Ndi Emekeme Ndinyene Emem ke Ererimbot Afanikọn̄ Emi?

NTE emem odu ke ebiet emi odụn̄de? In̄wan̄-in̄wan̄ ibọrọ oro ediwak owo ẹsinọde edi, baba. Mmọ ẹdụn̄ ke mme ebiet oro ẹn̄wanade ekọn̄, ẹnyan̄ade ukara, ekpụk kiet an̄wanade ye kiet eken, m̀mê ke ebiet oro mme edinam oyomonsia ọyọhọde. Idem edieke mme n̄kpọ emi mîtịbeke ke ebiet emi odụn̄de, ubiatibet, afanikọn̄, ye ndutan̄uyo oro esinyenede ye mbon mbubehe m̀mê mbọhọidụn̄ fo isiyakke enyene emem. Ẹtịn̄de-tịn̄ mi, utọk iyakke ndusụk ubon ẹdiọn̄ọ se ẹkotde emem.

Ọdọn̄ ediwak owo ndinyene emem. Ndusụk owo ẹkere ke imekeme ndinyene emem edieke isitienede ika ufọkabasi, ikade mme itie oro ekpepde owo nditie n̄kere n̄kpọ, m̀mê nditiene nnam yoga, oro edi, edinam oro mbon Hindu ẹsikerede ke esinam owo asan̄a ekpere Abasi. Mbon eken ẹkere ke ndika nduọkodudu, n̄ka mme itie udia uwem nnyụn̄ n̄kese ndiye itie ayanam inyene emem. Idem edieke etiede nte ke mmọ ẹnyene emem, utọ emem oro isibịghike.

Mmọdo, m̀mọ̀n̄ ke afo ekeme ndinyene ata emem? Jehovah Abasi emi okobotde nnyịn esinọ owo emem. Ntak idọhọde ntre? Bible okot enye “Abasi emi ọnọde emem.” (Rome 15:33) “Ediwak emem” oyodu ke Obio Ubọn̄ esie. (Psalm 72:7; Matthew 6:9, 10) Emi iditiehe nte emem oro mme owo ẹsisịnde. Utọ emem oro esiwak ndinam mme idụt m̀mê mbon oro ẹken̄wanade ekọn̄ ẹdu ke emem ke esisịt ini. Edi emem Abasi oyosio kpukpru n̄kpọ oro ẹsidade utọk ye ekọn̄ ẹdi. Ke akpanikọ, owo ndomokiet idikpepke aba ekọn̄. (Psalm 46:8, 9) Kpukpru owo ẹyenyene ata emem ke akpatre!

Ke ama okokop utọ inem inem idotenyịn oro, ekeme ndidọn̄ fi ndinyene emem idahaemi. Ndi odu usụn̄ oro ekemede ndinyene emem oro edinamde esịt fo ana sụn̄-n̄ ke mme ini afanikọn̄ emi? Enem ndifiọk ke Bible owụt nte ikemede ndinyene emem. Kere ban̄a item emi odude ke ọyọhọ ibuot 4 ke leta oro Paul ekewetde ọnọ esọk mbon Philippi. Mbọk kot ufan̄ikọ 4 esịm 13 ke Bible fo.

“Emem Abasi”

Ufan̄ikọ 7 ọdọhọ ete: “Emem Abasi emi akande kpukpru ekikere eyekpeme esịt mbufo ye ukeme ukeren̄kpọ mbufo ke Christ Jesus.” Idịghe sụk editie n̄kere n̄kpọ m̀mê edikpụhọde edu uwem esinam owo enyene emem. Abasi esinọ owo emem. Emem emi enyene odudu oro “akande kpukpru ekikere.” Enye akan kpukpru editịmede esịt, ifiọk, ye se nnyịn ikerede. Imekeme ndinana un̄wam ke ini afanikọn̄, edi emem Abasi ekeme ndinam inyene idotenyịn ke kpukpru afanikọn̄ oro isobode ẹyebe ẹfep usen kiet.

Ndi odu owo ekededi oro ekemede ndinam emi? Baba, edi, “Abasi [ekeme] ndinam kpukpru n̄kpọ.” (Mark 10:27) Ndinyene mbuọtidem ye ibetedem ke Abasi an̄wam nnyịn iyọ mme editịmede esịt nnyịn. Kere ban̄a ekpri eyen emi osopde ke akamba ufọkurua. Enye enen̄ede ọfiọk ke se anade inam edi ndiyom eka imọ, ndien ke ima ikam ikokụt enye, ke mfịna imọ okụre. Ukem nte ekaeyen oro edimende enye akama ke ini okụtde enye, Abasi edinyụn̄ anam ntre n̄ko ye nnyịn edieke isịnde idem iyom enye. Enye ọyọdọn̄ nnyịn esịt onyụn̄ emen kpukpru editịmede esịt nnyịn efep.

Ediwak ikọt Jehovah ẹsinyene emem Abasi ke ini ẹsobode n̄kpọsọn̄ mfịna. Ke uwụtn̄kpọ, kere ban̄a Nadine, emi idịbi okobụn̄ọde. Enye ọdọhọ ete: “Ama esisọn̄ nditịn̄ nte etiede mi ke idem, ndien mma nsinam nte n̄kpọ oro ifịnake mi. Edi ke esịt mi, mma n̄kop editịmede esịt. Ekpere ndidi kpukpru usen, mma nsibọn̄ akam nnọ Jehovah ndọhọ enye an̄wam mi. Mmokụt odudu emi akam enyenede ke idem mi, koro ini ekededi oro n̄kpọ enen̄erede afịna mi, nnyụn̄ n̄kerede ke ‘ndikemeke aba ndiyọ,’ mmesinyene ifụre ye emem, nnyụn̄ n̄kop idem inem.”

Ndikpeme Esịt ye Ekikere Fo

Ẹyak ifiak ise se idude ke Philippi 4:7. Enye ọdọhọ ke emem Abasi eyekpeme esịt ye ukeme ukeren̄kpọ nnyịn. Ukem nte owo ukpeme esikpemede ebiet oro ẹdọhọde enye ekpeme, emem Abasi esikpeme nnyịn mbak udọn̄ n̄kpọ obụkidem, ikpîkpu ekikere, ye mme n̄kpọ oro mîdaha ubọn̄ inọ Abasi ẹdidụk nnyịn esịt. Kere ban̄a uwụtn̄kpọ emi.

Ediwak owo ke ererimbot afanikọn̄ emi ẹnịm ke se idinamde mmimọ inyene emem ye ifụre edi ndinyene ediwak okụk. Nta mme anam-mbubehe ẹsidọhọ ke owo ama ededep shares m̀mê esịn okụk ke mbubehe en̄wen, ke ama uwa. Ndi ẹtịn̄ akpanikọ? Baba! Nnyekidem esinam owo emi ekedepde shares oyom ndifiọk se shares akpade ke usen ke usen. Ndusụk ini, emi esinam owo ekere m̀mê ikpakam inyanyam idem n̄kpọ isio, m̀mê ikpededep efen idian, m̀mê ikpebebet kan̄a ise nte urua editiede. Ke akpanikọ, Bible ikpanke owo ndinam mbubehe, edi enye ọnọ item ọniọn̄ emi ete: “Owo eke amade silver iyụhọke silver; ndien owo ekededi eke amade inyene idikwe utọt; emi onyụn̄ edi ikpîkpu. Idap owo utom enịn̄e, adiade esisịt, onyụn̄ adiade ediwak: edi uyụhọ owo inyene iyakke enye ede idap.”—Ecclesiastes 5:10, 12.

N̄wed mbon Philippi 4:7 ada ekeberi ke ndidọhọ ke emem Abasi ekpeme esịt ye ukeme ukeren̄kpọ nnyịn “ke Christ Jesus.” Nso ebuana ke Christ Jesus enyene ye emem Abasi? Jesus enen̄ede osu uduak Abasi. Enye ọkọnọ uwem esie man ẹfak nnyịn ẹsio ke idiọkn̄kpọ ye n̄kpa. (John 3:16) Enye n̄ko edi Edidem emi ẹdoride ke ebekpo Obio Ubọn̄ Abasi. Ndifiọk itie oro Jesus enyenede ekeme ndinam inen̄ede inyene emem ke esịt ye ke ekikere nnyịn. Didie?

Edieke inen̄erede ikabade esịt inyụn̄ iben̄ede Abasi ite ada uwa ufak Eyen esie efen mme idiọkn̄kpọ nnyịn, Enye eyefen, ndien emi ayanam esịt nnyịn ana sụn̄-n̄. (Utom 3:19) Ke ini ifiọkde ke idinen̄ede ikop idatesịt ke Obio Ubọn̄ Christ, nnyịn ididụhe uwem nte n̄kpọ eke ẹdọhọde ke uwem okụre ke emi. (1 Timothy 6:19) Okposụkedi emi nnyịn mîdibọhọke kpukpru afanikọn̄ idahaemi, edi imekeme ndikop ndọn̄esịt ke iyodu uwem oro ọfọnde akan emi ke mîbịghike.

Nte Ekemede Ndinyene Emem Abasi

Didie ke ekeme ndinyene emem Abasi? Imekeme ndikụt ibọrọ ke Philippi 4:4, 5 emi ọdọhọde ete: “Ẹdat esịt ke Ọbọn̄ kpukpru ini. Nyọtọn̄ọ ntak ndọhọ, Ẹdat esịt! Ẹyak kpukpru owo ẹdiọn̄ọ ẹban̄a eti ibuot mbufo. Ọbọn̄ ke ekpere.” Paul ekewet n̄kpọ emi ke ini ẹkekọbide enye ke Rome ke unana ntak. (Philippi 1:13) Utu ke ndikeseme ndọhọ ke ẹkọbi imọ kpa ye oro imọ mîduehe, enye akakam esesịn udọn̄ ọnọ ekemmọ nditọete ete ẹdat esịt ke Ọbọn̄ kpukpru ini. Idịghe se ikọwọrọde Paul akanam enye okop idatesịt, enye okokop idatesịt sia enye ama enen̄ede ekpere Abasi. Nnyịn n̄ko inyene ndikpep ndikop idatesịt ndinam n̄kpọ Abasi kpa ye idaha ekededi oro isobode. Nte ifiọkde ekese iban̄a Jehovah inyụn̄ isịnde ifịk inam uduak esie, ntre ke idikop idatesịt ndinam n̄kpọ esie. Ndien emi ayanam ikop inemesịt onyụn̄ ọnọ nnyịn emem.

Ke adianade do, Bible ọdọhọ inyene eti ibuot. Edieke inyenede eti ibuot, nnyịn idinamke n̄kpọ emi ọsọn̄de akan nnyịn. Sia idide mme anana-mfọnmma owo, ikpanaha ikere ke kpukpru se inamde edifọfọn kpukpru ini. Ntak ndien emi atabade idap etie ekere nte ọkpọfọnde ama m̀mê nte akpanamde n̄kpọ ọfọn akan owo en̄wen? Nnyịn n̄ko ikpekereke ke akpana mbon ẹn̄wen ẹfọn ẹma. Ntre, nnyịn idisọpke iyat esịt ke ini mmọ ẹduede nnyịn. Usụn̄ en̄wen oro ẹkabarede ikọ Greek oro “eti ibuot” edi “ndinyịme n̄kpọ atak fi.” Edieke inyịmede ndiyak n̄kpọ oro nnyịn imade atak nnyịn, nnyịn idisifan̄ake mfan̄a tutu itọhọ, sia ufọn idụhe. Utọk isikam iyakke idu ke emem, inyụn̄ iyakke inyene ama, sia idụhe eke amade owo utọk.

Ekeme nditie nte ke se idude ke N̄wed Philippi 4:5, emi ọdọhọde ete “Ọbọn̄ ke ekpere” asan̄a isio ye se isụk inemede emi. Abasi ọmọn̄ ada Obio Ubọn̄ esie osio akani editịm n̄kpọ emi efep. Edi idem idahaemi, enye ekeme ndisan̄a n̄kpere kpukpru owo oro ẹsan̄ade ẹkpere enye. (Utom 17:27; James 4:8) Nte ufan̄ikọ 6 owụtde, ndifiọk ke Jehovah ekpere nnyịn anam ikop idatesịt, inyene eti ibuot, inyụn̄ itre nditịmede esịt mban̄a mfịna oro isobode mfịn m̀mê se idisobode ke ini iso.

Ufan̄ikọ 6 ye 7 owụt ke imekeme ndinyene emem Abasi ke ini ibọn̄de akam. Ediwak owo ẹda akam nte ikpîkpu editie n̄kere n̄kpọ, ẹkerede ke orụk akam ekededi ekeme ndinam mmimọ idọdiọn̄ inyene emem. Edi Bible etịn̄ aban̄a eti nneme oro inemede ye Jehovah, kpa nneme oro adiande owo ọtọkiet nte emi eyen esinemede n̄kpọ oro enemde enye esịt ye mme mfịna esie ọnọ edima ete esie. Edi n̄kpọ ndọn̄esịt ndifiọk ke imekeme ndimen “kpukpru n̄kpọ” mbịne Abasi. Imekeme nditịn̄ se ededi oro afịnade nnyịn ke esịt ye ke ekikere nnọ Ete nnyịn eke heaven.

Ufan̄ikọ 8 esịn udọn̄ ọnọ nnyịn ete ikere nti n̄kpọ. Edi ikụreke ke ndikere nti n̄kpọ. Ufan̄ikọ 9 ọdọhọ ke nnyịn n̄ko ikpenyene ndida nti item oro Bible ọnọde nsịn ke edinam. Emi ayanam inyene esịt oro n̄kpọ mîbiomke. N̄ke emi ọdọhọde ke esịt emi n̄kpọ mîbiomke itabake owo idap edi ata akpanikọ!

Ke akpanikọ, afo emekeme ndinyene emem. Jehovah Abasi esinọ emem emi, ndien enye esinọ mbon emi ẹsan̄ade ẹkpere enye ẹnyụn̄ ẹdade item esie ẹsịn ke edinam. Afo emekeme ndifiọk se Abasi aduakde edieke ekpepde Bible. Imọfiọk ke imemke ndida item esie nsịn ke edinam. Edi edieke ẹdomode ẹnam emi, ẹyenen̄ede ẹbọ ufọn koro “Abasi emem oyodu ye mbufo.”—Philippi 4:9.

[Se ẹwetde ke ikpọ abisi ke page 10]

“Emem Abasi . . . eyekpeme esịt mbufo.”—PHILIPPI 4:7

[Se ẹwetde ke ikpọ abisi ke page 12]

Edi n̄kpọ ndọn̄esịt ndifiọk ke imekeme ndimen “kpukpru n̄kpọ” mbịne Abasi