Anie Ekpekpep Nditọwọn̄ N̄kpọ Aban̄a Abasi?
“Eyen ukpepn̄kpọ ikanke andikpep enye, edi owo ekededi eke ẹtịmde ẹnọ ukpep eyetie nte andikpep enye.”—LUKE 6:40.
NDUSỤK mme ete ye eka ẹsikere ke mmimọ idikemeke ndikpep nditọ mmimọ n̄kpọ Abasi. Mmọ ẹkeme ndikere ke mmimọ ikakaha n̄wed mîdịghe ke mmimọ ke idem mmimọ inen̄ekede idiọn̄ọ n̄kpọ iban̄a Abasi man ekedi se ikpepde owo en̄wen. Ndien emi ekeme ndinam mmọ ẹkpọn̄ akpan utom emi ẹnọ iman mmọ m̀mê ọkwọrọikọ ke ufọkabasi mmọ.
Ntre, anie enen̄ede odot ndikpep nditọwọn̄ n̄kpọ Abasi nnyụn̄ n̄kpep mmọ nte ẹkpedude uwem? Kop se Bible etịn̄de mi, ndien men emi domo ye se mme anam-ndụn̄ọde ẹkụtde.
Nso Idi Utom Ete?
Se Bible ekpepde: “Mbufo mme ete, ẹkûfiomo nditọ mbufo, edi ẹka iso ẹkama mmọ ke ntụnọ ye ke item Jehovah.”—Ephesus 6:4.
Se mme anam-ndụn̄ọde ẹkụtde: Nso ufọn ke mme ete ẹsidia edieke mmọ ẹnen̄erede ẹsịn idem ke n̄kpọ Abasi? Ibuotikọ emi Fathers’ Religious Involvement and Early Childhood Behavior, emi ẹkewetde ke 2009, ọdọhọ ete: “Irenowo ndisịn idem ke n̄kpọ Abasi ekeme ndinam mmọ ẹdi nti ete. Ido ukpono akam an̄wan̄wam mme owo ẹfiọk nte ẹkpedude uwem, onyụn̄ anam owo ọfiọk ke imenyene owo.”
Bible enen̄ede etịn̄ adan̄a nte ọfọnde ete ọbọk onyụn̄ ekpep nditọ esie n̄kpọ. (Mme N̄ke 4:1; Colossae 3:21; Mme Hebrew 12:9) Edi ndi utọ item emi osụk enyene ufọn mfịn? Ufọkn̄wed Ntaifiọk Florida ẹma ẹwet ibuotikọ kiet ke 2009 ẹban̄a odudu emi mme ete ẹnyenede ke idem nditọ. Mme anam-ndụn̄ọde emi ẹdọhọ ke nditọ emi mme ete ẹkpepde n̄kpọ ẹsisọp ẹkop owo mbọm ẹnyụn̄ ẹnyene ukpono. Ke utọ nditọ emi, edieke ẹdide irenowo, isisọpke idu etịme uwem, ke ini iban ẹsinen̄erede ẹdiọn̄ọ idem. Emi owụt ke item Bible ke enyenyene ufọn.
Nso Idi Ufọn Eka?
Se Bible ekpepde: “Eyen mi, bọ ntụnọ usọ, kûnyụn̄ ukpọn̄ ibet uka.”—Mme N̄ke 1:8.
Se mme anam-ndụn̄ọde ẹkụtde: N̄wed emi, Handbook of Child Psychology emi ẹkesiode ke 2006 ọdọhọ ete: “Ke ediwak ebiet, mme eka ẹsibiat ini ye nditọ ẹkan mme ete.” Sia mme eka ẹsinen̄erede ẹkpere nditọ ntem, se mmọ ẹsitịn̄de ẹnyụn̄ ẹnamde ye ido mmọ esinyene odudu ke idem nditọ mmọ
Ke ini ete ye eka ẹdianade kiet ẹkpep nditọ akpanikọ ẹban̄a Abasi, mmọ ẹnọ nditọ emi ọsọn̄urua n̄kpọ iba ke nsụhọde n̄kaha. Akpa, emi ọnọ nditọ ifet ndinam ufan ye Ete mmọ eke heaven, ndien emi ọyọfọn ye mmọ ke ofụri eyouwem. Udiana, emi ayanam mmọ ẹkpep nte ebe ye n̄wan ẹkpedianade kiet ẹnam n̄kpọ. (Colossae 3:18-20) Mme ete ye eka ẹnyene ndikpep nditọ mmọ n̄kpọ Abasi ye nte Abasi oyomde ẹnam n̄kpọ ke ubon, okposụkedi emi mbon en̄wen ẹkemede ndin̄wam mmọ ndusụk ini.
Didie ndien ke mme ete ye eka ẹkpekpep nditọ mmọ n̄kpọ? Nso idi mfọnn̄kan usụn̄ ndinam emi?