Kpep N̄kpọ To Ikọ Abasi

Nso Iditịbe ke Usen Ikpe?

Ibuotikọ emi ọbọrọ mme mbụme emi ẹkemede ndidi emesibụp onyụn̄ owụt ebiet emi okpokụtde ibọrọ ke Bible fo. Mme Ntiense Jehovah ẹyema ndinam ibọrọ mbụme emi enen̄ede an̄wan̄a fi.

1. Nso Idi Usen Ikpe?

Nte ẹwụtde ke ndise emi odude ke nnasia mi, ndusụk owo ẹkere ke ẹyeda ukpọn̄ ediwak biliọn owo ẹdiwụk ke iso ebekpo Abasi ke Usen Ikpe man ẹda se mmọ ẹkenamde ẹkpe ikpe ẹnọ mmọ. Mmọ ẹkere ke ẹyeda ndusụk owo ẹka heaven, ẹnyụn̄ ẹtụhọde mbon eken ke ikan̄ nsobo. Edi Bible owụt ke Abasi oyom ndida Usen Ikpe nnyan̄a mme owo nsio ke ufịk. (Psalm 96:13) Abasi emek Jesus ndidi Ebiereikpe emi edikọkde kpukpru mfịna ubonowo.—Kot Isaiah 11:1-5; Utom 17:31.

2. Didie ke Usen Ikpe edikọk mfịna ubonowo?

Ke ini Adam okokoide-koi ọsọn̄ ibuot ye Abasi, enye ama anam idiọkn̄kpọ, ufen, ye n̄kpa ẹbe ẹsịm kpukpru nditọ esie. (Rome 5:12) Jesus ọyọkọk mfịna emi ke ndinam ediwak biliọn owo ẹset ẹfiak ẹdidu uwem. N̄wed Ediyarade owụt ke emi editịbe ke tọsịn isua emi Christ Jesus edikarade.—Kot Ediyarade 20:4, 11, 12.

Owo ididaha se mme akpan̄kpa ẹkenamde ke eyo uwem mmọ ibiere ikpe mmọ, edi ẹdida se mmọ ẹnamde ke ẹma ẹkeset ibiere. Edieke mmọ ẹnyịmede ndinam se idude ke “mme n̄wed” oro ẹtịn̄de ẹban̄a ke Ediyarade ibuot 20, mmọ ẹyedu uwem. (Rome 6:7) Apostle Paul ọkọdọhọ ke Abasi ayanam “ndinen owo ye mme anam ukwan̄n̄kpọ” ẹset, onyụn̄ ọnọ mmọ ifet ndikpep mban̄a imọ.—Kot Utom 24:15.

3. Nso iditịbe ke Usen Ikpe?

Ata ediwak owo ẹdu emi mîkokopke n̄kpọ ndomokiet iban̄a Jehovah Abasi tutu mmọ ẹkpan̄a. Abasi ayanam mmọ ẹset onyụn̄ ọnọ mmọ ifet ndifiọk imọ nnyụn̄ nnam n̄kpọ imọ. Edieke mmọ ẹnamde n̄kpọ Abasi, mmọ ẹyedu uwem ke nsinsi. Edi ndusụk mbon emi ẹdinamde ẹset idimaha ndikpep ndidu uwem nte Jehovah etemede. Mmọ ke Bible ọdọhọ nte ẹdisetde “ẹdụk ikpe,” oro edi, nsinsi nsobo.—Kot John 5:28, 29; Isaiah 26:10; 65:20.

Ke Usen Ikpe emi edide tọsịn isua kiet ama ekesịm utịt, Jehovah ayanam kpukpru mbon n̄kopitem ẹfọn ẹma nte Adam ọkọfọnde ama ke ini ẹkebotde enye. (1 Corinth 15:24-28) Emi owụt ke n̄kpọ eyenen̄ede ọfọn ye mmọ. Ẹyekọbi Satan kpa Devil ke editụn̄ọ ukpe ke tọsịn isua. Ekem Abasi oyosio enye ke editụn̄ọ ukpe man enye odomo mme owo akpatre udomo. Satan ayafiak odomo ndinam mme owo ẹkpọn̄ Jehovah, edi mbon oro mîtieneke Satan ẹyedu uwem ke nsinsi ke isọn̄ emi.—Kot Isaiah 25:8; Ediyarade 20:7-9.

4. Didie n̄ko ke usen ubiereikpe edinyene ufọn inọ ubonowo?

Bible ọdọhọ ke “usen ubiereikpe” edi usen emi Abasi edisobode idiọk ererimbot emi. Usen ubiereikpe emi edidi ke mbuari nte Ukwọ eyo Noah emi okosobode ofụri idiọk emana oro efep. Enem ndifiọk ke usen emi ẹdisobode “mmọ eke mîten̄eke Abasi” mi enen̄ede ekpere. Ke oro ebede, nti owo kpọt ẹdidu ke isọn̄ emi; ini oro ndien ke “edinen ido ẹdidụn̄.”—Kot 2 Peter 3:6, 7, 13.

Edieke oyomde ndifiọk n̄kpọ efen mban̄a emi, mbọk kot page 213-215 ke n̄wed Nso ke Bible Enen̄ede Ekpep?, emi Mme Ntiense Jehovah ẹsiode.

[Ndise ke page 16]

Gustave Doré, 1832-1883 owụt ke “Usen Akpatre Ubiereikpe” editie ntem

[Ebiet Ẹdade N̄kpọ Ẹto]

Doré ewet ndise emi