Ntak Emi N̄kpọ Aban̄ade Utịben̄kpọ Ekpebehede Fi?
“Mme utịben̄kpọ ẹbiat n̄kpọ ẹnọ ifiọk ntaifiọk.”—RICHARD DAWKINS, AKANI PRỌFESỌ UFỌKN̄WED NTAIFIỌK.
“Owụt ifiọk ndinịm ke utịben̄kpọ ẹsitịbe. Utịben̄kpọ inyeneke ntuaha ye se Bible ekpepde, edi ẹkam ẹwụt ke Abasi ama nnyịn, onyụn̄ enyene ubọk ke se enye obotde.”—ROBERT A. LARMER, PRỌFESỌ EMI EKPEPDE UKPEPN̄KPỌ AKWAIFIỌK.
“NDI emenịm ke utịben̄kpọ ẹsitịbe?” Nte ikụtde ke enyọn̄ emi, idịghe kpukpru owo ẹnịm. Edi ndi afo emenịm ke utịben̄kpọ ẹsitịbe?
Ekeme ndisọn̄ fi ndisọsọp mbọrọ ke imenịm. Afo emekeme ndikere ke emi ayanam mme owo ẹkere ke afo ufiọkke n̄kpọ m̀mê ke edi owo emi esisọpde enịm n̄kpọ ntre ntre. Ediwak owo ẹnyụn̄ ẹkere ntre n̄ko.
Mîdịghe ekeme ndidi afo emetịm enịm nte ke mme utịben̄kpọ ẹsitịbe. Afo emekeme ndinịm ke mme utịben̄kpọ oro ẹwetde ke Bible ẹma ẹtịbe, utọ nte Moses ndibahade Ididuot Inyan̄. Emekeme ndinịm n̄ko nte ke mme utịben̄kpọ ke ẹtetịbe ke eyo nnyịn emi. Ke nditịm ntịn̄, se ẹkewetde ndondo emi owụt ke “ata ediwak owo ke obio mbakara ẹnịm ke mme utịben̄kpọ ẹsitịbe. Ke uwụtn̄kpọ, n̄kpọ nte owo 75 ke otu kpukpru owo 100 ke United States ye n̄kpọ nte owo 38 ke otu kpukpru owo 100 ke Britain ẹnịm ke utịben̄kpọ ke ẹtetịbe.” (The Cambridge Companion to Miracles, emi Graham H. Twelftree ewetde) N̄kpọ efen edi ke idịghe mme Christian kpọt ẹnịm ke utịben̄kpọ ẹsitịbe. Britannica Encyclopedia of World Religions ọdọhọ ke “ekpere ndidi kpukpru ido ukpono ẹnịm” ke utịben̄kpọ ẹsitịbe.
Mîdịghe, ekeme ndidi edinyụn̄ ibọrọ nte ndusụk owo ẹsibọrọde ẹte: “Ndiọn̄ọke m̀mê utịben̄kpọ ẹsitịbe, nnyụn̄ nyomke-yom ndidiọn̄ọ! Akananam n̄kwe utịben̄kpọ.” Edi ntak emi n̄kpọ aban̄ade utịben̄kpọ ekpebehede nnyịn?
Kere ban̄a emi ise: Yak idọhọ ke emenyene udọn̄ọ oro mînyeneke usọbọ. Ekem, afo okot ke ata eti n̄wed ibọkusọbọ nte ke odu ibọk emi ekemede ndisọbọ fi idem. Ndi ukpabiatke ini udụn̄ọde use m̀mê ntre ke edi? Ukem nte ata eti n̄wed oro, Bible ọdọhọ ke utịben̄kpọ ọmọn̄ etịbe ke mîbịghike. Ndien utịben̄kpọ emi oyotụk kpukpru owo ke isọn̄. Ndi ukereke ke akpana abiat ini onyụn̄ esịn idem odụn̄ọde ese m̀mê se Bible etịn̄de emi edi akpanikọ?
Edi mbemiso idun̄ọrede ise m̀mê mme utịben̄kpọ oro Bible etịn̄de aban̄a ẹyetịbe, ẹyak ibem iso ineme n̄kpọ ita emi mme owo ẹsitịn̄de ndiwụt ke utịben̄kpọ ikemeke nditịbe.
[Ekebe ke page 3]
NSO IDI UTỊBEN̄KPỌ?
Enye edi n̄kpọ emi akande ukeme ye odudu owo.