Mme Mbụme Bible Oro Ẹbọrọde

Nso idi Usen Ikpe?

Ke eyo Bible, Abasi ekesida mme ebiereikpe anyan̄a ikọt esie. (Judges 2:18) Bible ọdọhọ ke Usen Ikpe edidi ini inemesịt. Enye ọdọhọ ke ini oro ke Jehovah, emi edide Ebiereikpe ofụri ererimbot, edinam ubonowo ẹbọhọ utụk ye ufịk.—Kot Psalm 96:12, 13; Isaiah 26:9.

Abasi emek Jesus ete ebiere edinen ikpe ọnọ mme odu-uwem ye mme akpan̄kpa. (Utom 10:42; 17:31) Ediwak owo ẹkpa idiọn̄ọke Abasi. Ke Usen Ikpe ke Jesus edinam utọ mbon emi ẹset man mmọ ẹkpefiọk ẹnyụn̄ ẹma ata Abasi.—Kot Utom 24:15.

Ntak emi Usen Ikpe edidide ofụri tọsịn isua?

Ke tọsịn isua oro ke ẹdinam mme akpan̄kpa ẹset. (Ediyarade 20:4, 12) Ayada ini mbemiso mmọ ẹkemede ndikpep n̄kpọ mban̄a Abasi nnyụn̄ n̄kop uyo esie. Bible owụt ke ẹdida se mme owo ẹnamde ke mmọ ẹma ẹkeset ẹkpe ikpe ẹnọ mmọ, idịghe se mmọ ẹkenamde mbemiso ẹkpade, nte ediwak owo ẹkerede.—Kot Rome 6:7.

Bible etịn̄ n̄ko aban̄a usen ubiereikpe emi edidide ke ini owo mîdorike enyịn onyụn̄ ọdọhọ ke usen emi eyedi mbemiso tọsịn isua oro ọtọn̄ọde. Usen oro edi utịt oro ẹtịn̄de ẹban̄a ke page 3 esịm 8 ke magazine emi. Usen oro ke Abasi edisobo kpukpru mme idiọkowo. (2 Peter 3:7) Ntre, ọfọn iwụt ke imama Abasi.—Kot 2 Peter 3:9, 13.