Bọ Ufọn To Ufọkn̄wed Utom Ukara Abasi eke 1996—Ikpehe 1
1 Nte afo omokot mme item ẹnọde ẹmi ẹsịnede ke “Ndutịm Ufọkn̄wed Utom Ukara Abasi eke 1996”? Nte afo ama okụt ndusụk ukpụhọde? Ọtọn̄ọde ke January osịm April, Utịn̄ikọ Ọyọhọ 3 edikọn̄ọ ke ekpri n̄wed Me Ibuot-ikö Bible Ndida Nyene Neme, ndien ọtọn̄ọde ke May osịm December, enye edikọn̄ọ ke n̄wed Ifiọk oro ẹsiode obufa. Utịn̄ikọ Ọyọhọ 4 edidi utịn̄ikọ aban̄ade nsio nsio owo ke Bible ke urua kiet kiet.
2 Utịn̄ikọ Nditọ Ufọkn̄wed: Ẹnọ eyenete an̄wan utịn̄ikọ Ọyọhọ 3. Ke ini ọkọn̄ọde ke n̄wed Me Ibuot-ikö Bible Ndida Nyene Neme, nte ẹtịmde ekpenyene ndibuana unọ ikọ ntiense eke enyịnusụn̄ ke enyịnusụn̄ m̀mê eke ido nneme. Ke ini ọkọn̄ọde ke n̄wed Ifiọk, ẹkpenyene ndineme enye nte mfiakn̄ka m̀mê ukpepn̄kpọ Bible. Emi ekpenyene ndidi ata n̄kpọ un̄wam, sia ẹdikamade n̄wed Ifiọk ntatara ntatara ke ndinịm mme ukpepn̄kpọ Bible.
3 Edieke nte ẹtịmde edide ukpepn̄kpọ Bible, nditọete iban iba oro ẹkeme nditetie. Tọn̄ọ ukpepn̄kpọ nnennen ebe ke nditịn̄ ibio ibio ntọn̄ọikọ, ndien ekem bụp mbụme oro ẹmịn̄de-mịn̄. Ẹkpenyene ndinam udeme enyeneufọk etie nte ata idem n̄kpọ. Ẹkeme ndikụbọde mme itien̄wed oro ẹsiakde ẹsịn nnyụn̄ n̄kot nte ini ayakde. Eyenete an̄wan oro ekpenyene ndikama usọ unọ ukpep nnam enyeneufọk etịn̄ ekikere esie ebe ke ndida mme mbụme nnyụn̄ n̄kọk ibuot ke mme itien̄wed oro ẹkamade.
4 Nso ke ẹkpenam edieke mme itien̄wed oro ẹsiakde ke utịn̄ikọ oro ẹwakde ẹkan se ẹkemede ndineme ke minit ition? Sat akpan itien̄wed ẹmi ẹsiode mme akpan n̄kpọ ẹwụt. Edieke ibat ibat itien̄wed kpọt ẹdude, ẹkeme ndineme mme akpan n̄kpọ oro odude ke ukpepn̄kpọ oro ata ntatara ntatara. Ke ini ke ini, ẹkeme ndikot ikpehe ekikere kiet m̀mê udịmikọ kiet nto n̄wed oro ndien ekem ẹneme ye enyeneufọk.
5 Asuanetop emi utịn̄ikọ esie osịmde akpatre ikpehe ekikere ke ibuotikọ oro ekeme ndinam ibio ibio ndụn̄ọde ke ekebe ẹkotde “Domo Ifiọk Fo Se,” emi odude ke utịt ibuot kiet kiet ke n̄wed Ifiọk. Ẹkeme ndineme n̄ko mme ekebe ntọt ẹmi ẹdude ke ikpehe ekikere oro ẹnọde n̄kpọ ẹnam nte ini ayakde. Edieke ekebe ntọt esịnede ke ufọt utịn̄ikọ oro ẹnọde owo iba, eyenete an̄wan oro ebemde iso enyene utịn̄ikọ ekeme ndineme enye. Ẹkeme nditịn̄ n̄kpọ ntụk mme ndise ẹdude ke n̄wed oro ini ekededi oro mmọ ẹnyenede ebuana ye se ẹnemede.
6 Utịn̄ikọ Ọyọhọ 4 ekpenyene ndinen̄ede ndemede udọn̄ nnyụn̄ nnyene ufọn. Ke urua kiet kiet enye edineme iban̄a mbụk aban̄ade ata idem n̄kpọ otode Bible. Dụn̄ọde ye ntịn̄enyịn se se mme n̄wed N̄ka eken ẹnyenede nditịn̄ mban̄a mme itie oro ẹnọde n̄kpọ ẹnam. Tat utịn̄ikọ oro kanade ibuotikọ, nyụn̄ sat mme itien̄wed Bible ẹmi ẹdin̄wamde otuowo owụk ntịn̄enyịn ke ibuotikọ ye mme ukpepn̄kpọ ekededi oro nnyịn ikemede ndikpep nto.
7 Edieke nnyịn ibọde ufọn ọyọhọ ọyọhọ ito ukpep oro ẹnọde ke ufọkn̄wed, nnyịn iyekeme ‘ndikwọrọ ikọ’ otịm ọfọn ke usụn̄ oro owụtde eti ‘usọ unọ ukpep.’—2 Tim. 4:2.