Ndịben̄kpọ Aban̄ade Unana Nsọn̄idem
EKPRI OWMADJI ỌDỌN̄Ọ UTỌRỌ. Hawa, eka esie, okop editịmede esịt aban̄a mmọn̄uwem ndiwọrọ enye ke idem; enye ama okop ke eyen eyeneka ete esie ke obio-in̄wan̄ ama ataba eyen esie ke ukem usụn̄ oro. Ekaete Owmadji, ekaebe Hawa, oyom ndimen Owmadji n̄ka mbịne abia ifọt ekpụk oro. “Idiọk spirit anam eyen emi ọdọn̄ọ,” ntem ke enye ọdọhọ. “Ama esịn ndinọ enye n̄kpọ n̄kpemeidem ọkọn̄ọ, ndien idahaemi mme mfịna ẹmetọn̄ọ!”
IDAHA emi edi ọsọ n̄kpọ ke ediwak ikpehe ke ererimbot. Ediwak miliọn owo ke mme itie ikie ẹnịm ke akpanikọ ẹte ke mme idiọk spirit ẹdi ndedịbe ntak udọn̄ọ. Ndi emi edi akpanikọ?
Ndisio Ndịben̄kpọ Ndi
Ekeme ndidi afo ke idemfo unịmke ute ke mme spirit oro enyịn mîkwe ẹdi ntak udọn̄ọ. Ke akpanikọ, afo emekeme ndiyịk ntak emi owo ekededi ekpekerede ntre, koro ntaifiọk ẹmewụt ẹte ke mme ifọt udọn̄ọ ye n̄kpri unam udọn̄ọ ẹdi ntak ata ediwak udọn̄ọ. Nte ededi, ti ete ke ini kiet ko ubonowo ikọfiọkke iban̄a n̄kpri unam ẹmi. Ibọhọke ke Antonie van Leeuwenhoek ama okosio ukwak use n̄kpri n̄kpọ edi, ke ọyọhọ isua ikie 17, ke mme owo ẹkekeme ndikụt ata n̄kpri n̄kpọ. Idem kpa ye oro, ekedi ke ntak se Louis Pasteur okosiode edi ke ọyọhọ isua ikie 19 ke ifiọk ntaifiọk ọkọtọn̄ọ ndifiọk ebuana emi odude ke ufọt ifọt udọn̄ọ ye udọn̄ọ.
Sia owo mîkọfiọkke mme ntak udọn̄ọ ke ata ekese ini ke mbụk owo, ediwak nsunsu ekikere ẹma ẹwọn̄ọ ẹdi, esịnede ekikere oro nte ke mme idiọk spirit ẹdi ntak kpukpru udọn̄ọ. The New Encyclopædia Britannica ọnọ ekikere aban̄a usụn̄ kiet oro emi ekekemede nditọn̄ọ. Enye ọdọhọ ete ke mme akpa ọkọkudọn̄ọ ẹkedomo ndida nsio nsio orụk orụn̄, ikọn̄, ye n̄kpọ en̄wen ekededi oro okodụkde mmọ ubọk n̄kọk udọn̄ọ. Ndusụk ini, ndusụk ẹma ẹsifọn. Ekem ọkọkudọn̄ọ ayadian ekese edinam nsunsu ekikere ke ibọk usọbọ oro, ẹmi ẹkenamde owo okûdiọn̄ọ se idide ata usọbọ. Ntem ke ọkọkudọn̄ọ akanam mme owo ẹka iso ẹyom un̄wam esie. Ke usụn̄ emi, ndịben̄kpọ ama akan ibọk okụk, ndien ẹma ẹsịn udọn̄ ẹnọ mme owo ndidori enyịn ke se ikande ukeme owo kaban̄a un̄wam.
Ẹsụk ẹkakama mme usụn̄ ukọkudọn̄ọ eset emi ke ediwak idụt. Ediwak owo ẹdọhọ ẹte ke spirit mme ete ete oro ẹkekpan̄ade ẹdi ntak udọn̄ọ. Mbon en̄wen ẹdọhọ ẹte ke Abasi esinam nnyịn idọn̄ọ ye nte ke udọn̄ọ edi ufen mme idiọkn̄kpọ nnyịn. Idem ke ini mbon oro ẹnyenede ifiọk ẹdiọn̄ọde ke udọn̄ọ oto n̄kpri unam udọn̄ọ, mmọ ẹkeme ndisụk n̄kop ndịk mban̄a odudu eke akande ukeme owo.
Mbiaidiọn̄ ye mme ọkọkudọn̄ọ ke ido eset ẹda ndịk emi ẹwo mme owo. Nso, ndien, ke nnyịn ikpenịm ke akpanikọ? Ndi ufọn odu ndiberi edem ke mme spirit kaban̄a usọbọ? Nso ke Bible etịn̄?