Mme Andikot N̄wed Nnyịn Ẹbụp Ẹte . . .

Ndi Ẹyesobo Isọn̄ Emi?

▪ Ndusụk owo ẹkekere ke isọn̄ emi eyebe efep ke October 21, 2011. Edi se isọn̄ osụk adade mi ke itie esie. Oro owụt ke se Harold Camping emi esikwọrọde ikọ ke ekebe ukopikọ ke United States eketịn̄de ekedi nsu. Ọkwọrọikọ emi ọkọdọhọ ke May 21, 2011, edidi usen emi Abasi edibierede ikpe ererimbot emi, ke ata akwa unyekisọn̄ eyetịbe usen emi ke ofụri ererimbot, ndien ke Abasi edisobo isọn̄ emi ofụri ofụri ke October 21, 2011.

Abasi idiyakke utọ n̄kpọ oro etịbe ke nsinsi nsinsi. Ikọ esie ọdọhọ ete: “Afo ọmọsọn̄ọ owụk isọn̄, man enye ọsọn̄ọ ada.”—Psalm 119:90.

Ndusụk owo ẹkam ẹdọhọ ke Abasi edifọfọp isọn̄ emi ke ikan̄. Mmọ ẹdọhọ ke se 2 Peter 3:7, 10 etịn̄de edi oro. Itien̄wed oro ọdọhọ ete: “Ẹda ukem ikọ emi ẹmụm enyọn̄ ye isọn̄ emi ẹdude ke emi ẹnịm ẹnọ ikan̄ ẹnyụn̄ ẹnịm ẹnọ usen ubiereikpe ye usen emi edisobode mmọ eke mîten̄eke Abasi. Edi usen Jehovah edidi nte inọ, kpa usen oro enyọn̄ edibede efep ye akwa usọp ke ọkpọsọn̄ uyom, ndien mme n̄kpọ oro ẹnamde enye ẹyetara ke ọkpọsọn̄ ufiop, isọn̄ ye mme utom emi ẹdude ke esịt ẹyenyụn̄ ẹyarade.” Ndi ikọ apostle Peter ọwọrọ ke Abasi edifọp ata ata enyọn̄ ye isọn̄ emi ke ikan̄?

Iwọrọke. Ntak emi idọhọde ntre? Sia se itien̄wed emi etịn̄de enyene ndikem ye mme n̄kpọ en̄wen emi Peter eketịn̄de ke ibuot n̄wed emi, afiak ekem ye ofụri Bible. Edieke ikọ Peter ọwọrọde ke Abasi edifọp ata ata enyọn̄ ye isọn̄ emi ke ikan̄, oro ọkpọwọrọ ndifọp ofụri ekondo ye anana-ibat ntantaọfiọn̄ enyọn̄ ye kpukpru se idude ke esịt ke ntak mme idiọkowo emi ẹdude ke isọn̄. Ndi ọkpọfọp ofụri in̄wan̄ fo ke ntak emi mûmaha nte etak ibokpot kiet etiede? Idụhe enyene-ibuot owo ndomokiet emi akpanamde utọ n̄kpọ oro! Ntre n̄ko, owo akpasasan̄a didie ekere ke Jehovah ọkpọfọp ofụri ekondo emi enye okobotde ke ntak emi mme owo ẹsọn̄de ibuot ke ebiet kiet kpọt, oro edi, isọn̄?

N̄ko-n̄ko, utọ ekikere oro ikemke ye se Jesus Christ eketịn̄de mi ete: “Mmọ oro ẹnyenede ifụre ifụre ido ẹkop inemesịt, koro mmọ ẹyeda isọn̄ ẹnyene.” (Matthew 5:5; Psalm 37:29) Ndi emekere ke eti ete ọkpọbọp ata ediye ufọk ọnọ ikọtufọk esie, ekem ekịm ikan̄ ke ufọk oro? (Psalm 115:16) Idụhe enyene-ibuot owo oro akpanamde utọ n̄kpọ oro! Jehovah emi okobotde isọn̄ emi edi ata eti Ete.—Psalm 103:13; 1 John 4:8.

Nso ndien ke ikọ Peter akada aban̄a? “Isọn̄” emi Peter eketịn̄de aban̄a ada aban̄a ndiọi owo. N̄kọ emeti ke enye ọkọdọhọ ke n̄kpọ emi edinyụn̄ itie nte se iketịbede ke eyo Noah. (2 Peter 3:5, 6) Inyeneke se ikanamde isọn̄ emi ye Noah ye ofụri ufọk esie; ndiọi owo kpọt ke ẹkesobo. Sia “isọn̄” emi Peter etịn̄de aban̄a adade aban̄a n̄kpọ, ọwọrọ ke “enyọn̄” emi enye etịn̄de aban̄a ada aban̄a n̄kpọ n̄ko, oro edi, ukara owo. Mmọdọ, ikọ Peter ọwọrọ ke Abasi oyosobo kpukpru ndiọi owo oro mîmaha ndikabade esịt, osobo kpukpru ukara ererimbot emi efep, onyụn̄ anam Obio Ubọn̄ Esie akara isọn̄ emi.—Daniel 2:44.

Ntre, ndi osụk ekere ke ẹyesobo isọn̄ emi? Imọfiọk ke edibọrọ baba. Ndiọi owo kpọt ke Abasi edisobo. Edi amaedi isọn̄ emi ye nti owo, mmọ ẹdidu ke nsinsi nsinsi.—Mme N̄ke 2:21, 22.