Ndinọ Idem Nnyịn Unyịme Unyịme ke Kpukpru Nti Utom
1 N̄wed ererimbot kiet ama etịn̄ n̄kpọ aban̄a Mme Ntiense Jehovah, ọdọhọde ete: “Ekpedi ọkpọsọn̄ n̄kpọ ndikụt mbon ido ukpono efen ekededi oro ẹnamde utom ọkpọsọn̄ ntre ke ido ukpono mmọ nte Mme Ntiense ẹnamde.” Ntak emi Mme Ntiense Jehovah ẹnamde utom ọkpọsọn̄ ntre ye utọ edu unyịmesịt oro?
2 Ntak kiet edi nte ke ekikere kaban̄a nte ini edide usọp usọp akara mmọ. Jesus ama ọfiọk ete ke imọ ikenyene ekpri ibio ini ndikụre utom imọ ke isọn̄. (John 9:4) Ke adan̄aemi Eyen Abasi oro ẹnọde ubọn̄ akarade ke ufọt mme asua esie mfịn, ikọt Jehovah ẹfiọk ẹte ke mmimọ inyene ekpri ibio ini ndinam utom mmimọ. Ke ntre, mmọ ẹkaiso ndinọ idem mmọ unyịme unyịme ndinam edisana utom. (Ps. 110:1-3) Ke emi ẹyomde ediwak mme anamutom mi ke idọk, mmọ ikemeke nditek ke ifịk mmọ. (Matt. 9:37, 38) Ntem, mmọ ẹdomo ndikpebe Jesus, emi okonịmde mfọnmma uwụtn̄kpọ ke unyịmesịt ye ifịk ke utom esie.—John 5:17.
3 Ntak efen oro Mme Ntiense Jehovah ẹnamde utom ke ofụri ukpọn̄ nte ẹnam ẹnọ Jehovah edi nte ke esop ofụri ererimbot mmọ okpụhọde ye kpukpru ido ukpono eken. Mme esop ido ukpono ererimbot nte ido edide ẹyom sụk esisịt ini ye ukeme ẹto mme andibuana. Se mmọ ẹnịmde ke akpanikọ ẹnyene esisịt mîdịghe inyeneke-nyene n̄kpọ ndinam ye uwem mmọ eke usen ke usen, edinam mmọ ye mbon efen, m̀mê se mmọ ẹbịnede ke uwem. Sia mînyeneke odudu oro ata mbuọtidem enyenede ndinụk owo anam n̄kpọ, mmọ ẹyịre mme ekpemerọn̄ mmọ ẹte ‘ẹtịn̄ inem ikọ ẹnọ mmimọ,’ ẹnọde mmọ nsọn̄ọ ẹte ke ekpri ukeme mmọ ekem. (Isa. 30:10) Mme ọkwọrọ ederi ẹnam se mmọ ẹmade ebe ke ‘ndidebe mmọ utọn̄,’ ẹsịn mmọ edu unana udọn̄ ye ifu eke spirit ke idem.—2 Tim. 4:3.
4 Nso ukpụhọde odu ntem ke otu ikọt Jehovah! Kpukpru n̄kpọ oro ẹban̄ade utuakibuot nnyịn ẹbuana ukeme, edisịn̄ede idem, ye utom. Kpukpru usen ye ke kpukpru se nnyịn inamde, nnyịn inam se nnyịn inịmde ke akpanikọ. Ke adan̄aemi akpanikọ adade ekese idatesịt ọsọk nnyịn, enye abuana “ọkpọsọn̄ en̄wan” man nnyịn inam se enye oyomde. (Men 1 Thessalonica 2:2 domo.) Ndikam nse mban̄a mme mbiomo eke edidu uwem ke usen ke usen ekem ndinam ata ediwak owo ẹnana ini. Nte ededi, nnyịn iyakke mme mbubehe ẹmi ẹbiọn̄ọ nnyịn ndinịm udọn̄ n̄kpọ Obio Ubọn̄ akpa.—Matt. 6:33.
5 Se ẹnọde nnyịn inam ke utom Jehovah enen̄ede enyene ufọn onyụn̄ edi usọp usọp tutu onụk nnyịn ‘ndidep’ ifet nto mme mbubehe eken nnyụn̄ nda enye nnam mme n̄kpọ eke spirit ke usụn̄ oro enen̄erede enyene ufọn. (Eph. 5:16) Sia ifiọkde ite ke uten̄e Abasi ye edu unyịmesịt nnyịn ẹnem Jehovah esịt, nnyịn imenyene n̄kponn̄kan n̄kpọ oro onụkde nnyịn ndika iso nnam ọkpọsọn̄ utom nnyịn. Ye ediwak edidiọn̄ oro nnyịn ibọde idahaemi ye idotenyịn uwem ke ini iso, ubiere nnyịn edi ndika iso ‘n̄kpa utom ye en̄wan’ kaban̄a udọn̄ n̄kpọ Obio Ubọn̄.—1 Tim. 4:10.
6 Edisịn Idem ye Edu N̄waidem: Ata ediwak owo mfịn ẹnọ inyene ye udọn̄ n̄kpọ obụkidem akpa itie ẹkan kpukpru n̄kpọ efen. Mmọ ẹnen̄ede ẹkụt unen ẹnọ idem ke ndiwụk ntịn̄enyịn ke se mmọ ẹdidiade, se ẹdin̄wọn̄de, m̀mê se ẹdisịnede. (Matt. 6:31) Sia mîyụhọke ye mme akpan n̄kpọ oro ẹyomde, utịtmbuba eke edidu ọyọhọ ọyọhọ inem uwem idahaemi nnyụn̄ ‘mbon ediwak n̄kpọ nte edikemde ediwak isua, man otode mmọ ẹduọk odudu, ẹdia, ẹn̄wọn̄, ẹnyụn̄ ẹdat esịt,’ onụk mmọ ndinam n̄kpọ. (Luke 12:19) Owo ekededi emi esikade ufọkabasi ekere ete ke ọkpọkpọ ukeme ekededi oro ido ukpono imọ oyomde edi ndibọ imọ unen imọ. Ekikere edikpọnọde inyene obụkidem nnịm n̄kan̄ kiet m̀mê idem edisụhọde ubọk ke uyom inyene m̀mê ediyak udọn̄ inemesịt atak edi n̄kpọ itekesịt. Ye ekikere esie ọkọn̄ọde ke idemesie, edikọri edu n̄waidem idịghe ata idem n̄kpọ, iwụtke ifiọk.
7 Nnyịn ise n̄kpọ emi ke isio isio usụn̄. Ikọ Abasi emenede ekikere nnyịn ke enyọn̄ anamde nnyịn inyene ekikere Abasi utu ke ndinyene ekikere owo. (Isa. 55:8, 9) Nnyịn imenyene mme utịtmbuba ke uwem oro ẹkon̄de ẹkan eke edibịne mme n̄kpọ obụkidem. Ediwụt unen itie edikara Jehovah ye edinam enyịn̄ esie asana ẹdi ata n̄kponn̄kan eneni ke ofụri ekondo. Ubom eneni ẹmi okpon tutu, ke emende ẹdomo, kpukpru mme idụt “ẹdi ikpîkpu ke iso esie.” (Isa. 40:17) Ana ẹse ukeme ekededi oro isịnde ndidu uwem nnyịn ke usụn̄ oro mîkemke ye uduak Abasi nte ndisịme.—1 Cor. 3:19.
8 Ntre ke adan̄aemi ẹyomde ndusụk n̄kpọ obụkidem ndien mbon eken ẹnyụn̄ ẹnyenede ufọn ke ndinam utom Obio Ubọn̄ nnyịn, nnyịn imọfiọk ite ke mmọemi inen̄ekede idi “se ifọnde ikan.” (Phil. 1:10) Nnyịn isọn̄ọ iyịre ye edu 1 Timothy 6:8 ke ndisụhọde udomo oro nnyịn isịnde ke ndibịne mme udọn̄ n̄kpọ obụkidem inyụn̄ idomo ndida ọniọn̄ nsịn esịt nnyịn ke ‘se owo mîkwe ke enyịn oro ẹdibịghide ke nsinsi nsinsi.’—2 Cor. 4:18.
9 Adan̄a nte nnyịn inyenede ekikere Abasi, ntre ke editịmede esịt nnyịn kaban̄a mme n̄kpọ obụkidem osụhọde ubọk. Ke ini nnyịn ikerede iban̄a se Jehovah anamde ọnọ nnyịn ye mme utịbe utịbe edidiọn̄ ẹmi enye ọn̄wọn̄ọde ke ini iso, nnyịn imenyịme ndinam n̄waidem ekededi oro enye oyomde oto nnyịn. (Mark 10:29, 30) Nnyịn inyene uwem ito enye. Mîkpedịghe mbọm ye ima esie, nnyịn ikpenyeneke uwem idahaemi ikponyụn̄ inyeneke ini iso ndomokiet. Obiomo nnyịn ndinọ idem nnyịn, sia kpukpru n̄kpọ oro nnyịn inamde ke utom esie edi “kpa se nnyịn ikpanamde.” (Luke 17:10) N̄kpọ ekededi oro ẹdọhọde nnyịn inọ Jehovah, nnyịn isinọ ye idatesịt, ifiọkde ite ke nnyịn ‘iyedọk uwak uwak.’—2 Cor. 9:6, 7.
10 Ẹyom Mme Anamutom Unyịmesịt Idahaemi: Ọtọn̄ọde ke ata ntọn̄ọ ntọn̄ọ esie, esop Christian ama odụk ini ọkpọsọn̄ utom. Ẹkenyene ndinọ ọyọhọ ikọ ntiense mbemiso ẹkekande Jerusalem ke 70 E.N. Ke ini oro ‘ukwọrọikọ Abasi ama efịk’ mme mbet Jesus. (Utom 18:5) Usọp usọp n̄kọri oro akadade itie ama oyom ẹnọ ediwak mme ọkwọrọikọ ye mme ekpemerọn̄ oro ẹnyenede usọ ukpep ẹnyụn̄ ẹyom un̄wam mmọ. Ẹma ẹyom irenowo oro ẹnyenede ifiọk ke nte ẹnamde n̄kpọ ye ukara ọkọrọ ye mbon oro ẹnyenede ukeme ndise mban̄a nte ẹbọde ẹnyụn̄ ẹdemede mme n̄kpọ obụkidem. (Utom 6:1-6; Eph. 4:11) Ke adan̄aemi ibat ibat owo ẹkenamde n̄kpọ ke idaha oro ọwọrọde iso, ata ediwak ẹkedu ke idaha oro mîwọrọke iso. Edi kpukpru mmọ ẹma “ẹn̄wana etieti,” ẹnamde utom ọtọkiet ke ofụri esịt man ẹkụre utom emi.—Luke 13:24.
11 Okposụkedi ekedide nte ke esisịt udọn̄ okodu ọnọ edinam utom ọkpọsọn̄ ke udomo eke ofụri ererimbot ke ediwak isua ikie oro ẹketienede, ẹma ẹfiak ẹtọn̄ọ ndinam utom Obio Ubọn̄ ke akamba udomo ke ini Jesus ama ọkọbọ odudu Obio Ubọn̄ esie ke 1914. Akpa kan̄a, ibat ibat owo ẹkefiọk ẹte ẹyeyom ata ediwak mme anamutom ntre ẹnam utom ke ufọn n̄kpọ Obio Ubọn̄, oyomde ediwak miliọn mbon unyịmesịt ẹn̄wam ke mme idụt ke ofụri ererimbot.
12 Mfịn esop esịn idem ntotụn̄ọ ntotụn̄ọ ke nsio nsio utom edibọp ikpọ n̄kpọ ẹmi ẹkpade nnyịn ekese. Utom Obio Ubọn̄ ke akaiso ke akamba udomo. Nte ini nnyịn edide usọp usọp onụk nnyịn ndisịn̄ede idem nnyịn ndinyụn̄ nda kpukpru n̄kpọ oro inyenede nnam utom emi anade nnyịn ke iso. Ke emi utịt editịm n̄kpọ emi otịmde asan̄a ekpere mi, nnyịn imodori enyịn ke utom oro akam okponde akan odu ke ini iso. Ẹben̄e kpukpru asan̄autom Jehovah oro ẹma ẹkeyak idem ẹnọ ẹte ẹnọ idem unyịme unyịme ke usọp usọp utom editan̄ mbok emi.
13 Nso ke Oyom Ẹnam? Nnyịn ke akpanikọ imekeme ndidọhọ ke ‘iyọhọ kpukpru ini ke utom Ọbọn̄.’ (1 Cor. 15:58) Ke ediwak efakutom idọk adat, edi mme anamutom iwakke. Ẹnọ nnyịn ikot ndinam udeme nnyịn idịghe ke ndinọ ọyọhọ ọyọhọ ikọ ntiense kpọt ke ofụri efakutom nnyịn edi n̄ko ndisịm n̄kpọ-ata eke edinam utom ke ebiet udọn̄ okponde akan.
14 Edi n̄kpọ odotde itoro ndikụt nte Mme Ntiense ke kpukpru ikpehe ererimbot ẹnọde idemmọ unyịme unyịme kaban̄a mme utom eken. Ẹmi ẹkeme nditọn̄ọ ke edinyịme ndinam utom ke edibọp mme itie utuakibuot, edinam utom ke ikpọ mbono, ye edin̄wam ke mme n̄kpọ un̄wam ke mme ini afanikọn̄ tutu osịm edinam Ufọkmbono Obio Ubọn̄ n̄kann̄kụk asana ofụri ini. Kaban̄a akpatre emi, se idude edi ndikụt kpukpru ini nte ke ẹkpọn̄ Ufọkmbono Obio Ubọn̄ ke edisana ye eti idaha ke mbonoesop kiet kiet asuanade. Ndinam mme utom oro ẹtiede nte usụhọde owụt nnennen edifiọk se ikọ Jesus oro ke Luke 16:10 ọwọrọde: “Owo eke anamde akpanikọ ke ata ekpri n̄kpọ onyụn̄ anam akpanikọ ke akamba n̄kpọ; owo eke akwan̄ade ke ata ekpri n̄kpọ onyụn̄ akwan̄a ke akamba n̄kpọ.”
■ Ndinọ Un̄wam ke Mme Utom Esop: Ke adan̄aemi esop kiet kiet anamde n̄kpọ nte ubak ofụri ndutịm onyụn̄ ọbọde ndausụn̄ oto “asan̄autom emi anamde akpanikọ, onyụn̄ enyenede ọniọn̄,” mme asuanetop Obio Ubọn̄ kiet kiet ẹnam enye. (Matt. 24:45) Se enye anamde ọkọn̄ọ akamba akamba ke udomo oro Ntiense kiet kiet onyịmede onyụn̄ ekemede ndinam n̄kpọ. Esop owụk ntịn̄enyịn ke ndinam ẹkwọrọ eti mbụk ke efakutom esie, ẹnam mbufa mbet, ndien ekem ẹsọn̄ọ mmọ idem ke n̄kan̄ eke spirit. Nnyịn owo kiet kiet imekeme nditịp n̄kpọ nsịn ke utom emi. Nnyịn n̄ko imekeme ndinịm mme utịtmbuba nnọ idem nnyịn ke ukpepn̄kpọ idemowo, edibuana uforo uforo ke mme mbonoesop, ye edin̄wam mbon oro ẹyomde un̄wam ke esịt esop. Mme utom ẹmi ẹnọ nnyịn nti ifet ndiwụt unyịme nnyịn.
■ Ndida Iso Nte Mbon Oro Ẹsede Enyịn: Jehovah ayak edise enyịn ke esop kiet kiet esịn mbiowo esop oro ẹmekde ke ubọk. (Utom 20:28) Mmọemi ẹdi irenowo oro ẹkenyanarede ẹbịne man otode ẹdot ke ifetutom emi. (1 Tim. 3:1) Ekpere ndidi kpukpru nditọete irenowo ke esop ẹnyene ukeme ndidot ndinyene mme ifetutom ẹkponde ẹkan. Ediwak nditọete ke ẹkọri ke n̄kan̄ eke spirit ndien oyom mmọ ẹkọri ke idak ndausụn̄ ye ima ima un̄wam mbiowo esop. Irenowo ẹmi ẹkpenyene ndidi ifịk ifịk nditọ ukpepn̄kpọ Bible ye mme n̄wed nnyịn. Mmọ ẹkeme ndiwụt unyịme mmọ ke ndisụk idem nnọ mbiowo oro ẹmekde ke spirit, ẹkpebe mbuọtidem mmọ, ẹnyụn̄ ẹkọri mme edu oro ẹyomde ẹto mme esenyịn.—Heb. 13:7, 17.
■ Ndidụk Utom Uyọhọ Ini: Esop odu akpan akpan man ọkwọrọ eti mbụk. (Matt. 24:14) Nso edidiọn̄ ke edi ntem ke ini mbon oro ẹnyenede ifịk ẹsịnde ukeme efen efen ebe ke ndisịn enyịn̄ nte mme asiakusụn̄! Emi esiwak ndibuana edinam mme ukpụhọde ke ọkpọkpọ uwem mmọ. Ekeme ndiyom mmọ ẹnam mme ukpụhọde efen efen man ẹkaiso ke san̄asan̄a iso utom emi. Edi mbon oro ẹsisọn̄ọde ẹmụm ifetutom emi ẹkama utu ke ndikpọn̄ enye ke isua kiet m̀mê akande oro ebede ke ntak ndusụk edikpu ke ibio ini isitreke ndinyene uwak edidiọn̄ Jehovah. Ima ima mbiowo ye mbon en̄wen oro ẹkọride ẹsịm ọyọhọ idaha ẹkeme nditịp n̄kpọ nsịn ke mme asiakusụn̄ ndikụt unen, ẹsịnde udọn̄ ẹnọ mmọ ke ikọ ye ke edinam. Nso eti edu ke mme uyen oro ẹsibede ẹdụk utom usiakusụn̄ nnennen ke ini ẹkụrede ufọkn̄wed ẹwụt ntem! Ukem oro ke edi ye ikpọ owo oro ẹsisịnde enyịn̄ nte mme asiakusụn̄ uyọhọ ini ke ndondo oro mbiomo utom idịbi udia mmọ osụhọde ubọk. Nso uyụhọ ke emi esida ntem ọsọk Christian oro ama akayak idem ọnọ ke ini enye adianade kiet ye Jehovah ke usọp usọp utom editan̄ mbok emi!—Isa. 60:22.
■ Ndibuana ke Edibọp ye Edikama Mme Itie Mbonoesop: Ke ẹbọp ataata edibọp mme Ufọkmbono Obio Ubọn̄ eke eyomfịn ke mme itie ikie ndien ẹdiọn̄ ediwak mme Itie Mbono. Ke n̄kpaidem, ekpere ndidi nditọete nnyịn iren ye iban oro ẹnọde ini ye usọ utom mmọ unyịme unyịme ẹnam ofụri utom emi. (1 Chron. 28:21) Ediwak tọsịn mme anamutom unyịmesịt ẹnam mme itie ẹmi ẹdu ke eti idaha ebe ke ndinam utom ekededi oro ẹyomde. (2 Chron. 34:8) Sia utom emi edide ikpehe edisana utom kiet, mbon oro ẹn̄wamde ẹnọ idemmọ unyịme unyịme, idọhọke ẹnọ mmimọ okụk ekpatọfọn̄ ke utom mmimọ ke afan̄ emi, kpa nte mmọ mîsidọhọke ẹkpe mmimọ okụk ke ndikwọrọ ikọ ke ufọk ke ufọk, edinọ utịn̄ikọ an̄wa ke esop, m̀mê ke ndin̄wam ke utom ke ikpọ m̀mê n̄kpri mbono. Mme anamutom unyịmesịt ẹmi ẹnam utom mmọ ke mfọn ke ndidiomi nnyụn̄ mbọp mme itie utuakibuot nditoro enyịn̄ Jehovah. Mmọ ẹn̄wam ifịk ifịk ke ndinam mme utọ n̄kpọ nte ediwet n̄kpọ nyọhọ mme babru ẹnyenede n̄kpọ ndinam ye ibet, edinịm n̄wetnnịm n̄kpọ aban̄ade okụk, edinam mbubehe udep n̄kpọ, ye edinam ibat mme n̄kpọutom oro ẹyomde. Mme utọ anam-akpanikọ asan̄autom Jehovah ẹmi isimenke okụk oro mîsịneke idori m̀mê ndiyom udori n̄kpọ obụkidem ke usụn̄ ekededi edide nnennen m̀mê ke usụn̄ efen nto mme utom oro mmọ ẹnamde, sia ẹma ẹkeyak ofụri ukeme ye inyene mmọ ẹnọ Jehovah. Utom emi oyom mme ifịk ifịk anamutom ẹmi ẹnamde utom mmọ “ke ofụri esịt, nte n̄kpọ eke ẹnamde ẹnọ Ọbọn̄.”—Col. 3:23.
15 Nso, ndien, inam unyịmesịt ikọt Jehovah edi n̄wọrọnda? Edi edu edinọnọ. Enọ ntatubọk mmọ abuana se ikande okụk m̀mê inyene obụkidem—mmọ “ẹnọ idemmọ unyịme unyịme.” (Ps. 110:3, NW) Emi edi se ediyak idem nnyịn nnọ Jehovah ọwọrọde. Ẹnọ nnyịn utịp ke n̄wọrọnda usụn̄. Nnyịn imenyene “inemesịt” ndien nnyịn ‘imọdọk uwak uwak’ koro mbon efen, ẹmi ẹnọde nnyịn enọ ke usiene, ẹdara se nnyịn inamde. (Utom 20:35, NW; 2 Cor. 9:6; Luke 6:38) Akakan Anam-ufọn nnyịn edi Ete nnyịn eke heaven, Jehovah, emi ‘amade owo eke ọnọde ke inemesịt.’ (2 Cor. 9:7) Enye ọyọnọ nnyịn utịp utịm ike-ikie, ye mme edidiọn̄ oro ẹdibịghide ke nsinsi. (Mal. 3:10; Rome 6:23) Ntre ke ini mme ifet ẹbererede ẹnọ fi ke utom Jehovah, nte afo ọyọnọ idemfo unyịme unyịme onyụn̄ ọbọrọ nte Isaiah ọkọbọrọde ete: “Se mi, dọn̄ mi utom”?—Isa. 6:8.