MME MBỤME BIBLE ORO ẸBỌRỌDE

Abasi ekere didie?

Kpukpru nnyịn imenyene enyịn̄. Mme unam ẹnyene enyịn̄ n̄ko. Ndi iwụtke ifiọk ndinịm ke Abasi n̄ko enyene enyịn̄? Bible okot Abasi Ata Ọkpọsọn̄, Akakan Ọbọn̄ Andikara, ye Andibot, edi enye enyene ata enyịn̄.—Kot Isaiah 42:8.

Enyịn̄ Abasi odu ke Psalm 83:18 ke ediwak Bible. Ke uwụtn̄kpọ, itien̄wed oro okot ete: “Afo, emi enyịn̄ fo edide Jehovah, afo ikpọn̄ edi Ata Edikon̄ ke ofụri isọn̄.”

Ntak emi ikpokotde Abasi ke enyịn̄?

Abasi oyom nnyịn ikot imọ ke enyịn̄. Ke ini inemede nneme ye mbon oro imade, nnyịn isikot mmọ ke enyịn̄. Ndi nnyịn ikponyụn̄ inamke ntre ye Abasi? Ke adianade do, se Jesus Christ eketịn̄de owụt ke enye oyom isikot Abasi ke enyịn̄.—Kot Matthew 6:9; John 17:26.

Edi edieke iyomde ndidi ufan Abasi, ana inen̄ede ifiọk enye, idịghe ndifiọk enyịn̄ esie kpọt. Ke uwụtn̄kpọ, nso ke ọkpọbọrọ edieke owo obụpde fi ete, ‘Abasi etie didie?’ ‘Ndi owo ekeme ndinen̄ede nsan̄a n̄kpere enye?’ Bible ọbọrọ mme mbụme emi.