Ndi Akam Fo ‘Ada Nte Incense’?
“Yak akam mi ada ke iso fo nte incense.”—PSALM 141:2.
1, 2. Edifọp incense akada aban̄a nso?
JEHOVAH ABASI okowụk prọfet esie Moses ete anam edisana incense man ẹda ẹnam n̄kpọ ke ataya utuakibuot Israel. Usụn̄ oro Abasi ọkọdọhọde ẹnam okoyom ẹbuak orụk ufuọn̄n̄kpọ inan̄ ọtọkiet. (Exodus 30:34-38) Enye ama enen̄ede enem utebe.
2 Ibet ediomi oro ẹkedade idụt Israel ẹsịn ama oyom ẹfọp incense ke usen ke usen. (Exodus 30:7, 8) Ndi edikama incense ama enyene akpan n̄kpọ oro ọkọwọrọde? Ih, koro andiwet psalm ọkọkwọ ete: “Yak akam mi ada ke iso fo [Jehovah Abasi] nte incense; yak umenede ubọk mi etie nte uwa mbubịteyo.” (Psalm 141:2) Ke n̄wed Ediyarade, apostle John etịn̄ aban̄a mbon oro ẹkande ebekpo Abasi eke heaven ẹkụk nte ẹkamade mme eso o-gold ẹmi ẹyọhọde ye incense. Uwetn̄kpọ eke odudu spirit oro ọdọhọ, ‘Incense emi ẹdi mme akam nti ikọt Abasi.’ (Ediyarade 5:8) Ntre, ndien, ndifọp incense oro ọfuọn̄de akada aban̄a mme akam oro ẹnyịmede ẹmi mme asan̄autom Jehovah ẹbọn̄de uwemeyo ye okoneyo.—1 Thessalonica 3:10; Mme Hebrew 5:7.
3. Nso ikpan̄wam nnyịn ndinam ‘akam nnyịn ada nte incense ke iso Abasi’?
3 Edieke anade Abasi eyere mme akam nnyịn, ana nnyịn ibọn̄ akam inọ enye ke enyịn̄ Jesus Christ. (John 16:23, 24) Edi didie ke nnyịn ikeme ndifori mme uduot akam nnyịn? Nte ededi, ndikere mban̄a ndusụk uwụtn̄kpọ N̄wed Abasi ekpenyene ndin̄wam nnyịn ndinam mme akam nnyịn ẹda nte incense ke iso Jehovah.—Mme N̄ke 15:8.
Bọn̄ Akam ke Mbuọtidem
4. Didie ke mbuọtidem enyene ebuana ye akam oro ẹnyịmede?
4 Edieke anade mme akam nnyịn ẹdọk ẹbịne Abasi nte edinem utebe incense, ana nnyịn ibọn̄ akam ke mbuọtidem. (Mme Hebrew 11:6) Ke ini mbiowo Christian ẹkụtde owo oro ọdọn̄ọde ke n̄kan̄ eke spirit emi enyịmede un̄wam N̄wed Abasi oro mmọ ẹnọde, “akam mbuọtidem [mmọ] ayanyan̄a enye emi ọdọn̄ọde.” (James 5:15) Akam oro ẹbọn̄de ke mbuọtidem enem Ete nnyịn eke heaven esịt, ntre ke onyụn̄ edi ye edikpep Ikọ Abasi ke akam. Andiwet psalm ama owụt eti edu ke ini enye ọkọkwọde ete: “Nyonyụn̄ mmenede ubọk mi nnọ mbet fo ẹmi mmade; nnyụn̄ ntie n̄kere mme ewụhọ fo. Kpep mi mfọn ibuot ye ifiọk: koro mmenịm mbet fo ke akpanikọ.” (Psalm 119:48, 66) Ẹyak nnyịn ‘imenede ubọk nnyịn’ ke akam nsụhọdeidem inyụn̄ inyene mbuọtidem ebe ke ndinịm mme ewụhọ Abasi.
5. Nso ke nnyịn ikpanam edieke nnyịn mînyeneke ọniọn̄?
5 Yak idọhọ ke nnyịn inyeneke ọniọn̄ oro oyomde man iyọ idomo. Ekeme ndidi nnyịn itịmke ifiọk m̀mê akpan ntịn̄nnịm ikọ kiet ke Bible ke osu idahaemi. Utu ke ndiyak emi anam idem emem nnyịn ke n̄kan̄ eke spirit, ẹyak nnyịn ibọn̄ akam iyom ọniọn̄. (Galatia 5:7, 8; James 1:5-8) Edi akpanikọ, nnyịn ikemeke ndidori enyịn Abasi ndibọrọ nnyịn ke n̄wọrọnda usụn̄. Oyom nnyịn iwụt nte ke akam nnyịn edi eke ofụri esịt ebe ke ndinam se enye oyomde kpukpru ikọt esie ẹnam. Oyom nnyịn isịn idem ke ukpepn̄kpọ N̄wed Abasi oro ọbọpde mbuọtidem ye un̄wam mme n̄wed oro ẹnọde ebe ke “asan̄autom emi anamde akpanikọ, onyụn̄ enyenede ọniọn̄.” (Matthew 24:45-47; Joshua 1:7, 8) Oyom nnyịn ikọri ke ifiọk n̄ko ebe ke ndibuana ke mme mbono esop ikọt Abasi kpukpru ini.—Mme Hebrew 10:24, 25.
6. (a) Nso ke kpukpru nnyịn ikpọdiọn̄ọ iban̄a eyo nnyịn ye mme ntịn̄nnịm ikọ Bible ndisu? (b) Ke adianade ye edibọn̄ akam mban̄a edinam enyịn̄ Jehovah asana, nso ke nnyịn ikpanam?
6 Mfịn, ndusụk Christian ke ẹbịne mme udọn̄ ye mme ubọkọkọ oro ẹnọde ekikere nte ke mmọ ifiọkke ite ke nnyịn imaka anyan “ke utịt ini” idahaemi. (Daniel 12:4) Mme ekemmọ andinịm ke akpanikọ ẹkeme ndibọn̄ akam nte odotde ẹte yak utọ mbon oro ẹfiak ẹdemede m̀mê ẹsọn̄ọ mbuọtidem mmọ ke uyarade N̄wed Abasi nte ke edidu Christ ama ọtọn̄ọ ke 1914 ke ini Jehovah okodoride enye ke ebekpo nte Edidem eke heaven ye nte ke enye ada ubọn̄ ke otu mme asua esie. (Psalm 110:1, 2; Matthew 24:3) Kpukpru nnyịn ikpenyene ndifiọk nte ke mme n̄kpọntịbe oro ẹkebemde iso ẹtịn̄ utọ nte edisobo nsunsu ido ukpono—“Akwa Babylon”—Satan ndida ekọn̄ Gog eke Magog ntiene ikọt Jehovah, ye Abasi Andikara kpukpru n̄kpọ ndinyan̄a mmọ ke ekọn̄ Armageddon ekeme nditọn̄ọ ke mbuari ke usụn̄ oro akpade owo idem, ndien ekeme nditịbe ke ata ekpri ibio ini. (Ediyarade 16:14, 16; 18:1-5; Ezekiel 38:18-23) Ntre ẹyak nnyịn ibọn̄ akam iben̄e un̄wam Abasi man idu ke edidemede ke n̄kan̄ eke spirit. Kpukpru nnyịn ikpakam ibọn̄ akam ifịk ifịk ite ẹnam enyịn̄ Jehovah asana, Obio Ubọn̄ esie edi, ẹnyụn̄ ẹnam uduak esie ke isọn̄ nte ẹnamde ke heaven. Ih, akpakam nnyịn ika iso inyene mbuọtidem inyụn̄ inọ uyarade nte ke mme akam nnyịn ẹdi eke ofụri esịt. (Matthew 6:9, 10) Ih, kpukpru mbon oro ẹmade Jehovah ẹkpekam ẹbem iso ẹyom Obio Ubọn̄ ye edinen ido esie ẹnyụn̄ ẹnyene n̄kponn̄kan udeme nte ẹkekeme ke ndikwọrọ eti mbụk mbemiso utịt edi.—Matthew 6:33; 24:14.
Toro Nyụn̄ Kọm Jehovah
7. Nso itụk fi kaban̄a akam David oro ẹwetde ubak ubak ke 1 Chronicles 29:10-13?
7 Akpan usụn̄ kiet ‘ndinam akam nnyịn ada nte incense’ edi nditoro nnyụn̄ n̄kọm Abasi ke esịt akpanikọ. Edidem David ama ọbọn̄ utọ akam oro ke ini enye ye mbon Israel ẹketịpde etịbe ndida mbọp temple Jehovah. David ọkọbọn̄ akam ete: “Ẹkọm fi, Jehovah Abasi Israel ete nnyịn, ke nsinsi-nsinsi. O Jehovah, ubom, ye odudu, ye ubọn̄, ye akakan, ye uten̄e ẹdi okwommọ: koro kpukpru n̄kpọ ke enyọn̄ ye ke isọn̄ ẹmenyene fi; O Jehovah, itie edidem edi okwo, afo onyụn̄ okon̄ nte etubom kpukpru. Inyene ye ukpono ẹto fi ke iso, afo onyụn̄ edi andikara kpukpru: odudu ye uko ẹnyụn̄ ẹdu fi ke ubọk; onyụn̄ enyene fi ndinam kpukpru ẹkon̄ ẹnyụn̄ ẹsọn̄. Nnyịn imọkọm fi, ndien, O Abasi nnyịn, inyụn̄ itoro enyịn̄ ubọn̄ fo.”—1 Chronicles 29:10-13.
8. (a) Mme ikọ itoro ewe ke Psalm 148 esịm 150 ẹnen̄ede ẹtụk fi esịt? (b) Edieke nnyịn inyenede mme ekikere oro ẹtịn̄de ke Psalm 27:4, nso ke nnyịn idinam?
8 Nso ndinem ikọ itoro ye ekọm ke ẹmi ẹdi ntem! Mme akam nnyịn ẹkeme nditre nditie udọn udọn ntre, edi ẹkeme ndidi eke ofụri esịt ntre. N̄wed Psalm ọyọhọ ye mme akam ekọm ye itoro. Ẹkụt mme ndinem ikọ itoro ke Psalm 148 esịm 150. Ẹtịn̄ esịtekọm ẹnyenede ẹnọ Abasi ke ediwak psalm. “Mmeben̄e Jehovah n̄kpọ kiet,” ntem ke David ọkọkwọ. “Ndien nyoyom enye; nte ndụn̄ ke ufọk Jehovah ke ofụri uwem mi, man nse uyai Jehovah, nnyụn̄ ntịm mbụp ke temple esie.” (Psalm 27:4) Ẹyak nnyịn inam n̄kpọ ke n̄kemuyo ye mme utọ akam oro ebe ke ndibuana ifịk ifịk ke kpukpru edinam otu mbon esop Jehovah. (Psalm 26:12) Ndinam emi ye nditie n̄kere Ikọ Abasi ke usen ke usen ẹyenọ nnyịn ediwak ntak ndisan̄a n̄kpere Jehovah ye itoro ye ekọm esịt akpanikọ.
Yom Un̄wam Jehovah ke Nsụhọdeidem
9. Didie ke Edidem Asa ọkọbọn̄ akam, ndien ye nso utịp?
9 Edieke nnyịn inamde n̄kpọ inọ Jehovah ke ofụri esịt nte Mme Ntiense esie, nnyịn imekeme ndinyene mbuọtidem nte ke enye okop mme akam oro ibọn̄de iyom un̄wam. (Isaiah 43:10-12) Kere ban̄a Edidem Asa eke Judah. Akpa isua 10 ke isua 41 emi enye akadade ubọn̄ (977-937 M.E.N.) ẹkeyọhọ ye emem. Ekem Zerah owo Ethiopia ama asan̄a ye mbonekọn̄ miliọn kiet ada ekọn̄ odụk Judah. Okposụkedi ẹkenen̄erede ẹwak ẹkan enye, Asa ye irenowo esie ẹma ẹwọrọ ẹkesobo ye mbonekọn̄ oro. Nte ededi, mbemiso ekọn̄ oro, Asa ama ọbọn̄ akam ifịk ifịk. Enye ama enyịme ke Jehovah enyene odudu ndinyan̄a. Ke eben̄ede un̄wam, edidem oro ọkọdọhọ ete: “Nnyịn ibọbuọt idem nnyịn ye afo, inyụn̄ ida enyịn̄ fo ika ndin̄wana ye akwa otu emi. O Jehovah, afo edi Abasi nnyịn; kûyak owo ọsọn̄ akan fi.” Ẹma ẹnyene ọyọhọ edikan nte Jehovah akanyan̄ade Judah ke ntak akwa enyịn̄ esie. (2 Chronicles 14:1-15) Edide Abasi ososio nnyịn ke idomo m̀mê ọsọsọn̄ọ nnyịn idem ndiyọ enye, eyịghe idụhe nte ke enye okop eben̄e nnyịn kaban̄a un̄wam esie.
10. Ke ini nnyịn mîfiọkke nte ikpesede iban̄a akpan afanikọn̄, didie ke akam Edidem Jehoshaphat ekeme ndidi n̄kpọ un̄wam?
10 Edieke nnyịn mîfiọkke nte ikpesede iban̄a akpan afanikọn̄, nnyịn imekeme ndinyene mbuọtidem nte ke Jehovah oyokop eben̄e nnyịn kaban̄a un̄wam. Ẹma ẹwụt emi ke eyo Edidem Jehoshaphat eke Judah, emi isua 25 oro enye akakarade ọkọtọn̄ọde ke 936 M.E.N. Ke ini ntan̄ndian udịmekọn̄ Moab, Ammon, ye ikpehe obot Seir ẹkedịghede Judah, Jehoshaphat ama eben̄e ete: “O Abasi nnyịn, nte afo udukpehe ikpe ye mmọ? koro nnyịn mînyeneke odudu ke iso akwa otu owo ẹmi ẹdide ndin̄wana ekọn̄ ye nnyịn? nnyịn inyụn̄ ifiọkke se nnyịn idinamde: edi nnyịn idori enyịn ye afo.” Jehovah ama eyere akam nsụhọdeidem oro, an̄wanade ekọn̄ ọnọ Judah ebe ke ndisịn ndutịme ke udịmekọn̄ mme asua tutu mmọ ẹwot kiet eken. Nte utịp, mme idụt oro ẹkekande ẹkụk ẹma ẹkop ndịk, ndien emem ama odu ke Judah. (2 Chronicles 20:1-30) Ke ini nnyịn inanade ọniọn̄ oro oyomde man ise iban̄a afanikọn̄, ukem nte Jehoshaphat nnyịn imekeme ndibọn̄ akam ite: ‘Nnyịn ifiọkke se nnyịn idinamde: edi nnyịn idori enyịn ye afo, Jehovah.’ Edisana spirit ekeme ndinam nnyịn iti itie N̄wed Abasi oro iyomde man ikọk mfịna oro, mîdịghe Abasi ekeme ndin̄wam nnyịn ke usụn̄ oro ayan̄ade ifiọk owo.—Rome 8:26, 27.
11. Nso ke nnyịn ikeme ndikpep mban̄a akam nto mme edinam Nehemiah ke ebuana ye ibibene Jerusalem?
11 Ekeme ndiyom nnyịn ikọbọ ke ndibọn̄ akam nyom un̄wam Abasi. Nehemiah ama ofụhọ, atua, etre udia, onyụn̄ ọbọn̄ akam ke ediwak usen aban̄a n̄wụre ibibene Jerusalem ye akwa nnanenyịn oro ekesịmde mme andidụn̄ Judah. (Nehemiah 1:1-11) Nte an̄wan̄ade, akam esie ama ọdọk ebịne Abasi nte ufuọn̄ incense. Usen kiet Edidem Artaxerxes eke Persia ama obụp Nehemiah oro okofụhọde ete: “Nso ke afo oyom?” Nehemiah ọtọt ete: “Ndien n̄kpe Abasi enyọn̄ ubọk.” Ẹma ẹbọrọ ibio ibio akam oro ẹkebọn̄de ke ndopuyo do, koro ẹma ẹnyịme Nehemiah anam udọn̄ esịt esie ke ndika Jerusalem man ọkọbọp n̄wụre ibibene esie.—Nehemiah 2:1-8.
Yak Jesus Ekpep Fi nte Ọkpọbọn̄de Akam
12. Ke mme ikọ idemfo, didie ke afo ekeme nditịn̄ mme akpan n̄kpọ ẹdude ke akam uwụtn̄kpọ Jesus ibio ibio?
12 Ke otu kpukpru akam oro ẹwetde ke N̄wed Abasi, enye oro enen̄erede esịne item edi akam uwụtn̄kpọ oro Jesus Christ ọkọnọde nte ufuọn̄ incense. Gospel Luke ọdọhọ ete: “Kiet ke otu mbet [Jesus] ọdọhọ Enye ete, Ọbọn̄, kpep nnyịn ndibọn̄ akam, kpa nte John onyụn̄ ekpepde mbet esie. Edi Enye ọdọhọ mmọ ete, Ke ini mbufo ẹbọn̄de akam, ẹdọhọ ẹte, Ete, yak ikpono enyịn̄ Fo. Yak Ubọn̄ Fo edi. Nọ nnyịn udia eke ekemde nnyịn ke usen ke usen. Nyụn̄ dahado ke mme idiọk-n̄kpọ nnyịn, koro nnyịn ke idem nnyịn idahadedo inọ kpukpru owo ẹmi ẹkamade nnyịn isọn. Kûnyụn̄ uda nnyịn usịn ke idomo.” (Luke 11:1-4; Matthew 6:9-13) Ẹyak nnyịn ikere iban̄a akam emi, emi owo mîkewetke man ẹkot ke ibuot edi man etie nte ndausụn̄.
13. Didie ke afo ekeme ndinam an̄wan̄a se mme ikọ oro, “Ete, yak ikpono enyịn̄ Fo,” ẹwọrọde?
13 “Ete, yak ikpono enyịn̄ Fo.” Ndikot Jehovah Ete edi san̄asan̄a ifet oro mme asan̄autom esie oro ẹyakde idem ẹnọ ẹnyenede. Ukem nte nditọ ẹsisọpde ndida mfịna ekededi mbịne ete emi okopde mbọm, nnyịn ikpenyene ndida ini mbọn̄ akam oro enyenede uku ye uten̄e nnọ Abasi kpukpru ini. (Psalm 103:13, 14) Mme akam nnyịn ẹkpenyene ndiwụt udọn̄ nnyịn kaban̄a edinam enyịn̄ Jehovah asana koro ọdọn̄ nnyịn ndikụt ẹnamde enye asana ọbọhọ kpukpru esuene oro ẹsuenede enye. Ih, nnyịn imoyom ẹnịm enyịn̄ Jehovah san̄asan̄a ẹnyụn̄ ẹnịm enye ke edisana.—Psalm 5:11; 63:3, 4; 148:12, 13; Ezekiel 38:23.
14. Nso ke ndibọn̄ akam ndọhọ, “Yak Ubọn̄ Fo edi,” ọwọrọ?
14 “Yak Ubọn̄ Fo edi.” Obio Ubọn̄ oro edi ukara Jehovah emi ẹwụtde ebe ke ukara Messiah eke heaven ke ubọk Eyen esie ye “edisana ikọt” oro ẹbuanade ye Jesus. (Daniel 7:13, 14, 18, 27; Ediyarade 20:6) Ibịghike enye ‘eyedi’ ndisobo kpukpru mme andibiọn̄ọ itie edikara Abasi ẹmi ẹdude ke isọn̄, ọkpọride mmọ efep ke isọn̄. (Daniel 2:44) Adan̄aoro ẹyenam uduak Jehovah ke isọn̄, kpa nte ẹnamde ke heaven. (Matthew 6:10) Nso idatesịt ke oro edida ntem ọsọk kpukpru edibotn̄kpọ oro ẹnamde n̄kpọ ke edinam akpanikọ ẹnọ Andikara Ekondo!
15. Ndiben̄e Jehovah “udia eke ekemde nnyịn ke usen ke usen” owụt nso?
15 “Nọ nnyịn udia eke ekemde nnyịn ke usen ke usen.” Ndiben̄e Jehovah udia “ke usen ke usen” owụt ete ke nnyịn iben̄eke akpakịp n̄kpọ edi iben̄e sụk mme n̄kpọ oro iyomde ke usen ke usen. Okposụkedi nnyịn iberide edem ke Abasi ndinọ nnyịn n̄kpọ, nnyịn n̄ko imanam utom inyụn̄ ida mme nnennen n̄kpọ ekededi oro ẹdude ẹnọ nnyịn inam n̄kpọ man inyene udia ye mme akpan n̄kpọ eken. (2 Thessalonica 3:7-10) Edi akpanikọ, nnyịn ikpenyene ndikọm Andinọ nnyịn n̄kpọ emi odude ke heaven koro ima, ọniọn̄, ye odudu esie ẹnam inyene mme n̄kpọ ẹmi.—Utom 14:15-17.
16. Didie ke nnyịn ikeme ndinyene edidahado nto Abasi?
16 “Dahado ke mme idiọk-n̄kpọ nnyịn, koro nnyịn ke idem nnyịn idahadedo inọ kpukpru owo ẹmi ẹkamade nnyịn isọn.” Sia nnyịn idide mme anana mfọnmma ye mme anamidiọk, nnyịn ikemeke ndida ekekem ọyọhọ ọyọhọ ye mme mfọnmma idaha Jehovah. Ntem, oyom nnyịn ibọn̄ akam iben̄e edidahado esie ke isọn̄ uwa ufak Jesus. Edi edieke nnyịn iyomde ‘Enye Emi Okopde akam’ ada ufọn uwa oro anam n̄kpọ aban̄a idiọkn̄kpọ nnyịn, ana nnyịn ikabade esịt inyụn̄ inyịme ndibọ ntụnọ ekededi oro enye ọnọde nnyịn. (Psalm 65:2; Rome 5:8; 6:23; Mme Hebrew 12:4-11) Akan oro, nnyịn ikeme ndidori enyịn Abasi ndidahado nnọ nnyịn n̄kukụre ke nnyịn ima ‘ikadahado inọ mmọ ẹmi ẹkamade nnyịn isọn,’ mbon oro ẹduede nnyịn.—Matthew 6:12, 14, 15.
17. Nso ke mme ikọ oro, “Kûnyụn̄ uda nnyịn usịn ke idomo,” ẹwọrọ?
17 “Kûnyụn̄ uda nnyịn usịn ke idomo.” Ndusụk ini Bible esidọhọ ke edi Jehovah anam mme n̄kpọ ke ini enye n̄kukụre ayakde-yak mmọ ẹtịbe. (Ruth 1:20, 21) Abasi idomoke nnyịn man inam idiọkn̄kpọ. (James 1:13) Mme idomo ndinam idiọkn̄kpọ ẹtọn̄ọ ẹto Devil, ikpọkidem idiọkn̄kpọ nnyịn, ye ererimbot emi. Satan edi Andidomo emi an̄wanade ndibian̄a nnyịn inam idiọkn̄kpọ idian Abasi. (Matthew 4:3; 1 Thessalonica 3:5) Ke ini nnyịn inamde eben̄e oro, “Kûnyụn̄ uda nnyịn usịn ke idomo,” nnyịn iben̄e Abasi ite enye okûyak nnyịn iduọ ke ini ẹdomode nnyịn ndisọn̄ ibuot ye enye. Enye ekeme ndida nnyịn usụn̄ man nnyịn ikûyak idem inọ Satan, kpa “andidiọk,” enye okûnyụn̄ akan nnyịn ubọk.—Matthew 6:13; 1 Corinth 10:13.
Nam N̄kpọ ke N̄kemuyo ye Mme Akam Fo
18. Didie ke nnyịn ikeme ndinam n̄kpọ ke n̄kemuyo ye mme akam nnyịn kaban̄a inem inem ndọ ye uwem ubon?
18 Akam uwụtn̄kpọ Jesus esịne mme akpan n̄kpọ, edi nnyịn imekeme ndibọn̄ akam mban̄a n̄kpọ ekededi. Ke uwụtn̄kpọ, nnyịn imekeme ndibọn̄ akam mban̄a udọn̄ nnyịn ndinyene inem inem ndọ. Man imụm edisana idaha ikama tutu idọ ndọ, nnyịn imekeme ndibọn̄ akam mben̄e mfara ke idem. Do ndien ẹyak nnyịn inam n̄kpọ ke n̄kemuyo ye mme akam nnyịn ebe ke ndifep mme oburobụt n̄wed ye unọ idem inemesịt. Ẹyak nnyịn n̄ko isọn̄ọ ibiere ‘ndidọ owo Abasi ikpọn̄-ikpọn̄.’ (1 Corinth 7:39; Deuteronomy 7:3, 4) Ke ima ikọdọ ndọ, oyoyom nnyịn inam n̄kpọ ke n̄kemuyo ye mme akam nnyịn ndinyene inemesịt ebe ke ndida mme item Abasi nsịn ke edinam. Ndien edieke nnyịn inyenede nditọ, ndibọn̄ akam mben̄e nte mmọ ẹkpedi mme anam-akpanikọ asan̄autom Jehovah ikemke. Ana nnyịn inam kpukpru se ikemede ndidọdiọn̄ nsiak akpanikọ Abasi nsịn mmọ ke esịt ebe ke ukpepn̄kpọ Bible ye edidụk mme mbono esop Christian ofụri ini ye mmọ.—Deuteronomy 6:5-9; 31:12; Mme N̄ke 22:6.
19. Nso ke nnyịn ikpanam edieke nnyịn ibọn̄de akam iban̄a utom ukwọrọikọ nnyịn?
19 Ndi nnyịn ibọn̄ akam iben̄e edidiọn̄ ke utom ukwọrọikọ? Do ẹyak nnyịn inam n̄kpọ ke n̄kemuyo ye mme utọ akam oro ebe ke ndinyene ọyọhọ ebuana ke utom ukwọrọikọ Obio Ubọn̄. Edieke nnyịn ibọn̄de akam iben̄e mme ifet ndin̄wam mbon en̄wen ẹdụk usụn̄ nsinsi uwem, oyom nnyịn inyene eti n̄wetnnịm n̄kpọ kaban̄a mbon oro ẹnyenede udọn̄ inyụn̄ iben̄e idem ndisịn edinịm mme ukpepn̄kpọ Bible ke ndutịm nnyịn. Nso edieke ọdọn̄de nnyịn ndidụk utom ukwọrọikọ uyọhọ ini nte asiakusụn̄? Do ẹyak nnyịn inam n̄kpọ ke n̄kemuyo ye mme akam nnyịn ebe ke ndifori utom ukwọrọikọ nnyịn onyụn̄ ebe ke ndibuana ke utom ukwọrọikọ ye mme asiakusụn̄. Ndinam mme utọ n̄kpọ oro oyowụt nte ke nnyịn ke inam n̄kpọ ke n̄kemuyo ye mme akam nnyịn.
20. Nso ke ibuotikọ oro etienede edineme aban̄a?
20 Edieke nnyịn inamde n̄kpọ Jehovah ke edinam akpanikọ, nnyịn imekeme ndinyene mbuọtidem nte ke enye eyeyere mme akam nnyịn oro ẹdude ke n̄kemuyo ye uduak esie. (1 John 5:14, 15) Ke akpanikọ, imekpep mme akpan n̄kpọ oro ẹnyenede ufọn ito edidụn̄ọde ndusụk akam oro ẹwetde ke Bible. Ibuotikọ nnyịn oro etienede eyeneme aban̄a mme ndausụn̄ en̄wen ke N̄wed Abasi oro ẹnọde kaban̄a mbon oro ẹyomde ‘akam mmọ ada nte incense ke iso Jehovah.’
Didie ke Afo Ọkpọbọrọ?
◻ Ntak emi nnyịn ikpọbọn̄de mme akam ke mbuọtidem?
◻ Nso udeme ke itoro ye ekọm ẹkpenyene ke mme akam nnyịn?
◻ Ntak emi nnyịn ke mbuọtidem ikpoyomde un̄wam Jehovah ke akam?
◻ Nso idi ndusụk akpan n̄kpọ ke akam uwụtn̄kpọ oro?
◻ Didie ke nnyịn ikeme ndinam n̄kpọ ke n̄kemuyo ye mme akam nnyịn?
[Ndise ke page 12]
Ukem nte Edidem Jehoshaphat, ekeme ndiyom nnyịn ibọn̄ akam ndusụk ini ite: ‘Nnyịn ifiọkke se nnyịn idinamde: edi nnyịn idori enyịn ye afo, Jehovah’
[Ndise ke page 13]
Nte afo emesibọn̄ akam ke n̄kemuyo ye akam uwụtn̄kpọ Jesus?