Mme Christian Ekpemerọn̄, “Ẹnyene In̄wan̄-In̄wan̄ Esịt”!

“JEHOVAH edi andibọk [“Ekpemerọn̄,” NW] mi, ndinanake n̄kpọ.” David eketịn̄ mme ikọ oro ndiwụt ọyọhọ mbuọtidem emi enye ekenyenede ke Abasi esie. Ke nditịn̄ ke usụn̄ifiọk eke spirit, Jehovah ama ada enye usụn̄ aka “awawa mbiet” ye “mmọn̄ nduọk-odudu,” etemede enye “usụn̄ eti ido.” Ke ini mme andibiọn̄ọ ẹkekande enye ẹkụk, David ama ọbọ un̄wam ye nsịnudọn̄, onụkde enye ọdọhọ Jehovah ete: “Ndifeheke idiọk: koro afo odude ye ami.” Sia ama ekenyene utọ Akakan Ekpemerọn̄ oro, David ama ebiere ‘ndidụn̄ ke ufọk Jehovah ke nsinsi.’—Psalm 23:1-6.

Ikpọn̄îkpọn̄ edibon Eyen Abasi ama okụt ima ima ukpeme Jehovah n̄ko, ndien enye ama owụt mbiet ukpeme emi ke mfọnmma usụn̄ ke mme edinam esie ye mme mbet esie ke ekpri ini oro enye okodude ke isọn̄. N̄wed Abasi ke ntre etịn̄ aban̄a enye nte “eti ekpeme-erọn̄,” “akwa Ekpeme-erọn̄,” ye “Akwa Andikpemerọn̄.”—John 10:11; Mme Hebrew 13:20; 1 Peter 5:2-4.

Jehovah ye Jesus Christ ke ẹkpeme mbon oro ẹmade mmọ. Ẹwụt ndusụk utom mmọ nte mme ekpemerọn̄ ke ima ima ndutịm eke mme ekpemerọn̄ ke esop. Paul eketịn̄ aban̄a mme utọ ekpemerọn̄ oro ke ini enye ọkọdọhọde ete: “Ẹtịm ẹse idem mbufo, ye ofụri otu erọn̄, emi Edisana Spirit ekenịmde mbufo ke mme andikpeme mmọ, ete ẹbọk mbon ufọk Abasi, emi Enye ekedepde ke iyịp [Eyen] Esie.”—Utom 20:28.

Ndikpeme otuerọn̄ nte ekemde ye uwụtn̄kpọ emi Jehovah ye Christ Jesus ẹnịmde idịghe mmemmem utom, edi enye edi ata akpan n̄kpọ idahaemi akan nte akanam edide. Kere ban̄a se ibede Mme Ntiense miliọn kiet oro ẹnade baptism ke isua ita ẹmi ẹkebede! Utọ mbufa owo oro inyeneke ọyọhọ ifiọk eke spirit oro ẹsinyenede ẹto ediwak isua utom. N̄ko, kere ban̄a Mme Ntiense oro ẹsụk ẹdide nditọwọn̄ m̀mê mme uyen. Mmọ iyomke ntịn̄enyịn ito mme ete ye eka mmọ kpọt edi ẹyom n̄ko ẹto mme ekpemerọn̄ ke esop.

Ke akpanikọ, kpukpru Christian ẹsisobo mme mfịghe, esịnede mfịghe ubọkn̄ka. Ana kpukpru owo ẹn̄wana ẹbiọn̄ọ ọkpọsọn̄ udọn̄ nditiene ebeubọk ediyụhọ udọn̄ idemowo eke ererimbot. Ke ndusụk idụt, mme asuanetop Obio Ubọn̄ ẹkeme ndikop mmemidem ke ntak oro owo mînamke n̄kpọ iban̄a etop mmọ. Ediwak asuanetop ẹnyene ọkpọsọn̄ mfịna unana nsọn̄idem. Ekeme ndidi mfịna okụk anam mbon efen ikemeke ndibem iso nyom Obio Ubọn̄. Ke akpanikọ, kpukpru nnyịn—esịnede mbon oro ẹma ẹkebịghi ke akpanikọ—imoyom inyụn̄ idot ndibọ un̄wam nto mme ima ima ekpemerọn̄.

Nnennen Uduak

Ẹma ẹnọ mme Christian akpa isua ikie item ẹte: “Ẹnyene in̄wan̄-in̄wan̄ esịt”! (2 Corinth 6:11-13) Mbiowo Christian ẹyenam ọfọn nditiene item emi ke ndise mban̄a mme utom ubọkerọn̄ mmọ. Didie ke mmọ ẹkeme ndinam ntre? Ndien nso kaban̄a mme asan̄autom unamutom, ẹmi ediwak ẹdude ke udịm ndikabade ndi mme ekpemerọn̄?

Edieke anade mbiowo Christian ẹdi edidiọn̄ ẹnọ mme erọn̄, idịghe sụk ekikere ubiom mbiomo okponụk mmọ. Ẹnọ mmọ item ẹte: “Ẹkpeme udịm-erọn̄ Abasi emi odude ke otu mbufo; ẹse ẹban̄a mmọ ke ima esịt nte Abasi oyomde, ẹkûyak etie nte ẹnyenyịk mbufo; ẹkûnam emi ẹban̄a mbukpo udori, edi ẹnam ke edinyịme esịt.” (1 Peter 5:2, sịghisịghi ubọkn̄wed edi eke nnyịn.) Ke ntre utom ubọkerọn̄ oro enyenede uforo abuana ima esịt ye edinyịme esịt ndinam utom nnọ mbon efen. (John 21:15-17) Enye ọwọrọ ndikụt se mme erọn̄ ẹyomde nnyụn̄ nnam n̄kpọ usọp usọp mban̄a. Enye ọwọrọ ndiwụt nti edu Christian ẹmi ẹdiọn̄ọde nte mbun̄wụm spirit Abasi ke adan̄aemi ẹnamde n̄kpọ ye mbon en̄wen.—Galatia 5:22, 23.

Ndusụk ini utom ubọkerọn̄ esibuana edika n̄kese nditọete ke ufọk mmọ.a Edi mme ekpemerọn̄ ẹmi ‘ẹnyenede in̄wan̄în̄wan̄ esịt’ ẹsiwa idemmọ. Oro edi, mmọ ẹsinam se ikande edika utom ubọkerọn̄ ke ini ke ini. Mmọ ẹsida kpukpru ifet ndibọk mbon efen ẹmi ẹdude ke otuerọn̄.

Ndinọ Mbon Efen Ukpep Man Ẹkabade Ẹdi Mme Ekpemerọn̄

Eyenete eren ekededi, inamke n̄kpọ m̀mê edi isua ifan̄ ke emana, emi “anyanarede ebịne itieutom esenyịn . . . oyom eti utom.” (1 Timothy 3:1, NW) Ediwak asan̄autom unamutom ẹmenyịme ndinyanade mbịne mme udiana ifetutom. Ntem, mbiowo ẹsikop idatesịt ndin̄wam iren ẹmi ẹnyenede edinyịme esịt mi ndinam akpan usio-ukot emi ke ‘ndinyanade mbịne itieutom esenyịn.’ Emi ọwọrọ ndikpep mmọ ẹdi mme ekpemerọn̄ oro ẹnyenede uforo.

Ke ntak oro esop Christian eke Jehovah ọsọn̄ọde eyịre ke n̄kokon̄ idaha eke Abasi, mme nsunsu ekpemerọn̄ nte mbon oro ẹketịn̄de ẹban̄a ke Ezekiel 34:2-6 inamke enye emem. Jehovah ekese mmọ ẹmi nte mbukpo owo ndien enye ama enen. Utu ke ndibọk otuerọn̄, mmọ ẹkebọk idemmọ. Mmọ ẹma ẹkpu ndikọk mme erọn̄ oro ẹkedọn̄ọde, ndisọn̄ọ mbon oro idem ẹkememde, ndibọp mbon oro ẹkebụn̄ọde, m̀mê ndifiak ntan̄ mbon oro ẹkesuanade m̀mê ẹkesopde ndi. Ke ẹnamde n̄kpọ nte mme ekpe utu ke nte mme ekpemerọn̄, mmọ ẹma ẹfịk mme erọn̄. Mme erọn̄ oro owo mîkọnọhọ ntịn̄enyịn ẹma ẹsuana, ẹyo ndien owo ndomokiet ikekereke iban̄a mmọ.—Jeremiah 23:1, 2; Nahum 3:18; Matthew 9:36.

Ke mîbietke mme ekpemerọn̄ oro mîkanamke akpanikọ, mme Christian ekpemerọn̄ ẹtiene uwụtn̄kpọ Jehovah. Mmọ ẹn̄wam ndida mme erọn̄ usụn̄ n̄ka “awawa mbiet” ye “mmọn̄ nduọk-odudu.” Mmọ ẹdomo nditeme mme erọn̄ “usụn̄ eti ido” ebe ke ndinam Ikọ Jehovah an̄wan̄a mmọ mfọn mfọn nnyụn̄ n̄n̄wam mmọ ẹda enye ẹsịn ke edinam ke uwem mmọ. Mmọ ẹkeme ndinam emi uforo uforo koro mmọ “[ẹmade] ndikpep owo n̄kpọ.”—1 Timothy 3:2.

Mbiowo ẹsinọ ekese ukpep mmọ ke mbot utịn̄ikọ ke mme mbono esop. Nte ededi, mbiowo ẹsinọ owo ọkpọkpọ ukpep n̄ko. Edi akpanikọ, ndusụk owo ẹsinam ọfọn akan ke ini ẹnọde owo ọkpọkpọ ukpep, ke adan̄aemi mbon efen ẹnyenede enọ edinọ utịn̄ikọ. Edi owo ndinyene esisịt ukeme ke ikpehe unọ ukpep kiet inamke owo okûdot ndidi andikpep. Mbiowo ẹsida kpukpru ifet oro ẹbererede ẹnọ mmọ, esịnede utom ubọkerọn̄, ndinọ ukpep. Ẹsinam ndusụk utom ubọkerọn̄ nnennen, ke uwụtn̄kpọ, edika n̄kese oro ẹkediomide-diomi. Edi ẹkeme ndinam ekese utom ubọkerọn̄ n̄ko ke ido nneme, emi n̄ko esinyene akwa ufọn.

Ẹdi Mme Ekpemerọn̄ ye Mme Andikpep Kpukpru Ini

Oyom abiaibọk enyene ifiọk ye mbufiọk man ekeme ndinam utom esie. Edi mbon udọn̄ọ esie ẹsikop inemesịt ke ini enye owụtde mmọ mfọnido, mbọm, edikere mban̄a, ye udọn̄ esịt akpanikọ. Ana mme edu ẹmi ẹdi ubak uwem esie. Kpasụk ntre ana mme ukem edu ẹmi ẹkabade ẹdi ubak uwem eti andikpep ye ekpemerọn̄, ubak uwem esie ofụri usen. Ata andikpep oyodu ke mben̄eidem ndinọ mbon oro ẹdude ye enye ukpep ini ekededi ẹyomde. Mme N̄ke 15:23 ọdọhọ ete: “Ikọ ke ekem ini nsifọn ntem”! “Ekem ini” oro ekeme ndidi ke ini enye etịn̄de ikọ ke mbot utịn̄ikọ, ke ini enye ọkwọrọde ikọ to ke ufọk sịm ufọk, mîdịghe ke ini enye enyenede nneme ke Ufọkmbono Obio Ubọn̄ m̀mê ke urụk ukopikọ. Kpasụk ntre, eti ekpemerọn̄ esidomo ndiwụt nti edu edikere mban̄a kpukpru ini, idịghe ke ini enye anamde utom ubọkerọn̄ kpọt. Sia ‘enyenede in̄wan̄în̄wan̄ esịt,’ enye ayada kpukpru ifet ndibọk mme erọn̄, ọnọde mmọ ukpeme oro mmọ ẹyomde ke nnennen ini. Emi edi se inamde mme erọn̄ ẹma enye.—Mark 10:43.

Wolfgang, edide ebiowo idahaemi, eti ufan ufan edidi emi asan̄autom unamutom kiet ye n̄wan esie ẹkedide ẹdise ubon esie. Enye ọdọhọ ete: “Nditọ nnyịn ẹma ẹnen̄ede ẹma ntịn̄enyịn emi ẹkenọde mmọ ye inem inem ebuana emi nnyịn ikenyenede. Mmọ ke ẹsụk ẹsitetịn̄ ẹban̄a enye tutu emi.” Ih, asan̄autom unamutom emi ama owụt ke imekere iban̄a; enye ama “enyene in̄wan̄-in̄wan̄ esịt.”

Ifet efen ‘ndinyene in̄wan̄în̄wan̄ esịt’ edi ke ndiwaha nse mbon udọn̄ọ, ndinọ ibio ibio leta nsịnudọn̄ ẹsọk mmọ, m̀mê ndikot mmọ ke urụk ukopikọ—n̄kpọ ekededi ndinam mmọ ẹfiọk ke afo emekere aban̄a! Nọ mmọ un̄wam ke ini ẹyomde. Edieke mmọ ẹyomde nditịn̄ ikọ, nọ ọyọhọ n̄kpan̄utọn̄. Neme ban̄a mme in̄wan̄în̄wan̄, ye mme inem inem edinam ukara Abasi ke esop n̄kann̄kụk ye ebiet en̄wen. N̄wam mmọ ẹwụk ekikere ke ubọn̄ ubọn̄ ini iso oro ẹnịmde ẹnọ mbon oro ẹmade Jehovah.—2 Corinth 4:16-18.

Ke Adianade ye Utom Ubọkerọn̄

Ke inyenede uduak utom ubọkerọn̄ ke ekikere, ana in̄wan̄în̄wan̄ nte ke ndika utom ubọkerọn̄ oro ẹkediomide-diomi ke ufọk nditọete, okposụkedi edide akpan n̄kpọ, edi sụk ubak se utom ubọkerọn̄ abuanade. Ima ima ekpemerọn̄ “enyene in̄wan̄-in̄wan̄ esịt” ebe ke ndidi se ẹkemede ndisan̄a n̄kpere ke kpukpru idaha ye ini. Ufiop ufiop itie ebuana emi enye enyenede ye nditọete esie ọsọn̄ọ ọnọ mmọ nte ke iyomke mmimọ ifehe idiọk ndomokiet ke ini afanikọn̄, ẹfiọkde ẹte ke ima ima eyenete mmimọ, Christian ekpemerọn̄, ekere aban̄a mmimọ.—Psalm 23:4.

Ih, kpukpru mbufo Christian ekpemerọn̄ “ẹnyene in̄wan̄-in̄wan̄ esịt.” Ẹnyene ima ofụri esịt ẹnọ nditọete mbufo—ẹsịn udọn̄ ẹnọ mmọ, ẹnọ mmọ nduọkodudu, ẹnam mmọ ẹkọri ke n̄kan̄ eke spirit ke kpukpru usụn̄ ẹmi mbufo ẹkemede. Ẹn̄wam mmọ ẹsọn̄ọ ẹda ke mbuọtidem. (Colossae 1:23) Sia mmọ ẹnyenede mme Christian ekpemerọn̄ ẹmi ‘ẹnyenede in̄wan̄în̄wan̄ esịt,’ mme erọn̄ idinanake n̄kpọ. Mmọ ẹyebiere, nte David ekebierede, ndidụn̄ ke ufọk Jehovah ke nsinsi. (Psalm 23:1, 6) Nso ke ima ima ekpemerọn̄ okpoyom akan oro?

[Mme Ikọ idakisọn̄]

[Ekebe ke page 30]

Mme Christian Ekpemerọn̄

• Ẹnam utom ifịk ifịk ye ke ima esịt

• Ẹbọk ẹnyụn̄ ẹkpeme otuerọn̄

• Ẹn̄wam mbon efen ẹnyanade ẹbịne ndidi mme ekpemerọn̄

• Ẹka ẹkese mbon udọn̄ọ ẹnyụn̄ ẹse ẹban̄a mmọ

• Ẹdu ke edidemede kpukpru ini ndin̄wam nditọete mmọ

[Mme ndise ke page 31]

Edide ke utom an̄wautom, ke mbono esop, m̀mê ke mme ufan ufan edinam, mbiowo ẹdi mme ekpemerọn̄ kpukpru ini