“Ẹkpono Mbon Oro Ẹnamde Utom Ọkpọsọn̄ Ke Otu Mbufo”
“Ẹkpono mbon oro ẹnamde utom ọkpọsọn̄ ke otu mbufo ẹnyụn̄ ẹdade mbufo usụn̄ ke Ọbọn̄ ẹnyụn̄ ẹnọde mbufo item.”—1 THESS. 5:12.
1, 2. (a) N̄kpọ eketie didie ye esop Thessalonica ke ini Paul ekewetde akpa leta esie ọnọ ẹsọk mmọ? (b) Nso ke Paul ekesịn udọn̄ ọnọ mmọ ete ẹnam?
DA NTE ke okodu ke esop Thessalonica ke eyo mme apostle, kiet ke otu akpa esop emi ẹkesiakde ke Europe. Apostle Paul ama abiat ini ọsọn̄ọ nditọete ke esop oro idem. Ekeme ndidi enye ama emek mbiowo man ẹda usụn̄, ukem nte ekemekde ke mme esop eken. (Utom 14:23) Edi ke ẹma ẹkesiak esop oro, mme Jew ẹma ẹtịm otu mbon ntịme man ẹbịn Paul ye Silas ẹsio ke obio oro. Etie nte mme Christian emi ẹkesụhọde do ẹma ẹkere ke ẹkpọn̄ mmimọ, mîkpemeke ẹkam ẹkop ndịk.
2 Nte ido edide, ke Paul ama ọkọkpọn̄ Thessalonica, enye ama etịmede esịt aban̄a esop oro ẹkesiakde obufa do. Enye ama odomo ndifiak n̄ka, edi “Satan ama ọbiọn̄ọ” enye. Ntem enye ama ọdọn̄ Timothy ete ọkọsọn̄ọ esop oro idem. (1 Thess. 2:18; 3:2) Eti etop emi Timothy akadade edi ama anam Paul ewet leta ọnọ ẹsọk mbon Thessalonica. Paul ama esịn udọn̄ n̄ko ọnọ mmọ ke leta oro ete ‘ẹkpono mbon oro ẹdade mmọ usụn̄.’—Kot 1 Thessalonica 5:12, 13.
3. Ntak emi akanade nditọete ke Thessalonica ẹtịm ẹkere ẹban̄a mbiowo?
3 Nditọete oro ẹkedade usụn̄ ke esop Thessalonica ikenyeneke ifiọk nte Paul ye mbon oro ẹkesisan̄ade ye enye; mmọ ikonyụn̄ ibịghike ke esop nte mbiowo ke Jerusalem. Idem n̄kpọ, n̄kọ esop oro ikọyọhọke isua kiet ini oro! Kpa ye oro, ama odot mbon esop oro ẹwụt esịtekọm ẹban̄a mbiowo mmọ, emi ‘ẹkenamde utom ọkpọsọn̄’ ẹnyụn̄ “ẹdade [esop] usụn̄” ẹnyụn̄ “ẹnọde [nditọete] item.” Ke akpanikọ, ama enen̄ede odot mmọ “ẹtịm ẹkere ẹban̄a [mbiowo] ke ima.” Paul ama adian n̄ko ete mmọ “ẹtie emem emem ye kiet eken.” Ndi afo ekpekenen̄ede owụt esịtekọm aban̄a mbiowo edieke okpokodude ke Thessalonica? Afo ese didie “irenowo [emi ẹnọde] nte enọ,” emi Abasi adade Christ ọnọ esop?—Eph. 4:8.
‘Ẹnam Utom Ọkpọsọn̄’
4, 5. Ntak emi akanade mbiowo ẹnam utom ọkpọsọn̄ ndikpep esop n̄kpọ ke eyo Paul, ntak emi onyụn̄ edide ntre mfịn-e?
4 Didie ke mbiowo ke Thessalonica ‘ẹkenam utom ọkpọsọn̄’ ke ẹma ẹkenọ Paul ye Silas ẹka Beroea? Mmọ ẹma ẹkpebe Paul, ẹda N̄wed Abasi ẹkpep esop n̄kpọ. Afo emekeme ndibụp ete, ‘Ndi mme Christian ke Thessalonica ẹma ẹwụt esịtekọm ẹban̄a Ikọ Abasi?’ Idem n̄kpọ, n̄kọ Bible ọdọhọ ke mbon Beroea ẹma “ẹnyene in̄wan̄-in̄wan̄ esịt ẹkan mbon oro ẹdude ke Thessalonica, . . . ẹdụn̄ọde N̄wed Abasi ke usen ke usen.” (Utom 17:11) Edi emi akaban̄a ofụri mbon Thessalonica, idịghe mme Christian. Mbon oro ẹkekabarede ẹdi mme Christian ẹma ‘ẹbọ ikọ Abasi, idaha enye nte ikọ owo, edi, ẹda ke enye edi ikọ Abasi.’ (1 Thess. 2:13) Anaedi mbiowo ẹma ẹnam utom ọkpọsọn̄ man ẹnọ mmọ udia eke spirit.
5 Mfịn, otu ofụn emi anamde akpanikọ onyụn̄ enyenede ọniọn̄ ke ọnọ otuerọn̄ Abasi “udia ke nnennen ini.” (Matt. 24:45) Mbiowo esop ẹsitiene ndausụn̄ ofụn emi man ẹnọ nditọete mmọ udia eke spirit. Ekeme ndidi mme owo ke esop ẹnyene ata ediwak n̄wed emi ẹkọn̄ọde ke Bible, ndien ndusụk usem ẹnyene Watch Tower Publications Index ye Watchtower Library ke usan umụm ntọt kọmputa. Man ẹyụhọ esop ke n̄kan̄ eke spirit, mbiowo ẹsibiat ediwak hour ẹtịm mme n̄kpọ oro mmọ ẹnyenede ndinam ke mbono esop man ẹnam enye ke ata eti usụn̄. Ndi akanam emekere aban̄a ini emi mbiowo ẹsibiatde ẹtịm mme n̄kpọ oro mmọ ẹnyenede ke mbono esop ye ke n̄kpri ye ikpọ mbono?
6, 7. (a) Nso ke mbiowo ke Thessalonica ẹkekpep ẹto Paul? (b) Ntak emi ekemede ndisọn̄ mbiowo mfịn ndikpebe Paul?
6 Mbiowo ke Thessalonica ẹma ẹti eti uwụtn̄kpọ oro Paul ekenịmde ke ndibọk otuerọn̄. Enye ikesikaha ikese mme owo eto eto sia onyụn̄ anade ẹnam. Edi nte ikenemede ke ibuotikọ oro ekebede, Paul “[eketie] sụn̄sụn̄ . . . , nte emi eka ọbọkde nditọ esiemmọ.” (Kot 1 Thessalonica 2:7, 8.) Enye ama akam enyịme ‘ndinọ’ ukpọn̄ esie! Mbiowo oro ẹkenyene nditie nte enye ke ini ẹbọkde erọn̄.
7 Mme Christian ekpemerọn̄ mfịn ẹkpebe Paul ke ndinen̄ede mma mme erọn̄. Ndusụk erọn̄ ẹkeme nditre ndisidara owo nnyụn̄ ntie ufan ufan. Kpa ye oro, mbiowo ẹsidomo ndida ikike nnam n̄kpọ nnyụn̄ “[n̄kụt] se ifọnde” ke idem mmọ. (N̄ke 16:20) Edi akpanikọ ke sia ebiowo edide anana-mfọnmma owo, ekeme ndisọn̄ enye ndikụt eti n̄kpọ ke idem owo kiet kiet. Edi nte enye esịnde ofụri ukeme esie odomo ndinam n̄kpọ sụn̄sụn̄ ye kpukpru owo, ndi ifọnke ẹtoro enye ke ukeme oro enye esịnde man edi eti ekpemerọn̄ emi odude ke idak Christ?
8, 9. Nso idi ndusụk usụn̄ emi mbiowo mfịn ‘ẹkpemede ukpọn̄ nnyịn’?
8 Kpukpru nnyịn imenyene ntak ‘ndisụk ibuot’ nnọ mbiowo. Nte Paul ekewetde, ‘mmọ ẹkpeme ukpọn̄ nnyịn.’ (Heb. 13:17) Ikọ oro eti nnyịn aban̄a ata mme ekpemerọn̄ emi ẹkesitabade idap man ẹkpeme otuerọn̄ mmọ. Kpasụk ntre, mbiowo mfịn ẹkeme nditaba idap man ẹse ẹban̄a mbon emi ẹdọn̄ọde m̀mê ẹfụhọde m̀mê ẹnyenede mfịna eke spirit. Ke uwụtn̄kpọ, ẹsidemede nditọete emi ẹdude ke Mme Kọmiti Unyene Nneme ye Mbon Ufọkibọk, ke ntak emi idem mîsọn̄ke eyenete. Edi, esịt esinen̄ede enem nnyịn ke se mmọ ẹsinamde ke ini isobode utọ idaha oro!
9 Mbiowo emi ẹn̄wamde Itieutom Ubọp Ufọkmbono Obio Ubọn̄ ye kọmiti unọ un̄wam ẹsinam utom ọkpọsọn̄ man ẹn̄wam nditọete. Oyom inọ mmọ ibetedem ke ofụri esịt! Da ke uwụtn̄kpọ un̄wam oro ẹkenọde ke enyene-ndịk idio ama eketịbe ke Myanmar ke 2008. Man ẹkeme ndisịm Esop Bothingone ke Utan Irrawaddy, emi idio oro ekenen̄erede ọnọmọ, nditọete emi ẹkekade ndinọ n̄kpọ un̄wam do ẹma ẹbe ke ebiet oro idio oro akabiatde, emi ọkọyọhọde ye okpo owo. Ke ini nditọete do ẹkekụtde ke akani esenyịn circuit mmimọ ama esịne ke akpa otu mme ọnọ un̄wam oro ẹkedide ẹdisịm Bothingone, mmọ ẹma ẹfiori ẹte: “Sese! Esenyịn circuit nnyịn ke edi! Jehovah anyan̄a nnyịn!” Ndi afo omowụt esịtekọm aban̄a ọkpọsọn̄ utom emi mbiowo ẹnamde okoneyo ye uwemeyo? Ẹsimek ndusụk mbiowo ẹsịn ke kọmiti emi ẹkpede ikpe oro enen̄erede ọsọn̄. Mmọ isinamke inua iban̄a se mmọ ẹnamde; edi mbon emi ẹdiade ufọn utom mmọ ẹsinen̄ede ẹwụt esịtekọm.—Matt. 6:2-4.
10. Ewe utom emi mme owo mînen̄ekede idiọn̄ọ ke mbiowo ẹsinam?
10 Ediwak mbiowo ẹsinyene n̄kpọ ndiwet. Ke uwụtn̄kpọ, anam-ndutịm otu mbiowo esinam ndutịm mbono esop eke urua ke urua. Ewetn̄wed esop esidian ibatutom eke ọfiọn̄ ke ọfiọn̄ ye eke ofụri isua. Esenyịn ufọkn̄wed esinen̄ede etịn̄ enyịn anam ndutịm ufọkn̄wed. Ẹsidian ibatokụk esop kpukpru ọfiọn̄ ita. Mbiowo ẹsikot leta emi otode n̄kọk itieutom ẹnyụn̄ ẹtiene ndausụn̄ emi anamde nnyịn “idi kiet ke mbuọtidem.” (Eph. 4:3, 13) Ukeme oro mbiowo emi ẹnamde utom ọkpọsọn̄ ntem ẹsịnde anam “kpukpru n̄kpọ ẹda itie ke ido nte eyede ye ke ndutịm.”—1 Cor. 14:40.
“Ẹdade Mbufo Usụn̄”
11, 12. Mmanie ẹda usụn̄ ke esop, ndien emi esịne nso?
11 Paul ọkọdọhọ ke mbiowo emi ẹnamde utom ọkpọsọn̄ ke Thessalonica ‘ẹda usụn̄’ ke esop. (1 Thess. 5:12) Paul ama ọdọhọ n̄ko ke mbiowo “[ẹnam] utom ọkpọsọn̄.” Enye eketịn̄ aban̄a kpukpru mbiowo ke esop. Ata ediwak mbiowo mfịn ẹsinịm mbono esop ke esop mmọ. Ukpụhọde oro ẹnamde ndondo emi ẹkabade ẹda enyịn̄ oro, “anam-ndutịm otu mbiowo,” an̄wam nnyịn ida kpukpru mbiowo nte mme andibuana ke otu kiet emi ẹdianade kiet.
12 ‘Edida usụn̄’ ke esop ikụreke ke ndinọ ukpep. Ukem ikọ oro ke ẹkabade nte ‘ndikama’ ke 1 Timothy 3:4. Paul ọkọdọhọ ke esenyịn ekpenyene ndidi “owo emi akamade mbonufọk esie ke eti usụn̄, emi enyenede nditọ eke ẹsụkde ibuot ẹnyụn̄ ẹdade n̄kpọ ke akpan n̄kpọ.” Ikọ oro ‘ndikama’ esịne ndikpep nditọ n̄kpọ ye ndida usụn̄ ke ubon nnyụn̄ “[nnyene] nditọ eke ẹsụkde ibuot.” Mbiowo ẹsida usụn̄ ẹnyụn̄ ẹda iso ke esop, ẹn̄wam kpukpru owo ẹsụk ibuot ẹnọ Jehovah.—1 Tim. 3:5.
13. Ntak emi ekemede ndida ini mbemiso ẹnamde ubiere ke mbono mbiowo?
13 Man ẹnen̄ede ẹda mme erọn̄ usụn̄, mbiowo ẹsitie kiet ẹneme nte ẹkpen̄wamde esop. Ekeme ndidi ekpemem utom edieke ebiowo kiet ekpesinamde kpukpru ubiere. Edi sia ẹtienede uwụtn̄kpọ otu ukara eyo mme apostle, otu mbiowo mfịn ẹsitie ọtọkiet ẹneme n̄kpọ ifụre ifụre, ẹyom ndausụn̄ N̄wed Abasi. Uduak mmọ esidi ndida mme edumbet N̄wed Abasi n̄kọk mfịna esop mmọ. Emi esinen̄ede enyene ufọn ke ini ebiowo kiet kiet esitịmde idem ọnọ mbono mbiowo, odụn̄ọde ndausụn̄ emi N̄wed Abasi ye otu ofụn emi anamde akpanikọ onyụn̄ enyenede ọniọn̄ ọnọde. Edi akpanikọ ke emi esida ini. Edieke ẹnyenede nsio nsio ekikere, nte ẹkenyenede ke ini otu ukara eyo mme apostle ẹkenemede ẹban̄a edina mbobi, ekeme ndiyom ẹfiak ẹda ini ẹkenam ndụn̄ọde man kpukpru owo ẹnyene ekikere emi ekemde ye N̄wed Abasi.—Utom 15:2, 6, 7, 12-14, 19.
14. Ndi afo emesima mbiowo ẹdiana kiet ẹnam utom? Ntak-a?
14 Nso ikeme nditịbe edieke ebiowo kiet ọsọn̄ọde eyịre ete ẹnam n̄kpọ nte imọ iyomde m̀mê oyomde ẹnam se imọ ikerede? Mîdịghe nso edieke owo oro ebietde Diotrephes ke eyo mme apostle ọtọde ubahade ke esop? (3 John 9) Ofụri esop edibọ ufen. Edieke Satan okodomode nditịmede esop ke eyo mme apostle, imekeme ndinen̄ede nnịm ke enye oyom n̄ko nditịmede emem esop mfịn. Enye ekeme ndinam mme owo ẹnyene ndiọi udọn̄ unana-mfọnmma, utọ nte udọn̄ ediyom uwọrọiso. Ntem, ana mbiowo ẹsụhọde idem ẹnyụn̄ ẹnam utom ọtọkiet nte otu oro adianade kiet. Nnyịn iwụt esịtekọm didie ntem iban̄a nsụhọdeidem mbiowo oro ẹdianade kiet ẹnam utom nte otu!
“Ẹnọde Mbufo Item”
15. Nso isidi uduak mbiowo ke ini ẹnọde eyenete item?
15 Ekem Paul etịn̄ ọkpọsọn̄ utom emi edide akpan n̄kpọ, emi mbiowo ẹsinamde, oro edi, ndinọ otuerọn̄ item. Ke N̄wed Abasi Christian Usem Greek, Paul kpọt ekewet ikọ Greek emi ẹkabarede nte “nditeme.” Enye ekeme ndiwọrọ ọkpọsọn̄ item emi mîtiehe utọk utọk. (Utom 20:31; 2 Thess. 3:15) Ke uwụtn̄kpọ, Paul ama ewet mbon Corinth ete: “N̄wetke mme n̄kpọ emi ndida nsuene mbufo, edi n̄wet nditeme mbufo nte ndima nditọ.” (1 Cor. 4:14) Ima emi enye akamade mme owo akanam enye ọnọ item oro.
16. Nso ke odot mbiowo ẹti ke ini mmọ ẹnọde mbon en̄wen item?
16 Mbiowo ẹti ke nte mmimọ inọde mbon en̄wen item edi ata akpan n̄kpọ. Mmọ ẹsidomo ndikpebe Paul ke ndifọn ido, ndima mme owo, nnyụn̄ n̄n̄wam mmọ. (Kot 1 Thessalonica 2:11, 12.) Nte ededi, ana mbiowo ‘ẹsọn̄ọ ẹmụm ikọ akpanikọ ẹkama, man mmọ ẹkeme ndida eti ukpepn̄kpọ nnọ owo item.’—Titus 1:5-9.
17, 18. Nso ke afo ekpenyene nditi edieke ebiowo ọnọde fi item?
17 Edi akpanikọ, mbiowo ẹdi mme anana mfọnmma ẹnyụn̄ ẹkeme nditịn̄ se mmọ ẹdituade n̄kpọfiọk. (1 Ndi. 8:46; Jas. 3:8) N̄ko-n̄ko, mbiowo ẹfiọk ẹte ke ‘isitiehe nditọete nnyịn inem inem’ ndibọ item, edi ke ‘esibabiak.’ (Heb. 12:11) Ntem, ke ini ebiowo oyomde ndinọ owo item, anaedi enye esinam oro ke ama ekebem iso enen̄ede etie ekere emi onyụn̄ ọbọn̄ akam. Edieke ẹnọde fi item, ndi emesiwụt esịtekọm ke ebiowo oro ndikere mban̄a fi?
18 Edieke ekpenyenede mfịna emi ọsọn̄de mbiausọbọ ndifiọk. Ekem abiausọbọ kiet edifiọk se idide udọn̄ọ fo, edi udọn̄ọ oro edi ata idiọk udọn̄ọ. Ndi akpayat esịt ye abiausọbọ oro? Ukpayatke! Utu ke oro, ọkpọkọm enye ọkpọdọhọ fi aka usiakidem, afo ekpenyịme ndika, sia ọmọfiọk ke emi edidi ke ufọn fo. Nte abiausọbọ oro etịn̄de n̄kpọ oro ekeme ndifịna fi, edi ndi afo akpayak oro ebiere se afo edinamde? Etie nte ukpayakke. Kpasụk ntre, kûyak nte ẹnọde fi item anam fi etre ndikop uyo mbon emi Jehovah ye Jesus ẹkemede ndida nnam fi ọfiọk nte ekemede ndinyan̄a m̀mê ndikpeme idemfo ke n̄kan̄ eke spirit.
Wụt Esịtekọm Ban̄a Mbiowo Emi Jehovah Ọnọde Mbufo
19, 20. Didie ke afo okpowụt esịtekọm aban̄a “irenowo [emi ẹnọde] nte enọ”?
19 Nso ke akpanam edieke ẹnọde fi san̄asan̄a enọ? Ndi okpowụt esịtekọm ke ndida enye nnam n̄kpọ? Jehovah ada Jesus Christ ọnọ nnyịn “irenowo nte enọ.” Usụn̄ kiet oro ekemede ndiwụt esịtekọm mban̄a mmọ edi ke ndinen̄ede n̄kpan̄ utọn̄ ke ini mmọ ẹnọde utịn̄ikọ nnyụn̄ ndomo ndinam se mmọ ẹtịn̄de. Emekeme ndiwụt esịtekọm n̄ko ke ndinọ nti ibọrọ ke mme mbono esop. Nọ utom oro mbiowo ẹdade usụn̄ iberedem, utọ nte utom ukwọrọikọ. Edieke item oro ebiowo ọkọnọde fi ọkọfọnde ye afo, ntak mûdọhọke enye? Ke adianade do, wụt esịtekọm nọ mme ubon mbiowo n̄ko. Ti ete ke ubon ebiowo ẹsiyak ebiowo ada ini oro enye okpodude ye mmọ anam utom ọkpọsọn̄ ọnọ esop.
20 Ke akpanikọ, enen̄ede odot iwụt esịtekọm iban̄a mbiowo emi ẹnamde utom ọkpọsọn̄ ke otu nnyịn, ẹdade nnyịn usụn̄, ẹnyụn̄ ẹnọde nnyịn item. “Irenowo [emi ẹnọde] nte enọ” mi ẹnen̄ede ẹdi edima enọ Jehovah!
Nte Afo Emeti?
• Mme ntak ewe ke mme Christian ke Thessalonica ẹkenyene ndiwụt esịtekọm mban̄a mbon oro ẹdade usụn̄ ke otu mmọ?
• Didie ke mbiowo esop mbufo ẹnam utom ọkpọsọn̄ ẹnọ mbufo?
• Didie ke afo ọbọ ufọn oto mbiowo ndida fi usụn̄?
• Nso ke afo ekpeti edieke ebiowo ọnọde fi item?
[Ndise ke page 27]
Ndi afo omowụt esịtekọm aban̄a ediwak usụn̄ oro mbiowo ẹbọkde esop?