N̄wam Mbon Efen Ẹkụt Ufọn Bible
1 Jesus ama ọnọ se mme mbet esie ẹkeyomde. Luke 24:45 obụk ete: “Enye an̄wan̄ade mmọ ikike, man mmọ ẹfiọk ikọ Abasi.” Enye ama ọfiọk ete ke edieke mmọ ẹyomde ndinyene unyịme Ete esie, ke edi akpan n̄kpọ mmọ ndikpep nnyụn̄ mfiọk Ikọ Abasi, kpa Bible. (Ps. 1:1, 2) Utom ukwọrọikọ nnyịn enyene ukem uduak oro. Utịtmbuba nnyịn edi nditọn̄ọ mme ukpepn̄kpọ Bible, emi nnyịn ikemede ‘ndikpep mme owo ẹnam kpukpru n̄kpọ eke Jesus eketemede.’ (Matt. 28:20) Ye emi ke ekikere, se itienede ẹmi ẹdi ndusụk ekikere ke mme n̄kpọ oro ẹkemede ndidi n̄kpọ un̄wam ke ini afo anamde mme mfiakn̄ka.
2 Edieke afo okokotde Joshua 1:8 ke akpa ediwaha fo, afo emekeme ndikaiso ke nneme fo ke usụn̄ emi:
◼ “Mfiak ndi man mbuana ndusụk ekikere efen efen ye afo kaban̄a ntak ẹkedọhọde Joshua okot Bible ke usen ke usen. Ẹkụt ibọrọ kaban̄a mme ata awak-n̄kukọhọ mfịna oro owo osobode m̀mê oro edisobode ke Bible. Nte item esie ọfọnde inyeneke mbiet. Etop emi enyene odudu onyụn̄ enyene ufọn. Edi ndi afo emekere ke Bible ọnọ nnyịn nyayama idotenyịn ekededi, oro edibịghide ke nsinsi?” Kot Isaiah 25:8. Kụbọde ka ọyọhọ Mbụk 116 nyụn̄ neme ndusụk ikpehe ekikere, owụtde ntak edide akpan n̄kpọ enye ndibọ nnennen ifiọk Abasi. Nam ndutịm ndifiak n̄ka n̄konịm ukpepn̄kpọ Bible ofụri ini.
3 Edieke afo ekenemede nneme ye owo oro okowụtde udọn̄ ke Bible, do ekeme ndidi usụn̄ edisobo enyeemi ye owo eyenyene uforo ndida ntọn̄ọ ukpepn̄kpọ:
◼ “Ekpere ndidi kpukpru mbon oro afo adade enyene nneme ẹdidọhọ fi ke mmimọ ikpama ndinyene ererimbot oro emem ye ifụre ẹdude man idụn̄. Edieke oro edide se kpukpru owo ẹyomde, ntak emi nnyịn inyenede ererimbot oro ọyọhọde ye ekese ndutịme ye afai-a?” Bet ibọrọ. Nam an̄wan̄a nte ke idiọk ukara Satan edi ntak mme idiọk idaha oro ẹdude mfịn. Kot Mme N̄ke 29:2. Kụbọde ka ọyọhọ Mbụk 114 nyụn̄ nam an̄wan̄a nte Abasi edidade Jesus Christ anam n̄kpọ man ada utịt ọsọk idiọkido onyụn̄ owụk ererimbot emi enyenede nsinsi emem ye inemesịt. Kot Ediyarade 21:3, 4. Afo ndien emekeme ndidọhọ: “Mma mfiak ndi ini efen, nyema ndiwụt fi ndusụk itien̄wed Abasi oro ẹnamde an̄wan̄a ntak emi afo ekemede ndidori enyịn ke ererimbot oro mfụhọ mîdidụhe.”
4 Edieke afo ekenemede aban̄a se ikpepde ito mme utịben̄kpọ Jesus ke akpa ediwaha, afo emekeme nditịn̄ emi ke ini afiakde aka:
◼ “Ke nneme nnyịn isan̄ oko, nnyịn ima ikpep nte ke mme utịben̄kpọ oro Jesus akanamde ẹkedi edibem iso n̄wụt se enye edinamde ke ini Ukara Tọsịn Isua esie. Oyom ikpep N̄wed Abasi edieke anade nnyịn ibọ ufọn ito itie edikara esie. Edisịn ukeme esịt akpanikọ ndinen̄ede nnam emi ekeme ndin̄wam nnyịn ifiọk se Abasi onịmde ọnọ nnyịn. [Kot John 17:3.] Nnyịn imanam ndutịm ukpepn̄kpọ Bible oro an̄wamde ediwak tọsịn owo ẹkpep ekese ẹban̄a se Abasi ọn̄wọn̄ọde ye nte nnyịn ikemede ndinem enye esịt.” Wụt n̄wed Ndidu Uwem ke Nsinsi, dụn̄ọde mme enyịn̄ ibuotikọ, nyụn̄ nam wụt nte nnyịn isinịmde ukpepn̄kpọ Bible.
5 Edieke afo ekemede ndin̄wam mbon oro ẹnyenede esịt akpanikọ ẹwụt esịtekọm ẹnọ akakan ufọn oro Ikọ Abasi enyenede, afo aman̄wam mmọ ke mfọnn̄kan usụn̄ oro ekemede. Ọniọn̄ oro mmọ ẹkemede ndikpep ke ndikpep se idọn̄ọde ke enye ekeme ndidi “eto uwem,” emi edidade ekese inemesịt isọk mmọ.—N̄ke 3:18.