Ndi Bible Ekeme Ndin̄wan̄a Owo?

“Ima isikot Bible ke ufọk nnyịn kpukpru Sunday. Ikesinen̄ekede inem mi. Mma nnịm ke Bible edi Ikọ Abasi, edi ekese n̄kpọ oro n̄kokotde ikan̄wan̄ake mi.”—Steven, emi odụn̄de ke Britain.

“Mma ntọn̄ọ ndikot Bible ke ini n̄kedide isua 17. Edi se n̄kokotde ikan̄wan̄ake mi, ntre mma ntre ndikot.—Valvanera, emi odụn̄de ke Spain.

“Mma n̄kot Bible ini kiet sia n̄kekerede ke n̄kpenyene ndikot enye ke ntak emi ndide owo Catholic. Akada mi isua ita ndikot n̄kụre! Edi ata esisịt ke se n̄kokotde akan̄wan̄a mi.”—Jo-Anne, emi odụn̄de ke Australia.

BIBLE ke ẹsụk ẹma ẹkan ke otu kpukpru n̄wed ke ererimbot. Enye osụk anyama akan n̄wed ekededi sia ediwak owo ẹkaka iso ndinyene enye, enye onyụn̄ odu ke ediwak usem, ye ke ediwak usụn̄. Edi Bible isin̄wan̄ake ediwak owo oro ẹnyenede enye. Ndi Bible isin̄wan̄ake fi n̄ko?

Ndi Abasi Oyom Ikọ Esie An̄wan̄a Nnyịn?

Bible ọdọhọ ete: “Abasi ọkọnọ odudu ẹda ẹwet ofụri N̄wed Abasi.” (2 Timothy 3:16) Ih, Jehovah Abasi enyene Bible. Ndi enye oyom Ikọ esie an̄wan̄a nnyịn? Mîdịghe ndi enye okokokoi anam Bible ayan̄a owo ifiọk, edi ayak sụk mme ọkwọrọ ederi ye nditọ ukpepn̄kpọ Bible kpọt ẹfiọk?

Kere ban̄a se Bible ke idemesie etịn̄de ke mme ufan̄ikọ emi ẹtienede mi:

“Mme ewụhọ emi ami n̄wụkde fi mfịn emi, [isọn̄ke] ikan fi, [inyụn̄] iyomke usụn̄.”—Deuteronomy 30:11.

“Ẹdisiak ikọ fo an̄wan̄a owo: etịm asian mme ọkọi.”—Psalm 119:130.

“Kpa ke ini oro [Jesus] okop idatesịt etieti ke edisana spirit onyụn̄ ọdọhọ ete: ‘Mmotoro fi an̄wan̄wa, Ete, Ọbọn̄ enyọn̄ ye isọn̄, koro afo etịmde edịp mbon ọniọn̄ ye mbon ikike mme n̄kpọ emi, onyụn̄ ayarade mmọ ọnọ nditọwọn̄.’”—Luke 10:21.

Ọwọrọ ke Abasi enen̄ede oyom ikọ esie an̄wan̄a fi! Nte ededi, se idude edi nte ke Bible isin̄wan̄ake ediwak mbon oro ẹnyenede esịt akpanikọ. Nso ikeme ndin̄wam mmọ? Mme ibuotikọ oro ẹtienede ẹneme n̄kpọ ita oro ẹkemede ndinam Bible an̄wan̄a fi.