Se Nnyịn Ikpepde Ito Jesus

Iban̄a Akam Oro Abasi Esikopde

Jesus ekesiwak ndika ebiet emi enye edidude ikpọn̄ ọkọbọn̄ akam, ndien enye ọkọdọhọ mme anditiene enye ẹsinam kpasụk ntre. Bible ọdọhọ ete: “Nte enye odude ke ebiet kiet ọbọn̄ akam, ke ini enye okụrede, kiet ke otu mbet esie ọdọhọ enye ete: ‘Ọbọn̄, kpep nnyịn ndibọn̄ akam’ . . . Enye ọdọhọ mmọ ete: ‘Ini ekededi eke mbufo ẹbọn̄de akam, ẹdọhọ ẹte, “Ete, yak ẹnam enyịn̄ fo asana.”’” (Luke 5:16; 11:1, 2) Ntem, Jesus okowụt ke ikpenyene ndibọn̄ akam nnọ Jehovah Ete imọ kpọt. Enye ikpọn̄-ikpọn̄ edi Andibot nnyịn ye “[Enye] emi okopde akam.”—Psalm 65:2.

Ndi Abasi esikop kpukpru akam?

Abasi isikopke akam emi ẹmụmde-mụm ẹdọn̄ ke ibuot ẹfiak ẹtịn̄. Jesus ọkọdọhọ ete: “Ke ini ọbọn̄de akam, kûyịre ke nditịn̄ mfiak ntịn̄ n̄kpọ kiet.” (Matthew 6:7) Inyene ndisio se isịnede nnyịn ke esịt ntịn̄ nnọ Ete nnyịn eke heaven. Isan̄ kiet, Jesus ama ọdọhọ mme anditiene enye ke Abasi ama okop akam anamidiọk oro ekenen̄erede oyom ndikpụhọde ke ofụri esịt, edi ikopke eke owo ntan̄idem emi eketienede ido mme ete ete mmọ ketket. (Luke 18:10-14) Ke ntem, man Abasi okop akam nnyịn, ana isụhọrede idem idomo ndinam se Abasi asiande nnyịn. Jesus ke idem esiemmọ ọkọdọhọ ete: “Kpa nte Ete ekekpepde mi kpa ntre ke ntịn̄ mme n̄kpọ emi . . . [nnam] n̄kpọ eke enemde enye esịt kpukpru ini.” (John 8:28, 29) Jesus ọkọbọn̄ akam ete: “Okûdi ke uduak mi, edi yak uduak fo ada itie.”—Luke 22:42.

Nso ke ikpọbọn̄ akam iben̄e?

Sia ẹbiatde enyịn̄ Abasi, Jesus ọkọdọhọ ete: “Mbufo ẹnyene ndibọn̄ akam ntem, ndien, ẹte: ‘Ete nnyịn emi odude ke heaven, yak ẹnam enyịn̄ fo asana. Yak obio ubọn̄ fo edi. Yak uduak fo ada itie, nte edide ke heaven, yak edi ke isọn̄ kpasụk ntre.’” (Matthew 6:9, 10) Ikpenyene ndibọn̄ akam ite Obio Ubọn̄ Abasi edi koro enye edi ukara emi Abasi edidade anam uduak esie ke heaven ye ke isọn̄. Jesus ama ọdọhọ ke imekeme ndibọn̄ akam mben̄e ‘udia usen mfịn.’ Imekeme ndibọn̄ akam nnọ Jehovah n̄ko mben̄e utom, ufọk, ọfọn̄, se iban̄ade nsọn̄idem nnyịn, ye mme mfịna eken. Ke adianade do, Jesus ọkọdọhọ ke ikpenyene ndibọn̄ akam mben̄e ẹfen ẹnọ nnyịn.—Luke 11:3, 4.

Ndi ikpenyene ndibọn̄ akam mban̄a mbon en̄wen?

Jesus ama ọbọn̄ akam aban̄a mbon en̄wen. Bible asian nnyịn ete: “Ẹda n̄kpri nditọ ẹsọk enye, man enye odori mmọ ubọk onyụn̄ ọbọn̄ akam.” (Matthew 19:13) Jesus ama ọdọhọ apostle Peter ete: “Mmanam n̄kpeubọk mban̄a fi nte mbuọtidem fo okûwụre.” (Luke 22:32) Jesus ama esịn udọn̄ ọnọ mme anditiene enye ete ẹbọn̄ akam ẹban̄a mbon en̄wen, akam ọdọhọ ẹbọn̄ ẹban̄a mbon oro ẹkọbọde mmọ ye mbon oro ẹsọn̄ọde mmọ enyịn.—Matthew 5:44; Luke 6:28.

Ntak emi ikpọkọbọde ke akam?

Jesus ama esinen̄ede ada ini ọbọn̄ akam onyụn̄ esịn udọn̄ ọnọ mme anditiene enye ete “ẹbọn̄ akam kpukpru ini, ẹkûnyụn̄ ẹkpa mba.” (Luke 18:1) Jehovah ọdọhọ nnyịn iwụt mbuọtidem oro inyenede ke idem imọ ke ndinyene nneme ye imọ ndien ndien mban̄a se ifịghede nnyịn. Jesus ọkọdọhọ ete: “Ẹka iso ẹben̄e, ndien ẹyenọ mbufo.” Edi emi iwọrọke ke Jehovah esimen̄e ndiyere mbon oro ẹmade ẹnyụn̄ ẹkponode enye nte Ete. Utu ke ndidi ntre, Jesus ọkọdọhọ ete: “Edieke mbufo, emi ẹdiọkde, ẹfiọkde ndinọ nditọ mbufo nti enọ, adan̄a didie akan oro ke Ete mbufo ke heaven ediyak edisana spirit ọnọ mbon oro ẹben̄ede enye!”—Luke 11:5-13.

Edieke oyomde ntọt efen efen, se ibuot 17 ke n̄wed Nso ke Bible Enen̄ede Ekpep?a

[Ikọ Idakisọn̄]