Ibịghike Ubọn̄ Ubọn̄ Uwọrọ-ufụn Oyodu Ọnọ Nditọ Abasi
“Ẹkenam ofụri ekondo osụk idem ọnọ ikpîkpu n̄kpọ . . . ye idotenyịn, ete ke ẹyenyan̄a ekondo ke idemesie nde ẹsio ke itieufụn mbiara, ẹsịn ke itie eyenisọn̄ emi enyenede ubọn̄ eke nditọ Abasi.”—ROME 8:20, 21.
1. Didie ke ẹkewụt se uwa Jesus adade aban̄a ke Usen Usio-Isop?
JEHOVAH ọkọnọ ikpọn̄îkpọn̄ edibon Eyen esie nte uwa ufak oro ebererede usụn̄ uwem eke heaven ọnọ owo 144,000 ye idotenyịn nsinsi uwem ke isọn̄ ọnọ ubonowo eken. (1 John 2:1, 2) Nte ẹkewụtde ke ibuotikọ oro ekebemde iso, uwa Jesus kaban̄a mme Christian oro ẹbonde ke spirit edi se ẹkewụtde ke ini akwa oku Israel akawade eyen enan̄ nte uwa idiọkido kaban̄a idemesie, mbonufọk esie, ye esien Levi ke Usen Usio-Isop eke isua ke isua. Kpasụk usen oro, enye ama awa ebot nte uwa idiọkido kaban̄a kpukpru nditọ Israel eken, idem kpa nte uwa Christ edinyenede ufọn ọnọ ofụri ubonowo. Odu uwem ebot ke ndamban̄a usụn̄ ama emen ntan̄ndian idiọkn̄kpọ mme owo eke isua oro ekebede efep, osopde ke wilderness.a—Leviticus 16:7-15, 20-22, 26.
2, 3. Nso ke mme ikọ Paul oro ẹwetde ke Rome 8:20, 21 ẹwọrọ?
2 Ke ama okokụre editịn̄ mban̄a idotenyịn mme owo oro ẹdikabarede idi “nditọ Abasi” eke heaven, apostle Paul ama ọdọhọ ete: “Ofụri ekondo [etie] ke ọkpọsọn̄ udọn̄, ebet ini eke ẹdiyararede nditọ Abasi. Koro ẹkenam ofụri ekondo osụk idem ọnọ ikpîkpu n̄kpọ, itoho ke edinyịme esịt, edi oto ke Enye emi akanamde enye osụk ntre, ye idotenyịn, ete ke ẹyenyan̄a ekondo ke idemesie nde ẹsio ke itie ufụn mbiara, ẹsịn ke itie eyenisọn̄ emi enyenede ubọn̄ eke nditọ Abasi.” (Rome 8:14, 17, 19-21) Nso ke ikọ emi ọwọrọ?
3 Ke ini ẹkebotde akpa ete nnyịn Adam nte mfọnmma owo, enye ekedi “eyen Abasi.” (Luke 3:38) Ke ntak edinam idiọkn̄kpọ, enye ama ‘edidụk ufụn ọnọ mbiara’ onyụn̄ ayak idaha emi ọnọ ekpụk ubonowo. (Rome 5:12) Abasi ama ayak mme owo ẹmana ẹdụk se idide “ikpîkpu” ke uwem ke ntak ndammana unana mfọnmma mmọ, edi enye ama ọnọ idotenyịn ebe ke “mfri,” Jesus Christ. (Genesis 3:15, NW; 22:18; Galatia 3:16) Ediyarade 21:1-4 anyan ubọk owụt ini oro ‘n̄kpa, eseme, ntuan̄a, ye ubiak mîdidụhe aba.’ Sia emi edide un̄wọn̄ọ oro ẹnọde ‘ubonowo,’ enye ọnọ nnyịn nsọn̄ọ nte ke obufa n̄ka eke owo ke isọn̄ ẹmi ẹdidụn̄de ke idak ukara Obio Ubọn̄ ẹyefiak ẹnyene ọyọhọ nsọn̄idem eke ekikere ye ikpọkidem ye nsinsi uwem nte “nditọ Abasi” eke isọn̄. Ke ini Tọsịn Isua Ukara Christ, ẹyenyan̄a mme okop-item owo “ẹsio ke itie ufụn mbiara.” Ke ẹma ẹkenam akpanikọ ẹnọ Jehovah ke ini akpatre udomo, mmọ ẹyebọhọ ndammana idiọkn̄kpọ ye n̄kpa ke nsinsi. (Ediyarade 20:7-9) Mbon oro ẹdude ke isọn̄ adan̄aoro ẹyenyene “itie eyenisọn̄ emi enyenede ubọn̄ eke nditọ Abasi.”
Mmọ ke Ẹdọhọ Ẹte “Di”
4. Nso ke ọwọrọ ‘ndibọ mmọn̄ uwem ke ikpîkpu’?
4 Nso utịbe utịbe idotenyịn ke ẹnịm ubonowo ntem ke iso! Eyịghe idụhe mme Christian oro ẹbonde ke spirit ẹmi ẹsụk ẹdude ke isọn̄ ẹsịnde ifịk ẹda iso ke ndisian mbon en̄wen mban̄a enye! Nte mbon oro ẹdikabarede ẹdi ubak “n̄wanndọ” Eyenerọn̄ oro ẹnọde ubọn̄, kpa Jesus Christ, nsụhọ oro ẹyetde aran ẹbuana ke edisu mme ikọ ntịn̄nnịm ikọ ẹmi: “Spirit ye n̄wanndọ ẹdọhọ ẹte, Di. Owo eke onyụn̄ okopde, yak enye ọdọhọ ete, Di. Owo eke itọn̄ asatde, yak enye edi. Owo eke amade, yak edi edibọ mmọn̄ uwem ke ikpîkpu.” (Ediyarade 21:2, 9; 22:1, 2, 17) Baba, mme ufọn uwa ufak Jesus itreke ye owo 144,000 oro ẹyetde aran. Spirit Abasi ke aka iso anam utom ebe ke otu n̄wanndọ emi odude ke isọn̄ ke ndidọhọ “Di.” Ẹnọ owo ekededi oro okopde emi itọn̄ asatde kaban̄a edinen ido ikot ndidọhọ ete “Di,” enịmde idem ke idaha ndibọ ufọn nto ntatara ndutịm Jehovah kaban̄a edinyan̄a.
5. Mmanie ke Mme Ntiense Jehovah ẹdat esịt ndinyene ke otu mmọ?
5 Mme Ntiense Jehovah ẹnyene mbuọtidem ke ndutịm Abasi kaban̄a edinyan̄a ebe ke Jesus Christ. (Utom 4:12) Mmọ ẹkop inemesịt ndinyene ke otu mmọ mbon esịt akpanikọ oro ẹnyenede udọn̄ ndikpep mban̄a mme uduak Abasi nnyụn̄ nnam uduak esie. Mme Ufọkmbono Obio Ubọn̄ mmọ ẹna in̄wan̄ ẹnọ kpukpru owo oro ẹmade ‘ndidi ndibọ mmọn̄ uwem ke ikpîkpu’ ke “utịt ini” emi.—Daniel 12:4.
Mme Ukpụhọde Ẹnamde Nte Ini Ebede
6. Didie ke spirit Abasi anam utom ke idem mme asan̄autom Jehovah ke nsio nsio ini?
6 Abasi enyene ini emi enịmde ndinam uduak esie, ndien emi otụk mme edinam esie ye mme owo. (Ecclesiastes 3:1; Utom 1:7) Okposụkedi spirit Abasi okodorode mme asan̄autom esie oro ẹkedude mbemiso eyo mme Christian ke idem, owo ikobonke mmọ nte nditọ esie eke spirit. Nte ededi, ọtọn̄ọde ke Jesus, ini Jehovah ama edikem ndida edisana spirit mbon iren ye iban oro ẹyakde idem ẹnọ nnọ inyene akpa eke heaven. Ndien nso kaban̄a eyo nnyịn? Ukem spirit oro ke anam utom ke idem “mme erọn̄ en̄wen” eke Jesus, edi enye idemekede idotenyịn ye udọn̄ uwem eke heaven ke idem mmọ. (John 10:16) Ye nsinsi uwem ke paradise isọn̄ nte idotenyịn emi Abasi ọnọde mmọ, mmọ ke idatesịt ẹnọ nsụhọ ẹmi ẹyetde aran ibetedem ke ndinọ ikọ ntiense ke ufọt ini edikpụhọde nto idiọk akani ererimbot emi mbe ndụk obufa edinen ererimbot Abasi.—2 Peter 3:5-13.
7. Nso utom idọk ke Nditọ Ukpepn̄kpọ Bible ẹkesịn idem, edi nso ke mmọ ẹkediọn̄ọ ẹban̄a paradise?
7 Abasi ọkọtọn̄ọ ‘ndida ediwak nditọ ndụk ubọn̄’ ye edin̄wan̄a edisana spirit nduọk ke Pentecost 33 E.N., ndien enye nte an̄wan̄ade ama enịm ini ndiyọhọ ibat “Israel Abasi” eke spirit edide 144,000. (Mme Hebrew 2:10; Galatia 6:16; Ediyarade 7:1-8) Ọtọn̄ọde ke 1879, ẹma ẹsitịn̄ ẹtụk utom idọk emi abuanade mme Christian oro ẹyetde aran ndien ndien ke magazine emi. Edi Nditọ Ukpepn̄kpọ Bible (ẹkotde Mme Ntiense Jehovah idahaemi) ẹma ẹfiọk n̄ko ẹte ke N̄wed Abasi ọnọ idotenyịn nsinsi uwem ke paradise isọn̄. Ke uwụtn̄kpọ, nsiondi Enyọn̄-Ukpeme (Ikọmbakara) eke July 1883 ọkọdọhọ ete: “Ke Jesus ama okowụk obio ubọn̄ esie, osobo idiọkn̄kpọ, ye ntre ntre eken, isọn̄ emi ayakabade edi paradise, . . . ndien kpukpru se idude ke udi mmọ ẹyewọrọ ẹdidu ke enye. Ndien ebede ke ndisụk ibuot nnọ mme ibet esie mmọ ẹkeme ndidu uwem ke nsinsi ke esịt esie.” Nte ini ekebede, idọk mbon oro ẹyetde aran ama osụhọde, ndien sụn̄sụn̄ ẹma ẹdọk mme owo oro mîkenyeneke idotenyịn eke heaven ẹdidọn̄ ke esop Jehovah. Kan̄a ke emi, Abasi ọnọ mme asan̄autom esie oro ẹyetde aran, mme Christian oro ẹtọn̄ọde ntak ẹmana, n̄wọrọnda ikike.—Daniel 12:3; Philippi 2:15; Ediyarade 14:15, 16.
8. Didie ke ifiọk aban̄ade idotenyịn eke isọn̄ ọkọkọri ke ntọn̄ọ ntọn̄ọ iduọk isua 1930?
8 Ọtọn̄ọde ke 1931 akpan akpan mbon oro ẹnyenede idotenyịn uwem eke isọn̄ ke ẹbuana ye esop Christian. Ke isua oro, Jehovah ama ọnọ nsụhọ mme Christian oro ẹbonde ke spirit ikike ndifiọk nte ke Ezekiel ibuot 9 etịn̄ aban̄a otu eke isọn̄ emi, ẹmi ẹnịmde idiọn̄ọ ẹnọ edibọhọ ndụk obufa ererimbot Abasi. Ke 1932 ẹma ẹsịm ubiere nte ke Jonadab (Jehonadab) nsan̄a Jehu akada aban̄a utọ mbon mbieterọn̄ eke eyomfịn ẹmi. (2 Ndidem 10:15-17) Ke 1934 ẹma ẹnam an̄wan̄a nte ke “mme Jonadab” ẹnyene “ndiyak idem nnọ” Abasi. Ke 1935 ẹma ẹdifiọk “akwa udịmowo,” m̀mê “akwa otuowo”—ẹmi ke mbemiso ẹkekerede ke ẹdi udiana otu eke spirit oro ẹdidide “mme nsan̄a” n̄wanndọ Christ ke heaven—nte mme erọn̄ en̄wen ẹmi ẹnyenede idotenyịn eke isọn̄. (Ediyarade 7:4-15; 21:2, 9; Psalm 45:14, 15) Ndien akpan akpan ọtọn̄ọde ke 1935 mbon oro ẹyetde aran ke ẹda usụn̄ ke ndiyom nti owo ẹmi ẹnyenede udọn̄ ndidu ke nsinsi ke paradise isọn̄.
9. Ke 1935 ama ekebe, ntak emi ndusụk Christian ẹketrede ndidia mme n̄kpọ idiọn̄ọ ke Udia Mbubịteyo Ọbọn̄?
9 Ke 1935 ama ekebe ndusụk Christian oro ẹkesitade uyo ẹnyụn̄ ẹn̄wọn̄de wine ke Udia Mbubịteyo Ọbọn̄ ẹma ẹtre ndidia. Ntak-a? Koro mmọ ẹma ẹdifiọk ẹte ke idotenyịn mmimọ edi eke isọn̄, idịghe eke heaven. N̄wan kiet oro akanade baptism ke 1930 ọkọdọhọ ete: “Okposụkedi ẹkedade [edidia] nte n̄kpọ oro odotde ndinam, akpan akpan ye ifịk ifịk mme asan̄autom uyọhọ ini, akananam n̄kenịmke ke akpanikọ nte ke mmenyene idotenyịn eke heaven. Ekem, ke 1935, ẹma ẹnam an̄wan̄a nnyịn nte ke ẹtan̄ akwa otuowo ye idotenyịn edidu uwem ke nsinsi ke isọn̄ ẹbok. Ediwak nnyịn ima ikop idatesịt ndifiọk nte ke nnyịn ikedi ubak akwa otuowo oro, ndien nnyịn ima itre ndidia mme n̄kpọ idiọn̄ọ.” Idem se isịnede ke mme n̄wed Christian ẹma ẹkpụhọde. Ke adan̄aemi ẹketịmde eke mme isua oro ẹkebemde iso akpan akpan ẹnọ mme anditiene Jesus oro ẹbonde ke spirit, ọtọn̄ọde ke 1935 ka iso Enyọn̄-Ukpeme ye mme n̄wed efen eke “asan̄autom emi anamde akpanikọ” ẹma ẹnọ udia eke spirit oro ekemde ye mme udọn̄ mbon oro ẹyetde aran ye mme nsan̄a mmọ ẹmi ẹnyenede idotenyịn eke isọn̄.—Matthew 24:45-47.
10. Didie ke ẹkeme ndikpụhọ owo oro ẹyetde aran emi mînamke akpanikọ?
10 Yak idọhọ ke owo oro ẹyetde aran etre ndinam akpanikọ. Nte ukpụhọ oyodu? Paul ama owụt emi ke nneme esie aban̄ade ndammana eto olive. (Rome 11:11-32) Edieke oyomde ẹkpụhọ owo oro ẹbonde ke spirit, eyedi Abasi edinọ owo oro mbuọtidem esie edide uwụtn̄kpọ ke edinam edisana utom nnọ enye ke ediwak isua ikot eke heaven.—Men Luke 22:28, 29; 1 Peter 1:6, 7 domo.
Ediwak Ntak Ndiwụt Esịtekọm
11. Inamke n̄kpọ m̀mê nso idi idotenyịn nnyịn, nso ke James 1:17 ọnọ nnyịn nsọn̄ọ aban̄a?
11 Ebiet ekededi oro nnyịn inamde n̄kpọ Jehovah ke edinam akpanikọ, enye oyoyụhọ mme udọn̄ nnyịn ye nti uduak nnyịn. (Psalm 145:16; Luke 1:67-74) Edide nnyịn inyene ata idotenyịn eke heaven m̀mê idotenyịn nnyịn edi eke isọn̄, nnyịn imenyene ediwak nti ntak ndiwụt esịtekọm nnọ Abasi. Enye esiwak ndinam n̄kpọ ke ufọn mbon oro ẹmade enye. Mbet oro James ọkọdọhọ ete ke “kpukpru eti edinọ ye kpukpru enọ eke ẹfọnde ẹma ẹto ke enyọn̄, ẹto ke ubọk Ete mme un̄wana [Jehovah Abasi] ẹsụhọde ẹdi.” (James 1:17) Ẹyak nnyịn itịm ifiọk ndusụk ke otu mme enọ ye edidiọn̄ ẹmi.
12. Ntak emi nnyịn ikemede ndidọhọ ke Jehovah ọnọ kiet kiet ke otu mme anam-akpanikọ asan̄autom esie utịbe utịbe idotenyịn?
12 Jehovah ọnọ mme anam-akpanikọ asan̄autom esie kiet kiet utịbe idotenyịn. Enye okot ndusụk owo ọnọ uwem eke heaven. Ye mme ntiense esie oro ẹkedude mbemiso eyo mme Christian, Jehovah ọnọ mmọ ata eti idotenyịn ediset ke n̄kpa ndụk nsinsi uwem ke isọn̄. Ke uwụtn̄kpọ, Abraham ama enyene idotenyịn ke ediset ke n̄kpa onyụn̄ ebet “Obio eke enyenede nsọn̄ọnda”—Obio Ubọn̄ eke heaven emi ẹdinamde enye eset edidu uwem ke isọn̄. (Mme Hebrew 11:10, 17-19) Ini kiet efen, ke utịt ini emi, Abasi ke ọnọ ediwak miliọn owo idotenyịn nsinsi uwem ke paradise isọn̄. (Luke 23:43; John 17:3) Ke akpanikọ, owo ekededi oro Jehovah ọnọde utọ utịbe idotenyịn oro ekpenyene ndiwụt esịtekọm ntotụn̄ọ ntotụn̄ọ mban̄a enye.
13. Didie ke edisana spirit Abasi anam utom ke idem ikọt esie?
13 Jehovah ọnọ ikọt esie edisana spirit esie nte enọ. Mme Christian oro ẹnọde idotenyịn eke heaven ẹdi se ẹyetde aran ye edisana spirit. (1 John 2:20; 5:1-4, 18) Edi, mme asan̄autom Abasi oro ẹnyenede idotenyịn eke isọn̄ ẹnyene un̄wam ye ndausụn̄ eke spirit. Ke otu mmọ ẹmi ekedi Moses, emi ekenyenede spirit Jehovah, kpa nte irenowo 70 oro ẹkemekde man ẹn̄wam enye. (Numbers 11:24, 25) Ke idak odudu edisana spirit, Bezalel ama anam utom nte ata anamutom usọ ke ebuana ye ataya ke Israel. (Exodus 31:1-11) Spirit Abasi ama odoro Gideon, Jephthah, Samson, David, Elijah, Elisha, ye mbon eken ke idem. Okposụkedi owo mîdidaha mbon eset ẹmi idụk ubọn̄ eke heaven tutu amama, edisana spirit ọkọnọ ndausụn̄ onyụn̄ an̄wam mmọ, kpa nte edide ye mme erọn̄ en̄wen eke Jesus mfịn. Ntre, ndien, edinyene spirit Abasi iwọrọke ite ke nnyịn imenyene ikot eke heaven. Edi, spirit Jehovah ọnọ ndausụn̄, an̄wam nnyịn ndikwọrọ ikọ nnyụn̄ nnam mme utom ẹmi Abasi ọnọde nnyịn, ọnọ nnyịn odudu oro akande ukeme owo, onyụn̄ osion̄o mfri esie ke idem nnyịn edide ima, idatesịt, emem, ime, mfọnido, eti ido, edinam akpanikọ, ifụre ifụre ido, ye mfara ke idem. (John 16:13; Utom 1:8; 2 Corinth 4:7-10; Galatia 5:22, 23) Nte nnyịn ikpowụtke esịtekọm iban̄a enọ mfọnido otode Abasi mi?
14. Didie ke nnyịn ibọ ufọn ito enọ Abasi edide ifiọk ye ọniọn̄?
14 Ifiọk ye ọniọn̄ ẹdi enọ ẹtode Abasi emi nnyịn ikpowụtde esịtekọm iban̄a, edide idotenyịn nnyịn edi eke heaven m̀mê eke isọn̄. Nnennen ifiọk Jehovah an̄wam nnyịn “ndidomo mfiọk se ifọnde ikan” ndinyụn̄ ‘nsan̄a ke ido nte odotde Ọbọn̄ nnem Enye esịt ke kpukpru usụn̄.’ (Philippi 1:9-11; Colossae 1:9, 10) Ọniọn̄ Abasi anam n̄kpọ nte ukpeme ye ndausụn̄ ke uwem. (Mme N̄ke 4:5-7; Ecclesiastes 7:12) Ata ifiọk ye ọniọn̄ ẹkọn̄ọ ke Ikọ Abasi, ndien esisịt ke otu mbon oro ẹyetde aran ẹmi ẹsụhọde ẹsọn̄ọ ẹyịre akpan akpan ke se enye etịn̄de aban̄a idotenyịn mmọ eke heaven. Nte ededi, ima ẹnyenede ẹnọ Ikọ Abasi ye ọyọhọ ifiọk esie idịghe usụn̄ Abasi ndiwụt nte ke ẹnọ nnyịn ikot kaban̄a uwem eke heaven. Irenowo nte Moses ye Daniel ẹma ẹkam ẹwet ubak ikpehe Bible, edi ẹdinam mmọ ẹset ẹdinyene uwem ke isọn̄. Edide idotenyịn nnyịn edi eke heaven m̀mê eke isọn̄, kpukpru nnyịn ibọ udia eke spirit ibe ke “asan̄autom emi anamde akpanikọ, onyụn̄ enyenede ọniọn̄” emi Jehovah ọnọde unyịme. (Matthew 24:45-47) Kpukpru nnyịn iwụt esịtekọm didie ntem iban̄a ifiọk emi inyenede ibe ke emi!
15. Ewe edi kiet ke otu n̄kponn̄kan enọ Abasi, ndien didie ke afo ese enye?
15 Kiet ke otu mme n̄kponn̄kan enọ Abasi edi ima ima ndutịm uwa ufak Jesus, emi ọnọde nnyịn ufọn edide nnyịn inyene idotenyịn eke heaven m̀mê idotenyịn eke isọn̄. Abasi akamama ererimbot ubonowo “tutu Enye osio ikpọn̄îkpọn̄ Eyen emi Enye obonde ọnọ, man owo ekededi eke ọbuọtde idem ye Enye okûtak, edi enyene nsinsi uwem.” (John 3:16) Ndien ima Jesus ama onụk enye “ọnọ uwem Esie ndifak ediwak owo.” (Matthew 20:28) Nte apostle John akanamde an̄wan̄a, Jesus Christ “edi usio-isop mme idiọkn̄kpọ nnyịn [mbon oro ẹyetde aran], inyụn̄ idịghe eke nnyịn ikpọn̄ edi eke ofụri ererimbot nde.” (1 John 2:1, 2) Ntem, kpukpru nnyịn ikpenyene ndiwụt esịtekọm ntotụn̄ọ ntotụn̄ọ mban̄a ima ima ndutịm emi kaban̄a edinyan̄a nnọ nsinsi uwem.b
Nte Afo Oyodu Do?
16. Nso n̄wọrọnda n̄kpọntịbe ke ẹditi ke utịn ama okosụhọde ke April 11, 1998, ndien mmanie ẹkpenyene ndidu do?
16 Esịtekọm kaban̄a ufak emi Abasi ọkọnọde ebe ke Eyen esie ekpenyene ndinụk nnyịn ndidu ke Ufọkmbono Obio Ubọn̄ m̀mê mme ebiet efen ẹmi Mme Ntiense Jehovah ẹdisopde idem ke utịn ama okosụhọde ke April 11, 1998, ndinịm editi n̄kpa Christ. Ke ini enye ọkọtọn̄ọde edinam emi ye mme anam-akpanikọ apostle esie ke akpatre okoneyo eke uwem esie ke isọn̄, Jesus ọkọdọhọ ete: “Ẹnam emi nditi Mi.” (Luke 22:19, 20; Matthew 26:26-30) Esisịt ke otu mbon oro ẹyetde aran ẹmi ẹsụhọde ẹyeta uyo eke leaven mîdụhe, emi adade aban̄a mfọnmma ikpọkidem owo eke Jesus, ye ndat ndat wine oro owo mîbuakke n̄kpọ ndinam ọsọn̄ inua, adade aban̄a iyịp esie oro ẹkeduọkde ke uwa. Mme Christian oro ẹbonde ke spirit kpọt ẹnyene ndidia koro mmọ ikpọn̄ ẹdu ke obufa ediomi ye ke ediomi Obio Ubọn̄ ẹnyụn̄ ẹnyene uyarade edisana spirit Abasi oro eyịghe mîdụhe nte ke eke mmọ edi idotenyịn eke heaven. Ediwak miliọn owo eken ẹdidu nte mme andida nse oro ẹwụtde ukpono ẹmi ẹwụtde esịtekọm kaban̄a ima oro Abasi ye Christ ẹwụtde ke ebuana ye uwa Jesus oro anamde ẹkeme ndinyene nsinsi uwem.—Rome 6:23.
17. Nso ke nnyịn ikpenyene nditi kaban̄a ediyet aran ke spirit?
17 N̄kani ekikere ido ukpono, n̄kpọsọn̄ ntụk ẹdemerede ẹto n̄kpa owo, nsọn̄ọn̄kpọ oro asan̄ade idahaemi ye uwem eke isọn̄, m̀mê ekikere edinyene ndusụk san̄asan̄a edidiọn̄ ẹtode Jehovah ẹkeme ndinam ndusụk owo ẹkere ke ndudue ẹte ke uwem eke heaven enyene mmimọ. Edi kpukpru nnyịn ikpenyene nditi nte ke N̄wed Abasi iwụkke nnyịn ite idia mme n̄kpọ idiọn̄ọ Editi man iwụt esịtekọm oro inyenede kaban̄a uwa ufak Christ. Akan oro, ediyet aran ke spirit “itoho ke owo emi oyomde-yom, inyụn̄ itoho ke owo emi efehede itọk, edi oto Abasi,” Enye emi okobonde Jesus nte Eyen eke spirit emi onyụn̄ adade nditọ 144,000 efen kpọt odụk ubọn̄.—Rome 9:16; Isaiah 64:8.
18. Ye ata ediwak owo oro ẹnamde n̄kpọ Jehovah mfịn, nso mme edidiọn̄ ẹdu ke iso?
18 Nsinsi uwem ke paradise isọn̄ edi idotenyịn oro Abasi ọnọde ata ediwak owo ẹmi ẹnamde n̄kpọ Jehovah ke ukperedem ini emi. (2 Timothy 3:1-5) Ke mîbịghike, mmọ ẹyedara utịbe utịbe paradise emi. Mbọn̄ ẹyese ẹban̄a ndutịm eke isọn̄ adan̄aoro ke idak ukara eke heaven. (Psalm 45:16) Emem emem idaha oyodu ke isọn̄ nte mme andidụn̄ isọn̄ ẹnamde n̄kpọ ẹkekem ye mme ibet Abasi ẹnyụn̄ ẹkpepde ekese n̄kpọ ẹban̄a mme usụn̄ Jehovah. (Isaiah 9:6, 7; Ediyarade 20:12) Ekese utom ẹyedu ndinam, ndibọp mme ufọk nnyụn̄ n̄kara isọn̄. (Isaiah 65:17-25) Ndien kere ban̄a inemesịt eke mme ubon ndifiak ndiana kiet nte mme akpan̄kpa ẹsetde ẹdi uwem! (John 5:28, 29) Ke akpatre udomo ama ekebe, kpukpru mme idiọkowo ẹyebe ẹfep. (Ediyarade 20:7-10) Ke nsinsi ke oro ebede, isọn̄ ediyọhọ ye mfọnmma owo ẹmi ‘ẹnyan̄ade ẹsio ke itie ufụn mbiara, ẹsịn ke itie eyenisọn̄ emi enyenede ubọn̄ eke nditọ Abasi.’
[Mme Ikọ idakisọn̄]
a Se Insight on the Scriptures, Eboho 1, page 225-226.
Didie ke Afo Ọkpọbọrọ?
◻ Nso ke ọwọrọ ‘ndibọ mmọn̄ uwem ke ikpîkpu’?
◻ Edide idotenyịn nnyịn edi eke heaven m̀mê eke isọn̄, nso mme ntak ke nnyịn inyene ndiwụt esịtekọm nnọ Abasi?
◻ Nso edinam eke isua ke isua ke kpukpru nnyịn ikpodụk?
◻ Ye ata ekese ke otu ikọt Jehovah, nso ke ini iso akama?
[Ndise ke page 18]
Ediwak miliọn ẹma ẹtọn̄ọ ‘ndibọ mmọn̄ uwem ke ikpîkpu.’ Nte afo omodu ke otu mmọ?