Kpep N̄kpọ to Ikọ Abasi

Ntak Emi Ikpokotde Enyịn̄ Abasi?

Ibuotikọ emi ọbọrọ mme mbụme emi ẹkemede ndidi emesibụp onyụn̄ owụt n̄ko ebiet emi okpokụtde ibọrọ ke Bible fo. Mme Ntiense Jehovah ẹyema ndinam ibọrọ mbụme emi enen̄ede an̄wan̄a fi.

1. Ntak emi Abasi osiode idemesie enyịn̄-e?

Anaedi emesima mme owo ẹkot fi enyịn̄ utu ke ndikot fi “da,” “ete,” “mma,” m̀mê n̄kpọ ntre. Enyịn̄ ke ẹsida ẹdiọn̄ọ owo. Abasi enyene ediwak udorienyịn̄ nte “Akakan Ọbọn̄ Andikara,” “Ata Ọkpọsọn̄ Abasi,” ye “Akwa Andibot.” (Genesis 15:2; 17:1; Ecclesiastes 12:1) Edi enye osio idemesie enyịn̄ man nnyịn ikeme ndifiọk enye nnyụn̄ nsan̄a n̄kpere enye. Enye ekere Jehovah.—Kot Isaiah 42:8.

Okposụkedi emi ediwak mme andikabade Bible ẹsiode enyịn̄ oro ẹfep ẹkabade ẹwet “Abasi,” ye “Ọbọn̄,” enyịn̄ Abasi odu n̄kpọ nte utịm ike-7,000 ke akpasarade N̄wed Abasi usem Hebrew. Emi enen̄ede owụt ke Abasi oyom nnyịn idiọn̄ọ enyịn̄ esie.—Kot Isaiah 12:4.

2. Ntak oyomde idiọn̄ọ enyịn̄ Abasi?

Ndidiọn̄ọ enyịn̄ Abasi idịghe sụk ndidiọn̄ọ ndikot Jehovah, edi ọwọrọ ndinen̄ede n̄kpere enye. Jehovah ọwọrọ “Enye Anam Akabade Edi.” Emi owụt ke Abasi ekeme ndikabade ndi se ededi oro enye oyomde man osu uduak esie. Ntre, ndidiọn̄ọ enyịn̄ Abasi ọwọrọ ndinịm ke Abasi oyosu mme uduak esie. (Psalm 9:10) Mbuọtidem esinam mbon oro ẹdiọn̄ọde enyịn̄ Abasi ẹnịm Abasi akpa ke uwem mmọ ẹnyụn̄ ẹberi edem ke enye. Jehovah Abasi iditreke ndikpeme utọ mbon emi.—Kot Psalm 91:14.

3. Ntak emi Abasi oyomde ẹdiọn̄ọ enyịn̄ imọ?

Abasi oyom mme owo ẹdiọn̄ọ enyịn̄ imọ sia emi eyenyene ufọn ọnọ mmọ. Ndidiọn̄ọ enyịn̄ Abasi anam mme owo ẹyom ndidi ufan esie, ndien emi anam mmọ ẹnyene idotenyịn ndidu uwem ke nsinsi. Ntak edi oro Jehovah oyomde nnyịn inam mme owo ẹdiọn̄ọ enyịn̄ imọ.—Kot John 17:3; Rome 10:13, 14.

Jesus ama anam mme owo ẹdiọn̄ọ enyịn̄ Abasi ke ndikpep mmọ usụn̄ Abasi, n̄kpep mmọ Ibet ye mme un̄wọn̄ọ Esie. Mfịn, mme anditiene Jesus ke ẹka iso ẹnam mme owo ke kpukpru idụt ẹdiọn̄ọ enyịn̄ Abasi. Mmọ ẹdiana kiet ẹnam emi nte ‘ikọt enyịn̄ Abasi.’—Kot Utom 15:14; John 17:26.

4. Didie ke Abasi edinọ enyịn̄ esie ubọn̄?

Jehovah Abasi oyom ndinọ enyịn̄ esie ubọn̄ sia ediwak owo ẹsuene enyịn̄ emi. Ke uwụtn̄kpọ, ndusụk owo ẹdọhọ ke idịghe enye okobot nnyịn ye kpukpru mme odu-uwem n̄kpọ eken, ntre mmọ ikwe ufọn edikop item esie. Mmọ eken ẹdọhọ ke enye ikereke iban̄a nnyịn, ye nte ke enye edi ntak ofụri ufen emi ibọde mi. Omokụt do nte mme owo ẹbiatde Abasi enyịn̄. Edi Abasi idiyakke mmọ ẹnam emi ke nsinsi. Enye oyosobo kpukpru mbon oro ẹsuenede enyịn̄ esie.—Kot Psalm 83:17, 18.

Jehovah ọyọnọ enyịn̄ esie ubọn̄ ke ini Obio Ubọn̄ esie edisobode kpukpru ukara owo inyụn̄ inam mme owo ẹdu ke emem ye ifụre ke isọn̄ emi. (Daniel 2:44) Ibịghike, kpukpru owo ke ofụri ererimbot ẹyefiọk ke Jehovah edi ata Abasi.—Kot Ezekiel 36:23; Matthew 6:9.

Nso ke afo akpanam? San̄a kpere Abasi ke ndikpep Bible nnyụn̄ ndụk nsan̄a ye mbon oro ẹmade enye. Ke ini Jehovah edinọde enyịn̄ esie ubọn̄, enye eyeti mme anam-akpanikọ asan̄autom esie.—Malachi 3:16.

Edieke oyomde ndifiọk n̄kpọ efen mban̄a emi, mbọk kot akpa ibuot ke n̄wed Nso ke Bible Enen̄ede Ekpep, emi Mme Ntiense Jehovah ẹsiode.

[Ndise ke page 16]

Nte ẹkewetde enyịn̄ Abasi ke usem Hebrew eset