Ndi Ufọn Odu Ndifiọk Ibọrọ?

“N̄kọtọn̄ọ ndidụk ndụk ye n̄kparawa ke ini n̄kedide isua duop. Akpa, ikesinyụn̄ imụm kiet eken ubọk inyụn̄ itịm inua. Edi ikebịghike, ima itọn̄ọ ndisitụk kiet eken mme itie emi nnyịn mîkpotụkke inyụn̄ inam mme oburobụt ido eken. Mma ntọn̄ọ utom ke mma n̄kesịm isua 15, ndien irenowo itieutom nnyịn ẹma ẹyom nnam idan̄ ye mmimọ. N̄koyom ndiwụt ke ndi n̄kaiferi, ntre mma nsitiene mbon itieutom nnyịn nnam se ededi oro mmọ ẹnamde. N̄koyom mmọ ẹma mi, ntre n̄kododụk nnyịne ke idan̄.”​—SARAH,a AUSTRALIA.

EKEME ndidi idem ayakpa fi ndifiọk ke Sarah oto ufọk emi ẹnen̄erede ẹnam n̄kpọ Abasi. Ete ye eka esie ẹma ẹdomo ndikpep enye ndida mme edumbet Bible ndu uwem. Edi Sarah okoyom ndidu uwem nte enemde enye.

Ediwak owo ẹkeme ndikere ke se Sarah akanamde idiọkke. Mmọ ẹda nte ke se Bible etịn̄de aban̄a idan̄ edi n̄kpọeset. Ndusụk ẹkere ke inyeneke se idiọkde ke ndinam n̄kpọ Abasi mfiak nsan̄a an̄wa.

Ndi ufọn odu ndifiọk se Bible etịn̄de aban̄a idan̄ nnyụn̄ nda oro ndu uwem? Bible ọdọhọ ke “Abasi ọkọnọ odudu spirit ẹda ẹwet ofụri N̄wed Abasi, ndien [ke] enye ọfọn ndida nnọ ukpep.” (2 Timothy 3:16) Edieke edide emenịm ke Abasi okobot nnyịn ye nte ke ẹkeda spirit esie ẹwet Bible, ọwọrọ ke ufọn odu ndifiọk se Bible etịn̄de aban̄a n̄kpọ emi.

Edi mfịna emi odude idahaemi edi nte ke ediwak owo inen̄ekede ifiọk se Bible etịn̄de aban̄a idan̄, sia mme ọkwọrọikọ ufọkabasi mmọ, emi ẹkam ẹdọhọde ke ikwọrọ se idude ke Bible, ẹtịn̄ nsio nsio n̄kpọ ẹban̄a idan̄, ẹtetịn̄ ẹsịn ẹtetịn̄ ẹsio. Ke nditịn̄ ibio ibio, n̄kpọ emi esịn ubahade ke ediwak ufọkabasi.

Utu ke ndiberi edem ke se ededi emi ẹtịn̄de, mbọk da ekpri ini dụn̄ọde n̄kpọ emi ke idemfo. Ibuotikọ oro etienede ọyọbọrọ mbụme duop emi ẹbụpde ẹban̄a se Bible etịn̄de aban̄a idan̄. Enye eneme se Bible etịn̄de aban̄a idan̄ ata in̄wan̄-in̄wan̄. Ndien akpatre ibuotikọ ke nneme emi etịn̄ ntak emi ọfọnde inen̄ede ifiọk se inamde.

[Ikọ Idakisọn̄]