Nte Mme Christian Ekpemerọn̄ Ẹnamde N̄kpọ Ẹnọ Fi

KE EDIWAK obio edi mmemmem n̄kpọ ndikụt nte mme ekpemerọn̄ ẹsede otuerọn̄ enyịn. Mmọ ẹda usụn̄, ẹkpeme, ẹnyụn̄ ẹnọ mme erọn̄ udia. Emi edi n̄kpọ udọn̄ ọnọ mbiowo Christian, sia utom mmọ esịnede utom ubọkerọn̄. Ke akpanikọ, edi mbiomo mmọ ‘ndibọk mbon esop Abasi’ nnyụn̄ ‘ntịm nse ofụri otuerọn̄.’—Utom 20:28.

Edieke afo edide andibuana ke esop Christian, didie ke mme ekpemerọn̄ eke spirit ẹkeme ndinam n̄kpọ nnọ fi? Ndien didie ke afo akpanam n̄kpọ aban̄a ukeme oro mmọ ẹsịnde ke ufọn fo? Ntak emi esop oyomde un̄wam mmọ?

Ẹkpeme Ẹbiọn̄ọ Nso?

Ke eset mme ekpe ye ndiọi unam eken ẹma ẹsisịn otuerọn̄ ke itiendịk ẹnyụn̄ ẹmụm erọn̄ eke asan̄ade ikpọn̄ ẹta. Mme ekpemerọn̄ ẹkenyene ndinọ ukpeme. (1 Samuel 17:34, 35) Ọfọn, Satan kpa Devil “oyoyo nte lion eke okụnide, oyom se editade.” (1 Peter 5:8) Enye ke iyatesịt in̄wanake ekọn̄ ye ofụri esop Jehovah eke isọn̄ kpọt edi n̄ko ye asan̄autom Abasi kiet kiet. Nso idi uduak Satan? Enye oyom ndinam idem emem ikọt Jehovah nnyụn̄ n̄kam mbiọn̄ọ mmọ ‘ndinịm item Abasi’ ye edinam ‘utom editie ntiense nnọ Jesus.’—Ediyarade 12:17.

Jehovah ama obiom mme ekpemerọn̄ eke ukara Israel eset ikpe unana edinọ ntịn̄enyịn koro erọn̄ esie ẹma ẹkabade ẹdi “udia kpukpru mme unam ikọt.” (Ezekiel 34:8) Nte ededi, mbiowo Christian ẹnyene udọn̄ ofụri esịt ndikpeme mmọ oro ẹdude ke esop man ẹkûtaba owo ndomokiet ebe ke unana edinọ ntịn̄enyịn m̀mê ke ntak odudu Satan, eke ererimbot, m̀mê mbon nsọn̄ibuot ẹdide “mme idiọk unam.” (Utom 20:29, 30) Didie ke mme ekpemerọn̄ ẹn̄wam kpukpru mme andibuana ke otuerọn̄ ẹfara ke idem ẹnyụn̄ ẹdu ke ukpeme? Usụn̄ kiet edi ke ndinọ mme utịn̄ikọ N̄wed Abasi oro ẹtịmde idem mfọn mfọn ke mbot utịn̄ikọ Ufọkmbono Obio Ubọn̄. Efen edi ke mme in̄wan̄în̄wan̄ nneme oro ẹbọpde-bọp mbemiso ye ke mme mbonoesop ẹsuanade. Adianade do eti usụn̄ efen edi mmọ ke idemmọ ndika n̄kese “mme erọn̄” ke ufọk. (Men Psalm 95:7, NW, domo.) Edi nso idi utom ubọkerọn̄? Didie ke ẹkpenam utọ edika n̄kese oro? Ndien mmanie ke ẹkpeka ẹkese?

Nso Idi Utom Ubọkerọn̄?

Utom ubọkerọn̄ idịghe ikpîkpu ufan ufan edika n̄kese owo emi ẹnemede se mîdịghe mme akpan n̄kpọ. Ebiowo kiet ọkọdọhọ ete: “Ata ediwak mme asuanetop ẹsinen̄ede ẹma ndikot itien̄wed Abasi m̀mê ndineme mban̄a owo kiet ke Bible. Nte ededi, ebiowo idimenke kpukpru ikọ itịn̄. Asuanetop Obio Ubọn̄ oro ẹkade ẹkese nte ido edide esikop inem editịn̄ mme ekikere esie ke Bible, ndien ndinam emi ọsọn̄ọ mbuọtidem esie. Ebiowo ekeme ndikama magazine Enyọn̄-Ukpeme m̀mê Awake! man ekpeneme ibuotikọ oro ọbọpde-bọp. Eyedi nneme eke spirit emi edi se inamde utom ubọkerọn̄ okpụhọde ọkpọn̄ ufan ufan edika n̄kese owo.”

Ebiowo efen oro enyenede ifiọkutom ọkọdọhọ ete: “Mbemiso edika n̄kese oro, ebiowo ada ini etie ekere aban̄a asuanetop emi enye oyomde ndika n̄kese. Nso ikeme ndisọn̄ọ asuanetop emi idem? Itoro ofụri esịt edi akpan ubak utom ubọkerọn̄, koro enye ọsọn̄ọde owo idem ndiyọ.” Ih, utom ubọkerọn̄ akan ikpîkpu ufan ufan edika n̄kese owo emi owo ekededi ke esop ekemede ndinam.

Ntak Emi Ekpemerọn̄ Edide Edise Fi?

Ke ini ebiowo akade ufọk owo, enye etịm idem ndisịn udọn̄ nnọ ekemmọ mme andinịm ke akpanikọ nnyụn̄ n̄n̄wam mmọ ẹsọn̄ọ ẹda ke mbuọtidem. (Rome 1:11) Ntre ke ini ebiowo kiet m̀mê iba ẹyomde ndidi ndise fi, didie ke afo esinam n̄kpọ? Esenyịn kiet oro asan̄ade-san̄a ọkọdọhọ ete: “Edieke ẹsinamde utom ubọkerọn̄ n̄kukụre ke ini n̄kpọ mîtịmke isan̄a ọfọn, nte owo edinamde n̄kpọ ke akpa iban̄a edika n̄kese oro ẹdiomide ekeme ndidi, ‘Nso ke nnyụn̄ nnam ndue?’” Mme ima ima ekpemerọn̄ eke spirit ẹkpebe Jehovah, emi ekekerede aban̄a andiwet psalm onyụn̄ ‘edemerede ukpọn̄ esie,’ kpukpru ini akpan akpan ke mme ini nnanenyịn ye akpan udọn̄.—Psalm 23:1-4.

Uduak utom ubọkerọn̄ edi ‘ndisọn̄ọ owo idem, idịghe ndisua nnọ.’ (2 Corinth 13:10) Mme ikọ uwụt esịtekọm mban̄a ediyọ, ifịk, ye utom edinam akpanikọ owo oro ẹkade ẹkese edi se inen̄erede inọ nsịnudọn̄. Ebiowo kiet ọkọdọhọ ete: “Ke ini ẹkade utom ubọkerọn̄, ifọnke ndinam ẹkere ke owo oro edi ye uduak ediyarade ye edineme mme mfịna. Nte ededi, asuanetop ke idemesie ekeme ndiyom ndineme ndusụk akpan mfịna. Ndien edieke erọn̄ ọsọkde-sọk isan̄ m̀mê odu nsannsan ọkpọn̄ mmọ eken ke otuerọn̄, oyom ebiowo anam n̄kpọ ndin̄wam.”

Mme Christian ekpemerọn̄ nte eyịghe mîdụhe ẹyenọ owo ekededi emi ebietde mmọ oro ẹtịn̄de ẹban̄a ke mme ikọ ẹmi san̄asan̄a ntịn̄enyịn: “[Ami Jehovah] nyeyom se isopde, nnyụn̄ nda se ẹkebịnde ẹfep mfiak ndi, nnyụn̄ mbọp se ibụn̄ọde, nnyụn̄ nsọn̄ se idem ememde enye.” (Ezekiel 34:16) Ih, ekeme ndiyom ẹyom erọn̄, ẹfiak ẹda ẹdi, ẹbọp unan, m̀mê ẹsọn̄ọ idem. Mme ekpemerọn̄ Israel ẹma ẹfụmi mme mbiomo ẹmi. Ndinam utọ utom oro oyom ete ekpemerọn̄ asan̄a ekpere erọn̄ kiet onyụn̄ ese n̄kpọ aban̄a mme udọn̄ esie. Emi akpan akpan ekpenyene ndidi se inamde utom ubọkerọn̄ kiet kiet edi isio isio mfịn.

Erọn̄ Oro Ẹkopde Nsọn̄idem Ẹyom Ukpeme

Nte nnyịn ikpenyene ndibiere nte ke mme ekpemerọn̄ eke spirit eyomfịn inyeneke ndinọ san̄asan̄a ntịn̄enyịn ke idem erọn̄ oro ẹkopde nsọn̄idem? Ọfọn, ke ini ataata erọn̄ odụkde mfịna, emem utom ndin̄wam enye edieke enye enyenede mbuọtidem ke idem ekpemerọn̄. N̄wed kiet ọdọhọ ete ke “erọn̄ ke ndammana usụn̄ ẹsifefehe mme owo, ndien ndinam mmọ ẹnyene mbuọtidem ke idem owo isimemke utom.” Ke otu mme n̄kpọ eken, ukem n̄wed oro ọnọ ekikere aban̄a akpan ndausụn̄ emi kaban̄a edinam erọn̄ enyene mbuọtidem ke idem owo: “Tịn̄ ikọ nọ mme unam ẹmi kpukpru ini. Mmọ ẹyemehe ye uyo, emi ọnọde mmọ nsọn̄ọ. Ka kese mme erọn̄ ke in̄wan̄ kpukpru ini.”—Alles für das Schaf. Handbuch für die artgerechte Haltung (Ndinam Kpukpru N̄kpọ nnọ Erọn̄. N̄wed ke Nte Ẹkemede Ndikpeme Mmọ Nte Ọfọnde).

Oyom ẹnyene ọkpọkpọ ebuana ke ntre edieke anade itie ebuana oro eberide edem odu ke ufọt ekpemerọn̄ ye mme erọn̄. Ukem oro ke edi ke esop Christian. Ebiowo kiet ọkọdọhọ ete: “Ndidi se ẹdiọn̄ọde ke esop nte ebiowo oro esikade ekese mme erọn̄ kpukpru ini esinam edi mmemmem n̄kpọ ndika n̄kese owo oro enyenede mme mfịna.” Ntem, mme ekpemerọn̄ eke spirit ikpenyeneke ndidomo ndibọk nnyụn̄ nse mban̄a mme erọn̄ ke Ufọkmbono Obio Ubọn̄ kpọt. Adan̄a nte mme idaha ẹyakde, mbiowo ẹkpenyene ndidiọn̄ọ mme erọn̄ ebe ke ndinam utom ubọkerọn̄ ke ufọk mmọ. Christian kiet eti ete ke ini oro ẹkemekde imọ ebiowo obufa obufa, esenyịn oro etiede ibuot ama ọnọ imọ ikot ke urụk ukopikọ ete imọ ika ikese inyụn̄ idọn̄ eyenete oro akatabade eyenan̄wan esie ke enyene-ndịk mbabuat n̄kpọntịbe esịt. Ebiowo oro onyịme ete: “N̄kofụhọ didie ntem, koro akananam mmen̄kekaha n̄kese eyenete emi n̄konyụn̄ n̄kam mfiọkke ebiet emi enye odụn̄de! Ekedi n̄kpọ un̄wam ke ini ebiowo kiet oro ọkọride osịm ọyọhọ idaha okonyịmede ndisan̄a ye ami.” Ih, mbiowo ẹn̄wam kiet eken ke utom ubọkerọn̄.

Ke nditịm idem nnọ ye ke ndika utom ubọkerọn̄, ẹkeme ndidian ebiowo asan̄a ye asan̄autom unamutom emi anyanarede ebịne “eti utom” esenyịn. (1 Timothy 3:1, 13) Asan̄autom unamutom ediwụt esịtekọm didie ntem ndikụt nte ebiowo anamde n̄kpọ ọnọ mme erọn̄ ke utom ubọkerọn̄! Mbiowo ye mme asan̄autom unamutom ke ntem ẹtotịm ẹkpere kpukpru owo ke esop idem, ẹsọn̄ọde mbọbọ ima ye edidianakiet Christian.—Colossae 3:14.

Ndidiomi Ini nnọ Utom Ubọkerọn̄

Ke ini otu mbiowo kiet akayakde utom ubọkerọn̄ ọnọ mme ada Ukpepn̄kpọ N̄wedesop, ẹma ẹkese kpukpru mme asuanetop ke ndusụk otu ke ufan̄ ọfiọn̄ itiokiet, ke adan̄aemi owo mîkakaha ikese ndomokiet ke mme otu eken. Emi ama onụk ebiowo kiet ndidọhọ ete: “Etie nte ke ndusụk mbiowo ẹsinam usio-ukot ẹnyụn̄ ẹnam ekese utom ubọkerọn̄, edi mmọ eken ẹyom nsịnudọn̄ ekemmọ mbiowo ndinam ntre.” Ntre ndusụk otu mbiowo ẹnam ndutịm ẹnọ mme ekpemerọn̄ ndika n̄kese kpukpru mme asuanetop ke udomo ini oro ẹnịmde.

Nte ededi, ebiowo m̀mê owo efen ekededi ekeme ndika n̄kese owo ke esop ye unana edibet ẹnam san̄asan̄a ndutịm. Mbemiso anamde utom ubọkerọn̄, ebiowo kiet esinọ ikot ke urụk ukopikọ onyụn̄ ọdọhọ ete, “Nsika n̄kese ubon kiet kpukpru ọfiọn̄. Nte mmekeme ndidi ndise fi ke hour kiet m̀mê akande oro ke ini ntem ọfiọn̄ efen? Ini ewe ke emi edifọn ye afo?”

Mme Edidiọn̄ Utom Ubọkerọn̄

Nte mme mfịghe ẹtode idiọk editịm n̄kpọ emi ẹkade iso ndisọn̄ ubọk, edika n̄kese oro ọnọde nsịnudọn̄ emi mme ekpemerọn̄ oro ẹnyenede mbufiọk ẹnamde ototịm enyene ufọn. Ke ini ẹsịnde udọn̄ ẹnọ ẹnyụn̄ ẹn̄wamde kpukpru owo ke otuerọn̄ ebe ke utom ubọkerọn̄, erọn̄ kiet kiet enyene ifụre.

Kaban̄a esop oro mme ekpemerọn̄ ẹkekade ẹkese kpukpru mme asuanetop Obio Ubọn̄ kpukpru ini, ẹma ẹtọt ẹte: “Mme asuanetop ẹma ẹdinyene ata in̄wan̄în̄wan̄ ekikere ẹban̄a utom ubọkerọn̄. Ekedi ata ọsọ n̄kpọ asuanetop ndika mbịne kiet ke otu mbiowo n̄kobụp ini emi enye edifiakde edi, sia andibụp mbụme emi ama okop inem nneme oro ọbọpde-bọp isan̄ oko ẹkekade ẹkese. Utom ubọkerọn̄ ekedi n̄kpọ kiet emi akan̄wamde ndinam edu esop ọfọn akan.” Mme ntọt eken ẹwụt ẹte ke ini mme ekpemerọn̄ ke ima ima usụn̄ ẹsan̄ade utom ke utọ usụn̄ oro, esop ekeme ndikọri ke ima, edidianakiet, ye ufiop. Nso edidiọn̄ ke emi edi ntem!

Mme Christian ekpemerọn̄ ẹsinam ediwaha n̄kese man ẹmenede mfọnọn̄kpọ eke spirit mme erọn̄. Oyom mbiowo ẹsịn udọn̄ ẹnọ ẹnyụn̄ ẹsọn̄ọ ekemmọ mme andinịm ke akpanikọ idem. Edieke akamba mfịna oro oyomde ẹnọ item owụtde idem ke ini edika n̄kese emi, ekeme ndifọn ndinam ndutịm man ẹneme ke ini efen, akpan akpan edieke ebiowo akasan̄ade ye asan̄autom unamutom. Ke idaha ekededi, ndiberi utom ubọkerọn̄ ke akam edi se idotde.

Nte ekpemerọn̄ eke spirit oyom ndidi ufọk fo ke n̄kpet n̄kpet ini iso? Edieke oro edide ntre, du ke inemesịt bet nsịnudọn̄ oro anade ebet fi. Enye edi ndinam n̄kpọ nnọ fi ndinyụn̄ nsọn̄ọ fi idem ke ubiere fo ndisọn̄ọ ndu ke usụn̄ oro adade osịm nsinsi uwem.—Matthew 7:13, 14.

[Ekebe ke page 26]

Mme Ekikere Oro Ẹnọde Kaban̄a Utom Ubọkerọn̄

◻ Nịm ini: Esiwak ndidi se ifọnde ndinịm ini. Edieke ebiowo odiomide ndise mban̄a akamba mfịna, odot ndibem iso nsian asuanetop mban̄a emi.

◻ Ntịmidem: Kere ban̄a edu ye idaha owo emi. Nọ itoro ofụri esịt. Nam edi uduak fo ndinọ “enọ eke spirit” oro ọnọde nsịnudọn̄ onyụn̄ ọsọn̄ọde mbuọtidem. —Rome 1:11, 12.

◻ Owo ẹkpedade ẹsan̄a: Ebiowo efen m̀mê asan̄autom unamutom oro odotde.

◻ Ke ini edika n̄kese oro: Mbiowo ẹkpenyene nditie ifụre ifụre, ima ima, in̄wan̄în̄wan̄, ẹnyụn̄ ẹmem ido. Bụp ban̄a ubon, nte n̄kpọ etiede, ye ntre ntre eken. Tịm nọ n̄kpan̄utọn̄. Edieke akamba mfịna owụtde idem, okpotịm ọfọn ndidiomi san̄asan̄a utom ubọkerọn̄.

◻ Udomo ini edika n̄kese: Ka ke nnennen ini oro ẹkenịmde, nyụn̄ nyọn̄ ke adan̄aemi enyeneufọk osụk okopde inem edika n̄kese oro.

◻ Ndiberi edika n̄kese oro: Odot onyụn̄ enen̄ede ọfọn ẹbọn̄ akam.—Philippi 4:6, 7.

[Ndise ke page 24]

Mme Christian ekpemerọn̄ ẹnọ ukpeme eke spirit

[Mme ndise ke page 26]

Utom ubọkerọn̄ ọnọ nti ifet ndinọ nsịnudọn̄ eke spirit