Ntọt Mme Anditan̄a Obio Ubọn̄
Ndiduọk Mmọn̄ ke N̄kpasịp Akpanikọ ke Chile
KE DESAT edere edere Chile, ediwak isua ẹkeme ndibe mbemiso edịm edepde. Edi ke ini enye edepde, nsat isọn̄ itiat esikabade edi ediye isọn̄ ọyọhọde ye nsio nsio orụk flawa. Mme akaisan̄ ẹsito ofụri idụt oro ẹdi ẹdise n̄wọrọnda ndise emi.
Nte ededi, n̄kpọntịbe oro enen̄erede edemede udọn̄ ke etịbe ke otu mbon Chile. Mmọn̄ akpanikọ Bible ke ọfiọrọ ke kpukpru inụk ke idụt oro, ndien ediwak mbon esịt akpanikọ ke “ẹsehe” ẹkabade ẹdi mme mbet Jesus Christ. Usụn̄ kiet oro ẹdade ẹduọk mmọn̄ akpanikọ emi edi urụk ukopikọ. Mme ifiọkutom oro ẹtienede mi ẹwụt nti utịp oro ẹnyenede ẹto usụn̄ unọ ikọ ntiense emi.
• Ẹma ẹdọhọ ọkwọrọikọ uyọhọ ini kiet oro ekerede Karina ẹte anam owụt ke ndutịm mbono circuit nte ẹkpenọde ikọ ntiense ke urụk ukopikọ. Nte ededi, akananam Karina ikabuanake ke ikpehe utom unọ ikọ ntiense oro. Man ẹn̄wam enye abuana ke ndutịm mbono oro, ebiowo kiet ye n̄wan esie ẹma ẹdụn̄ọde ndusụk akpan n̄kpọ ye Karina ke nte ẹkpenọde ikọ ntiense ke urụk ukopikọ. Mmọ ẹma ẹsịn udọn̄ n̄ko ẹnọ enye ẹte ọbọn̄ akam eben̄e ndausụn̄ Jehovah ke n̄kpọ emi. Enye ama anam ntre ndien ke akpatre ama ebiere ndidomo ndinọ ikot.
Karina ama emek nọmba urụk ukopikọ n̄kpet n̄kpet obio-in̄wan̄ kiet. Anamutom urụk ukopikọ ama ọbọrọ, ndien Karina ama anam ntak emi enye okokotde an̄wan̄a. Anamutom oro ama anam n̄kpọ nte ọfọnde, ndien ẹma ẹdiomi ndifiak nnyene nneme ke usen ita ẹbede. Mfiakn̄ka oro ke urụk ukopikọ ama osụn̄ọ ke ukpepn̄kpọ Bible, ẹkamade ediye uduot ekpri n̄wed oro Nso ke Abasi Oyom Oto Nnyịn? Toto ke ini oro, mmọ ke ẹnịm inem inem ye ufiop ufiop ukpepn̄kpọ, ndien Karina ama ọnọ mme n̄wed ẹsọk n̄wan oro ndibọrọ mme mbụme esie.
• Bernarda ama anam usio-ukot ndinọ eren oro okokotde nọmba urụk ukopikọ esie ke ndudue, ikọ ntiense. Utu ke ndiyat esịt, Bernarda ama etịn̄ ete ke imọ idi kiet ke otu Mme Ntiense Jehovah onyụn̄ ọnọ enye un̄wam. Nneme ama ọtọn̄ọ, ndien eren oro ama akpan̄ utọn̄ nte enye akanamde an̄wan̄a nte Obio Ubọn̄ Abasi edisiode ukwan̄ikpe ifep ke mîbịghike. Eren oro ama ọnọ Bernarda nọmba urụk ukopikọ esie, ndien enye ama anam mfiakn̄ka ebe ke urụk ukopikọ. Ke ini nneme mmọ kiet, Bernarda ama okot itie kiet ke n̄wed oro Ifiọk Oro Adade Osịm Nsinsi Uwem ọnọ eren oro. Enye ama obụp nte enye edisan̄ade enyene idem n̄wed oro kiet, ndien Bernarda ama ọnọ idem kiet ye Bible ẹsọk enye. Ẹma ẹnam ndutịm man eyenete kiet ke n̄kann̄kụk esie esiwaha ekese enye ndien eyenete oro idahaemi ke aka iso “ndiduọk mmọn̄” ke “eto” oro ọkọride-kọri mi.
Ih, ke nsat isọn̄ eke spirit ererimbot emi, n̄kpasịp emi ẹdịbede ke ẹbet ndisehe ke ini ẹduọkde ọnọ-uwem mmọn̄ akpanikọ. Ediwak tọsịn mbon oro ẹkopde nsatitọn̄ ke ẹka iso ‘ndifiari’ nnyụn̄ ‘nsehe’ n̄kabade ndi mme anam-akpanikọ asan̄autom Jehovah Abasi.—Isaiah 44:3, 4.