efen ye mme mbet esie, ọdọhọde ete: “Kpa nte Ete Mi ekenịmde Obio Ubọn̄ ọnọ Mi, kpasụk ntre ke Ami nnyụn̄ nnịm nnọ mbufo.” (Luke 22:29, 30) Ediomi Obio Ubọn̄ emi etịm n̄kpọ obon ọnọ edisu n̄wọrọnda n̄kukụt, ẹkewetde ke Daniel 7:13, 14, 22, 27. Daniel ama okụt nte “Andisọn̄ọ Usen,” Jehovah Abasi, ọnọde “owo eke ebietde eyen owo” itie odudu ukara. Ekem Daniel ama okụt nte “edisana ikọt [ẹdade] ubọn̄.” Jesus edi enye emi “ebietde eyen owo” emi, ke 1914, ọkọbọde Obio Ubọn̄ eke heaven oto Jehovah Abasi. Mme mbet esie ẹmi ẹyetde aran ẹdi “edisana ikọt” oro ẹbuanade ye enye ke Obio Ubọn̄ oro. (1 Thessalonica 2:12) Didie?

19, 20. (a) Kaban̄a mbon oro ẹdude ke obufa ediomi, nso mme akpatre, ubọn̄ ubọn̄ edisu ke un̄wọn̄ọ emi Jehovah akanamde ọnọ Abraham ẹdinyene? (b) Nso mme mbụme efen efen ke oyom ẹkere ẹban̄a?

¹⁹ Ke mmọ ẹma ẹkekpa, ẹnam mbon ẹmi ẹyetde aran mi ukem nte Jesus ẹset ke n̄kpa nte mme edibotn̄kpọ eke spirit ẹmi mîkemeke ndikpa man ẹnam n̄kpọ ye enye nte ndidem ye mme oku ke heaven. (1 Corinth 15:50-53; Ediyarade 20:4, 6) Nso ubọn̄ ubọn̄ idotenyịn! “Mmọ ẹyenyụn̄ ẹda ubọn̄ ke isọn̄,” idịghe ke isọn̄ Canaan kpọt. (Ediyarade 5:10) Nte mmọ ‘ẹyeda enyịnusụn̄ mme asua mmọ ẹnyene’? (Genesis 22:17) Ih, ndien edidi ke usụn̄ oro enyenede iwụk ke mmọ ẹkụtde nsobo idiọk akpara ido ukpono oro, Akwa Babylon, ye ke ini ẹdinamde mbon ẹmi ẹyetde aran mi ẹmi ẹsetde ẹbuana ye Jesus ke ndikara mme idụt ye “esan̄ ukwak” ye ke ndinuak Satan ibuot. Mmọ ke ntem ẹyenyene udeme ke ndisu akpatre ikpehe prọfesi eke Genesis 3:15.—Ediyarade 2:26, 27; 17:14; 18:20, 21; Rome 16:20.

²⁰ Kpa ye oro, nnyịn imekeme ndibụp, Nte ediomi Abraham ye obufa ediomi abuana ukpọn̄ 144,000 ẹmi ẹdide mme anam-akpanikọ kpọt? Baba, ẹyediọn̄ mmọ en̄wen ẹmi mîbuanake ke ediomi emi nnennen nnennen ebe ke mmọ, nte ẹdikụtde ke ibuotikọ emi etienede.

[Mme Ikọ idakisọn̄]

Nte Afo Emeti?

◻ Ini ewe ke ẹkebem iso ẹkụt nte obufa ediomi odude ke edinam?

◻ Nso ke ẹkeyọhọ ebe ke akani ediomi?

◻ Anie akpan akpan edi Mfri Abraham, ndien ke nso ndutịm ke ẹkediọn̄ mme idụt ebe ke Mfri oro?

◻ Kaban̄a 144,000, nso idi akpatre edisu ediomi Abraham ye eke obufa ediomi?

[Mme ndise ke page 15]

Edifen mme idiọkn̄kpọ enen̄ede enyene se ọwọrọde ọnọ mbon oro ẹdude ke obufa ediomi akan nte ọkọwọrọde ọnọ mbon oro ẹkedude ke akani ediomi