Ndisio Akan̄a Nnyịn Kpukpru Usen
1 Ama onụk David andiwet psalm ndidọhọ Jehovah ete: “Ndikwọ enyịn̄ fo ke nsinsi, nnyụn̄ nnọ akan̄a mi kpukpru usen.” (Ps. 61:8) David ama ọdiọn̄ọ ke ndikan̄a akan̄a ke ofụri ofụri edi n̄kpọ otode unyịmesịt. Nte ededi, enye n̄ko ama ọdiọn̄ọ ke edieke ikan̄ade akan̄a, ke ama obiomo imọ ndisio enye. Nte ededi, enye ama otoro Jehovah kaban̄a ifet ndisio akan̄a esie kpukpru usen.
2 Ke ini ikanamde uyakidem nnyịn inọ Jehovah, nnyịn ke unyịmesịt ima ikan̄a ndinam uduak esie. Nnyịn ima ikan̄ idem nnyịn inyụn̄ inam edinam n̄kpọ Jehovah edi akpa n̄kpọ oro nnyịn ibịnede ke uwem. (Luke 9:23) Ntem, ana nnyịn n̄ko isio akan̄a nnyịn kpukpru usen. (Eccl. 5:4-6) Ana ofụri usụn̄uwem nnyịn owụt an̄wan̄wa uyarade oro ikanamde ke ini ikanade baptism ke mmọn̄, sia nnyịn idiọn̄ọde ite ke “[owo] ada inua onyịme enyene edinyan̄a.” (Rome 10:10) Emi esịne edikwọrọ eti mbụk. (Heb. 13:15) Mme ọkpọkpọ idaha ẹkpụhọde akamba akamba, edi kpukpru nnyịn imekeme ndinọ akpan ntịn̄enyịn ke edibuana eti mbụk ye mmọ en̄wen kpukpru usen.
3 Nam Ifet Ẹdu Ndikwọrọ Ikọ ke Usen ke Usen: Ndibuana eti mbụk ye owo en̄wen edi ifiọkutom emi akamade idatesịt. Man inam emi ke usen ke usen, nnyịn inyene ndinam ifet ẹdu ndikwọrọ ikọ ke ini ekededi mme idaha nnyịn ẹyakde. Mbon oro ẹnamde usio-ukot ndinọ mme owo ke itieutom m̀mê ke ufọkn̄wed ye mme mbọhọidụn̄ m̀mê mbon en̄wen oro mmọ ẹsobode ikọ ntiense ido nneme kpukpru usen ẹsinyene ediwak inem inem ifiọkutom. Idem ndiwet leta m̀mê edikot ke urụk ukopikọ ekeme ndidi usụn̄ ndinọ mbon en̄wen ikọ ntiense. Ndida kpukpru usụn̄ ẹmi nnam n̄kpọ ọkọrọ ye edisio ini kpukpru ini nnịm nnọ edinọ ikọ ntiense to ke enyịnusụn̄ sịm enyịnusụn̄ ye edinam mme mfiakn̄ka ẹkeme ndida nsịm edinyene san̄asan̄a idatesịt otode edinịm ukpepn̄kpọ Bible. Ih, kpukpru usen nnyịn imekeme ndinam ifet ẹdu ndikwọrọ ikọ.
4 Eyenete an̄wan kiet ama ọtọn̄ọ ndikot Ẹdụn̄ọde N̄wed Abasi ke Usen ke Usen ke ini nduọkodudu esie ke itieutom. Enye ama okot nsan̄autom kiet ete etiene imọ okot itien̄wed usen oro, ndien ikebịghike oro ama ada okosịm edinịm ukpepn̄kpọ Bible ye n̄wan oro. Mmọ ẹma ẹsikpep n̄kpọ ubak hour kiet ke usen ke usen, usen ition ke urua. Nsan̄autom en̄wen ama okụt ke mmọ ẹsikpep n̄kpọ ke usen ke usen. Enye ke ukperedem ama ọdọhọ ke imọ idi eyenete oro mînamke utom aba. Ke ifịk eyenete an̄wan emi onụkde, enye ama okosobo ye ebiowo man ọtọn̄ọ ndifiak nnam utom. Eyenete an̄wan emi ama enyene eti odudu ke idem owo iba en̄wen ke ntak edika iso nsio akan̄a esie kpukpru usen.
5 Ke ini esịt oro ọyọhọde ye ekọm kaban̄a kpukpru nti n̄kpọ oro Jehovah anamde ọnọ nnyịn onụkde nnyịn, ndisio akan̄a uyakidem nnyịn ke mfọnn̄kan usụn̄ nte ikekeme kpukpru usen eyeda idatesịt ye uyụhọ ọsọk nnyịn. Ukem nte andiwet psalm, nnyịn imekeme ndidọhọ ete: “O Ọbọn̄ Abasi mi, nyetoro fi ke ofụri esịt mi, nnyụn̄ n̄kpono enyịn̄ fo ke nsinsi.”—Ps. 86:12.