Mme Ufọkabasi Ẹyarade Idiọkn̄kpọ
“Pope Adaha Ufọkabasi ke Ikpe.” “Ukara Ufịk Ido Ukpono ye Usua Mme Jew—Ufọkabasi ke Eben̄e Idem ọnọ Mea Culpa (Ndinyịme Ndudue) Esie.”a “Ndinyịme Ndudue Kaban̄a Nsobo eke Orụk.” “Mbon Methodist Ẹkpe Mbon India Nsannsan Edem Usoputịn Ubọk.”
NTE afo ama okot mme akpan ibuotikọ ntem? Etie nte mme ufọkabasi ke udomo oro ọkọride-kọri, ke ẹnyịme nduduọhọ ke ẹnyụn̄ ẹkpe ubọk ke se mmọ ẹkenamde ke mme isua ikie ẹmi ẹkebede. Ndutịm usuanetop ke osio mbufa unyịme ndudue pope owụt kpukpru ini.
Ke Ini Pope Eben̄ede Edifen Nnọ
Ke ufọt 1980 ye 1996, John Paul II ‘ama enyịme mme enịm-mbụk idiọkn̄kpọ oro Ufọkabasi akanamde mîdịghe eben̄e edifen nnọ’ ke nsụhọde n̄kaha utịm ike 94, ntre ke etịn̄ n̄kpọ mban̄a Obio Ukara pope oro Luigi Accattoli ọdọhọ ke n̄wed esie oro Quando il papa chiede perdono (Ke Ini Pope Eben̄ede Edifen Nnọ). Nte Accattoli ọdọhọde, “ke Ufọkabasi Catholic, pope ikpọn̄ enyene unen ndinyịme ndudue.” Ndien enye ama anam emi, etịn̄de aban̄a ekese akama-utọk mbụk Catholic—Mme Ekọn̄ Ido Ukpono, mme ekọn̄, edinọ mme ukara ufịk ibetedem, ubahade ke mme ufọkabasi, usua mme Jew, mme Ukara Ufịk Ido Ukpono, ndedịbe n̄ka mbon ibak, ye usua eke orụk. Ke ntọt ọkọnọde ẹsọk mme cardinal ke 1994 (emi ndusụk owo ẹdade nte ata akpan n̄wed otode ọfis pope), John Paul II ama ọnọ ekikere aban̄a “ediyarade ofụri idiọkn̄kpọ oro ẹkenamde ke tọsịn isua.”
Ediwak mme adaiso ẹma ẹtiene uwụtn̄kpọ pope. Ke December 1994 n̄wedmbụk n̄kpọntịbe Italy oro Il Giornale ama ọtọt ete: “Ediwak bishop America ẹma ẹwụt idem ke ekebe ndise ẹnyụn̄ ẹben̄e edifen nnọ an̄wan̄wa.” Kaban̄a nso? Ke ndise mfịna mme oku ẹmi ẹsidan̄de nditọwọn̄ ke usụhọde, adade unan ọsọk ediwak n̄kpri mbon unọmọ. Ke January 1995 n̄wedmbụk n̄kpọntịbe oro La Repubblica ama ọtọt aban̄a “anana-mbiet edinam ke mbụk Ido Ukpono Catholic eyomfịn”—ẹma ẹnam n̄kpọ ẹban̄a mfịna ndopuyo Pope Pius XII ke ebuana ye Nsobo eke orụk. Ke January 1995 ukem n̄wedmbụk n̄kpọntịbe oro ama ọtọt ete ke mme otu mme oku Germany ẹma ẹben̄e edifen nnọ kaban̄a “ediwak idiọkn̄kpọ” mbon Roman Catholic ẹmi ẹkenọde mme ubiatibet Nazi ibetedem. Nsio nsio ufọkabasi Protestant ẹma ẹnyụn̄ ẹduọhọ idemmọ.
Ntak-a?
Bible esịn udọn̄ ọnọ nnyịn ndiben̄e edifen nnọ ke ini nnyịn iduede, ndien ediwak owo ẹtoro mme ufọkabasi ke ini mmọ ẹnyịmede nduduọhọ. (James 5:16) Edi ntak oro mme ufọkabasi ẹnamde emi? Didie ke enye okpotụk usụn̄ nte nnyịn isede mmọ?
[Ikọ idakisọn̄]
a Ikọ Latin adade ọnọ “idiọkn̄kpọ mi,” ubak akam Catholic (confiteor, m̀mê, “mmayarade idiọkn̄kpọ”), emi mme anam akpanikọ ẹsifiakde ẹtịn̄ ikọ emi.