Mme Mbụme Ẹtode Mme Andikot
Ndi Abel ama ọfiọk ke ẹma ẹyom uwa unam man ẹnyene mfọn Abasi?
Mbụk Bible aban̄ade nte Cain ye Abel ẹkewade mme uwa mmọ edi ata ibio ibio. Ke Genesis 4:3-5, nnyịn ikot ite: “Ekem ke utịt isua, Cain ada mbun̄wụm-in̄wan̄ edisọk Jehovah ke uwa. Abel onyụn̄ ada akpa nditọ n̄kpri ufene esiemmọ ye ikpọn̄ mmọ ọnọ. Ndien Jehovah ese Abel ke iso, ye uwa esie: edi isehe Cain, ye uwa esie.”
Owo itịn̄ke n̄kpọ ndomokiet ke Bible ndiwụt nte ke mbemiso n̄kpọntịbe oro ke Jehovah ama ọnọ akpan ntọt ekededi aban̄a mme uwa m̀mê mme orụk uwa oro enye edinyịmede. Ntem etie nte Cain ye Abel ẹkebiere ke idemmọ ndiwa uwa oro. Owo ikayakke mmọ ẹbe ẹdụk akpa Paradise oro ekedide ebietidụn̄ ete ye eka mmọ; mmọ ẹma ẹtọn̄ọ ndikụt utịp idiọkn̄kpọ; ndien ẹma ẹdian̄ade mmọ ẹkpọn̄ Abasi. Ke mbọm mbọm idaha idiọkn̄kpọ mmọ, anaedi mmọ ẹma ẹnen̄ede ẹkụt ufọn ediwọn̄ọde mbịne Abasi n̄koyom un̄wam. Eyedi mmọ ndikawa uwa nnọ Abasi ekedi edinam unyịmesịt oro mmọ ẹkenamde man ẹnyene mfọn Abasi.
Nte utịp, Abasi ama enyịme uwa Abel, edi ikenyịmeke eke Cain. Ntak-a? Ndi edi koro Abel akawade nnennen n̄kpọ ndien Cain mîkawaha? Nnyịn ikemeke nditịm ntịn̄ nte ke orụk uwa oro mmọ ẹkewade ama enyene n̄kpọ ndinam ye emi, sia owo mîkasianke mmọ se ẹkenyịmede ye se owo mîkenyịmeke. Nte ededi, etie nte ẹma ẹnyịme orụk mbiba. Ke Ibet oro Jehovah ọkọnọde idụt Israel nte ini akade, mme uwa oro ẹkenyịmede ikesịneke unam kpọt edi ama esịne n̄ko edifọp ibokpot, ebek barley, eti ndomuyo, inuak udia, ye wine. (Leviticus 6:19-23; 7:11-13; 23:10-13) Nte an̄wan̄ade, idịghe n̄kpọ oro Cain ye Abel ẹkedade ẹwa uwa kpọt akanam Abasi enyịme uwa owo kiet okûnyụn̄ enyịme eken.—Men Isaiah 1:11; Amos 5:22 domo.
Ediwak isua ikie ke ukperedem, apostle Paul ama ọdọhọ ete: “Oto mbuọtidem Abel ada uwa eke ọfọnde akan eke Cain awa ọnọ Abasi, emi otode ke esịt ẹtịn̄ ikọ ẹdian enye, ẹte, enye edi edinen owo; Abasi ke Idem Esie edi ntiense aban̄a enọ esie.” (Mme Hebrew 11:4) Ntem, mbuọtidem akanam Abasi ọdiọn̄ọ Abel nte edinen owo. Edi mbuọtidem ke nso? Mbuọtidem ke un̄wọn̄ọ Jehovah oro nte ke imọ iyọnọ Mfri, oro ‘edinuakde urụkikọt ibuot’ onyụn̄ anam ubonowo afiak enyene emem ye mfọnmma oro enye ekenyenede inikiet ko. Sia ẹkedọhọde ke ‘ẹyenuak Mfri nditịn̄-ikpat,’ ekeme ndidi Abel ama ekere ke ẹyeyom uwa oro abuanade ediduọk iyịp. (Genesis 3:15, NW) Nte ededi, se idude edi nte ke mbuọtidem oro Abel okowụtde akanam ‘uwa esie ọfọn akan eke Cain.’
Ke ukem ntak oro, ẹma ẹsịn Cain, idịghe koro enye akawade orụk uwa oro mîkọfọnke, edi koro enye akananade mbuọtidem, nte mme edinam esie ẹkewụtde. Jehovah ama asian Cain in̄wan̄-in̄wan̄ ete: “Afo akpanam eti n̄kpọ, nte (iso) ikpenen̄ekede fi?” (Genesis 4:7) Abasi ikesịnke Cain koro mîkamaha uwa esie. Utu ke oro, Abasi ekesịn Cain “koro utom esiemmọ ọdiọkde”—ọyọhọde ye ufụp, usua, ndien ke akpatre, uwotowo.—1 John 3:12.