Ẹsinọ Edinam Akpanikọ Utịp
1 Ẹsian nnyịn ke Mme Hebrew 11:6 ẹte ke Abasi “edi Andinọ mmọemi ẹyomde Enye utịp.” Usụn̄ kiet emi enye esinọde mme ifịk ifịk asan̄autom esie ẹmi ‘ẹnamde akpanikọ ke se mîwakke,’ utịp edi ‘ndinịm mmọ ẹkpeme ediwak n̄kpọ.’ (Matt. 25:23) Ke ikọ efen, Jehovah esiwak ndinọ nti utom utịp ebe ke ndinọ mme ntiense esie oro ẹnamde akpanikọ mme udiana ifetutom.
2 Ẹma ẹnọ edinam akpanikọ apostle Paul utịp ebe ke ndinọ enye utom oro akadade enye odụk ke mme obio ye mme obio-in̄wan̄ Europe ye Asia Minor. (1 Tim. 1:12) Okposụkedi akabuanade ekese ukeme ke ndinam utom esie mma ọyọhọ ọyọhọ, Paul akada ifetutom oro ẹkenọde enye ke ata ọsọn̄urua. (Rome 11:13; Col. 1:25) Enye ama owụt ntotụn̄ọ esịtekọm esie ebe ke ndiyom mme ifet ke esịt akpanikọ ndida n̄kwọrọ ikọ. Ebede ke ifịk ifịk utom esie, enye ama owụt in̄wan̄în̄wan̄ ete ke imọ ikananam mbuọtidem imọ iwụt. Uwụtn̄kpọ esie onụk nnyịn ndida mme ifetutom nnyịn ke ọsọn̄urua.
3 Jehovah Ọmọnọ Nnyịn Utom Ukwọrọikọ: Didie ke nnyịn iwụt ke imenyene ukem ekikere emi Paul ekenyenede aban̄a ifetutom emi? Nnyịn iyom mme usụn̄ ndinam ebuana nnyịn ke utom ukwọrọikọ ọkọri. Nnyịn ida kpukpru ifet ndinọ ikọ ntiense ido nneme ọkọrọ ye to ke enyịnusụn̄ sịm enyịnusụn̄. Nnyịn ifiak ika ibịne kpukpru mbon oro mîkodụhe ke ufọk inyụn̄ ifiak ika ibịne kpukpru mbon oro ẹnyenede udọn̄. Nnyịn inyụn̄ ifiak ika ke ini oro ikodiomide ndinịm mme ukpepn̄kpọ Bible.
4 Kaban̄a utom ukwọrọikọ nnyịn, Paul eketeme ete: “Nam enye usọp usọp.” (2 Tim. 4:2, NW) N̄kpọ edide usọp usọp oyom ẹnọ ntịn̄enyịn ke ndondo oro. Nte nnyịn imesinam utom ukwọrọikọ nnyịn ke ido edide usọp usọp, inamde enye edi ebeiso n̄kpọ ke uwem nnyịn? Ke uwụtn̄kpọ, nnyịn ikpayakke mme edinam unọ idem inemesịt nnyịn ye mme ọkpọkpọ n̄kpọ eken ke utịturua ẹbiọn̄ọ ini oro ikpesịnde ke utom an̄wautom. Sia nnyịn inịmde ke akpanikọ ite ke utịt editịm n̄kpọ emi ke asan̄a ekpere usọp usọp, nnyịn n̄ko imenịm ke akpanikọ nte ke edikwọrọ eti mbụk Obio Ubọn̄ edi ata akpan utom emi nnyịn ikemede ndinam.
5 Ẹwụt edinam akpanikọ oro nnyịn inamde inọ Abasi ebe ke nnyịn ndisọn̄ọ nda nnọ enye nnyụn̄ nnam utom oro enye ọnọde nnyịn inam kpukpru ini. Ẹyak nnyịn inam utom ukwọrọikọ nnyịn ima ọyọhọ ọyọhọ, man Jehovah ọkpọnọ edinam akpanikọ nnyịn utịp ke akamba usụn̄.