Ndi Ẹyesobo Isọn̄ Emi?
Se Bible ọdọhọde
Bible ọdọhọ, Ihih. N̄kpọ ndomokiet idisoboke isọn̄ emi, idifọpke enye ke ikan̄, m̀mê ndida itie esie. Bible ọdọhọ ke Abasi okobot isọn̄ man mme owo ẹdụn̄ ke nsinsi.
“Ndinen owo ẹyeda isọn̄ ẹnyene, ẹnyụn̄ ẹdụn̄ ke esịt ke nsinsi.”—Psalm 37:29.
“[Abasi] owụk isọn̄ ke itie esie; idisehekede tutu amama, m̀mê ke nsinsi.”—Psalm 104:5.
“Isọn̄ ada ke nsinsi.”—Ecclesiastes 1:4.
“Andibot isọn̄ ye Andinam enye, Enye emi ọkọsọn̄ọde owụk enye, . . . mîkobotke enye ke ikpîkpu, emi okobotde enye man ẹdụn̄ ke esịt.”—Isaiah 45:18.
Ndi mme owo ẹyesobo isọn̄ emi?
Abasi idiyakke mme owo ẹbiat ofụm, mmọn̄, ye mme n̄kpọ ntre ẹma ke isọn̄ emi; enye idinyụn̄ iyakke mme owo ẹda n̄kpọekọn̄ m̀mê n̄kpọ ekededi ẹsobo isọn̄ emi. Utu ke oro, enye ‘oyosobo mbon oro ẹbiatde isọn̄.’ (Ediyarade 11:18) Didie ke Abasi edinam oro?
Abasi oyosobo kpukpru ukara owo, sia ukara owo ikemeke ndinam isọn̄ ọfọn. Enye oyonyụn̄ anam ukara esie emi ọfọnde ama, Obio Ubọn̄ esie ke heaven, akara ofụri isọn̄ emi. (Daniel 2:44; Matthew 6:9, 10) Ukara oro edisịne Jesus Christ Eyen esie ke ubọk. (Isaiah 9:6, 7) Ini Jesus okodude mi ke isọn̄, enye ama ekeme ndinam oyobio ye mme n̄kpọ ntre ẹtre. (Mark 4:35-41) Sia edide Jesus edi Edidem Obio Ubọn̄ Abasi, ofụri isọn̄ ye kpukpru n̄kpọ ke isọn̄ ẹdisịne enye ke ubọk. Enye ayafiak ọdiọn̄, m̀mê anam, kpukpru n̄kpọ ke isọn̄ emi afiak etie nte eke In̄wan̄ Eden.—Matthew 19:28; Luke 23:43.
Ndi Bible ọdọhọ ke ẹyeda ikan̄ ẹsobo isọn̄ emi?
Ihih, idịghe se Bible ọdọhọde edi oro. Mme owo ẹsidue ẹkere ke ẹyeda ikan̄ ẹsobo isọn̄ emi, sia 2 Peter 3:7 ọdọhọ ete: “Ẹmụm enyọn̄ ye isọn̄ emi ẹdude ke emi ẹnịm ẹnọ ikan̄.” Edi se n̄kpọ iba emi anamde itie N̄wed Abasi oro enen̄ede an̄wan̄a:
Ke Bible, ikọ oro “enyọn̄,” “isọn̄,” ye “ikan̄” isiwọrọke n̄kpọ kiet ke kpukpru itie. Ke uwụtn̄kpọ, Genesis 11:1 ọdọhọ ke “Ofụri isọn̄ ẹkesem usem kiet.” Ke itie enye oro, “isọn̄” ọwọrọ mme owo.
Se ẹtịn̄de ke ufan̄ikọ oro ẹkperede 2 Peter 3:7, owụt se enyọn̄, isọn̄, ye ikan̄ ọwọrọde ke itie Bible oro. Ufan̄ikọ 5 ye 6 owụt ke se ẹtịn̄de ke ufan̄ikọ 7 editie nte eke ukwọ eyo Noah. Ukwọ oro ama osobo ererimbot, edi ata isọn̄ nnyịn emi ama aka iso odu. Ukwọ oro okosobo ndiọi owo; ndiọi owo oro ke Bible okokot “isọn̄.” (Genesis 6:11) Ukwọ oro ama onyụn̄ osobo se ẹkotde “enyọn̄”—mbon emi ẹkekarade mme owo ini oro. Ntre, mme idiọkowo ke ẹkesobo idịghe ata isọn̄ emi. Owo ikosoboke Noah ye ubon esie; mmọ ẹma ẹbọhọ ukwọ oro ẹnyụn̄ ẹka iso ẹdụn̄ ke isọn̄ emi ke mmọn̄ ukwọ oro ama akasat.—Genesis 8:15-18.
Ukem nte Abasi akadade ukwọ eyo Noah oro osobo ndiọi owo, Abasi edida nsobo, m̀mê “ikan̄,” oro ẹtịn̄de ke 2 Peter 3:7, isobo mme idiọkowo, idịghe ata isọn̄ nnyịn emi. Abasi ọn̄wọn̄ọ ndinọ nnyịn “mbufa enyọn̄ ye obufa isọn̄,” ndien “edi do ke edinen ido edidụn̄.” (2 Peter 3:13) “Mbufa enyọn̄” ada aban̄a mbufa mme andikara, m̀mê obufa ukara—Obio Ubọn̄ Abasi. Mbon emi ẹdidude uwem ke isọn̄ emi ini Obio Ubọn̄ Abasi edikarade isọn̄ emi ke Bible okot “obufa isọn̄.” Emem oyodu ke kpukpru itie ini oro; ofụri isọn̄ edidi Paradise.—Ediyarade 21:1-4.