Nditan̄a Akpanikọ ke Usen ke Usen ke Ndikpebe Jesus
1 Jesus ama enyene akpan utom ndinam ke ini enye ekedide isọn̄. Emi ekedi ata mmemmem: ‘Ndidi ntiense nnọ akpanikọ.’ (John 18:37) Enye ama atan̄a akpanikọ ẹban̄ade mme utịbe utịbe edu ye uduak Ete esie. Utom emi eketie nte udia ọnọ enye; ofụri uwem esie ọkọkọn̄ọ ke utom oro. (John 4:34) Luke ọkọtọt ete ke Jesus ama akaiso ‘ekpep mmọ n̄kpọ ke usen ke usen ke temple.’ (Luke 19:47) Jesus ama ada ini oro okodude anam n̄kpọ ọyọhọ ọyọhọ. (John 9:4) Esisịt ini mbemiso n̄kpa esie, enye ama ekeme ndidọhọ Ete esie ete: “Ami mma nnọ Fi ubọn̄ ke isọn̄, ke emi n̄kanamde utom eke Afo ọkọnọde Mi nnam.”—John 17:4.
2 Ke ini esịt nnyịn ọyọhọde ye esịtekọm kaban̄a kpukpru se Jehovah anamde, esinụk nnyịn kpasụk ntre ndineme mban̄a enye kpukpru usen. Nnyịn ikabade itie ukem nte mme mbet Jesus ẹmi ẹketan̄ade uko uko ẹte: ‘Nnyịn ikemeke nditre nditịn̄ se nnyịn ikokụtde inyụn̄ ikopde.’ (Utom 4:20) Mmọ ndineme mban̄a Jehovah ekedi n̄kaiso n̄kpọ, koro n̄wetnnịm n̄kpọ ọdọhọ ete “kpukpru usen . . . mmọ idopke uyo.” (Utom 5:42, sịghisịghi ubọkn̄wed edi eke nnyịn.) Nnyịn ikpenyene ndibụp idem nnyịn ite, ‘Nte ami ndi andikpebe Andikpep mi, kpa Jesus?’
3 Ndikwọrọ Ikọ Usọp Usọp: Jesus ama ebem iso etịn̄ ete ke ẹma ẹketan̄a etop Obio Ubọn̄ oro ke ofụri isọn̄, “ndien adan̄aoro ke utịt eyedi.” (Matt. 24:14) Emi ekpenyene ndinam nnyịn ifiọk nte utom nnyịn edide akpan n̄kpọ onyụn̄ edide usọp usọp. Ye uwem ataata ediwak miliọn owo odude ke itiendịk, emi edi ata akpan utom m̀mê utom oro enyenede ufọn akan oro nnyịn ikemede ndinam. Sia edide editịm n̄kpọ emi ke ekpere utịt esie, ẹsịbe ini osụhọde ndikụre utom emi omụhọ!
4 Ntọt ẹwụt ẹte ke Jehovah ke anam utom editan̄ mbon mbieterọn̄ mbok awara. (Isa. 60:22) Ke ediwak ikpehe ererimbot, mme owo ke ẹbụn̄ọ ke ataata usụn̄ ẹdụk akpanikọ, ke nditịm ntịn̄, ẹtan̄ade idara idara ẹte: “Ẹyak nnyịn ika ye mbufo: koro nnyịn imokop ite ke Abasi odu ye mbufo”! (Zech. 8:23) Mme ikọ Jesus ẹmi ẹtịm ẹdi akpanikọ ẹkan ini ekededi ke edem: “Idọk okpon edi mme anam-utom iwakke. Ẹben̄e . . . Enyene-idọk ẹte, Enye osio mme anam-utom ọdọn̄ edi ke idọk Esie.” (Matt. 9:37, 38) Nte oro isịnke udọn̄ inọ nnyịn ndinyene nsịnifịk nte mme mbet Jesus ẹmi ‘ẹkedude ke temple kpukpru ini, ẹnọ Abasi itoro’?—Luke 24:53.
5 Nam Ẹdiọn̄ọ Akpanikọ ke Usen ke Usen: Nnyịn ikpenyene ndiyom usụn̄ kpukpru usen, nditịn̄ akpanikọ nnọ mbon en̄wen. Ifet esiwak ndidu. Nte afo emekeme ndinọ owo emi etiede ekpere fi ke n̄kpọisan̄ ofụri owo ikọ ntiense? Mîdịghe nso kaban̄a ediwet leta nnọ owo oro afo mûkekemeke ndikụt ke ufọk? Ndi akanam emekere ndinọ owo emi anyamde n̄kpọ ke ufọkurua m̀mê mme owo ẹmi afo osobode ke urua tract m̀mê magazine ke ini edepde n̄kpọ? Eyedi, afo emekeme ndikere mban̄a ediwak ifet en̄wen ẹmi afo enyenede ke usen ke usen ndibuana idotenyịn fo ye mbon en̄wen. Edieke afo esịnde ukeme onyụn̄ owụtde esisịt uko, Jehovah eyen̄wam fi.—1 Thess. 2:2.
6 Ntre, nte nnyịn itọn̄ọde mme edinam usen kiet kiet, nnyịn ikpenyene ndibụp idem nnyịn ite, ‘Nte ami nyenam usio-ukot ndibuana idotenyịn mi ye owo edieke ifet ebererede mfịn?’ Kpebe edu Jesus, emi akanamde ntak emi ẹkedọn̄de enye edi isọn̄ an̄wan̄a: “Mmenyene ndikwọrọ eti mbụk Ubọn̄ Abasi.” (Luke 4:43, sịghisịghi ubọkn̄wed edi eke nnyịn.) Edieke nnyịn iyomde ndibiet Andikpep nnyịn, nnyịn idinam ukem ntre.—Luke 6:40.