Ndinen̄ede Nsịn Idem ke Utom Ukwọrọikọ Nnyịn
1 Apostle Paul ama eteme mme Christian ete ẹsan̄a ke usụn̄ Abasi ẹnyụn̄ “ẹka iso ẹnam ntre ata ọyọhọ ọyọhọ.” (1 Thess. 4:1) Nso ke emi ọwọrọ ọnọ nnyịn? Se idude edi nte ke nnyịn ikpenyene ndika iso nyom mme usụn̄ ndinen̄ede nsịn idem nnam mme n̄kpọ eke spirit, idomode kpukpru ini ‘ndinam utom nnyịn mma.’—2 Tim. 4:5.
2 Ntak Inamde: Udọn̄ oro inyenede ndinam n̄kpọ Andibot nnyịn ata ọyọhọ ọyọhọ anam inen̄ede isịn idem ke utom ukwọrọikọ. Nnyịn iyom ndinam n̄kọri ke n̄kan̄ eke spirit ye mme usụn̄ ndifori utom ukwọrọikọ nnyịn. Eti ndutịm oro inamde ye eti uduak ayan̄wam nnyịn isịm mme utịtmbuba ukara Abasi.—Ps. 1:1, 2; Phil. 4:6; Heb. 10:24, 25.
3 Oyom inyene edu ntatubọk ye edu n̄waidem man ikeme ndika iso ntat utom ukwọrọikọ nnyịn. Imekeme ndinyene utọ edu oro edieke ibọn̄de akam inyụn̄ itiede ikere eti uwụtn̄kpọ Jesus. (Matt. 20:28) Jesus ama esinen̄ede okop idatesịt ndinam n̄kpọ nnọ mbon en̄wen ke ofụri ini utom ukwọrọikọ esie. (Utom 20:35) Nnyịn imekeme ndikpebe Jesus ebe ke ndinen̄ede n̄kere mban̄a mme owo nnyụn̄ mben̄e idem ndida mme ifet oro ẹbererede ke an̄wautom nnam n̄kpọ.—Isa. 6:8.
4 Udeme Mme Ete ye Eka: Ẹkeme ndinam nditọwọn̄ ẹnyene udọn̄ nditat utom ukwọrọikọ mmọ ẹnyụn̄ ẹnam n̄kpọ ẹnọ mbon en̄wen. Mme uyen ẹyekụt ifịk oro ubon mmọ ẹsịnde ye nte mmọ ẹnen̄erede ẹsịn idem ẹtat utom ukwọrọikọ mmọ. Se ikesịnde udọn̄ inọ eyenete kiet ndinen̄ede nsịn idem ke utom ukwọrọikọ ekedi enye ndisinam mme utom ukara Abasi ye ete ete esie. Ndikụt nsịnifịk ete ete esie ye nte enye okopde idatesịt ama anam eyenete emi oyom mme ifet ndinam n̄kpọ nnọ nditọete esie. Enye edi asan̄autom unamutom idahaemi.
5 Ẹyom Nditọete Iren: “Edieke owo ekededi anyanarede ebịne itieutom esenyịn, enye oyom ndinam eti utom.” (1 Tim. 3:1) Mme ikọ emi ẹsịn udọn̄ ẹnọ nditọete iren ndinyanade mbịne mme ifetutom efen efen ke esop Jehovah. Idịghe tutu owo enyenyene san̄asan̄a m̀mê n̄wọrọnda ndammana ukeme ndien enye anam emi. Eyenete oro anyanarede ebịne mme ifetutom efen efen eyebem iso oyom Obio Ubọn̄ Abasi onyụn̄ enen̄ede esịn ifịk ke utom ukwọrọikọ. (Matt. 6:33; 2 Tim. 4:5) Enye oyodomo ndinịm eti uwụtn̄kpọ nnọ mbon en̄wen.
6 Ke Ofụri Ererimbot: Jehovah ke anam utom editan̄ mme owo mbok ọkọri. (Isa. 60:22) Enen̄ede oyom kpukpru mbon oro ẹkpebede uwụtn̄kpọ Jesus ẹnam utom oro ẹkedọn̄de mmọ ata ọyọhọ ọyọhọ. Ibatutom ofụri ererimbot eke 2006 owụt ke owo 248,327 ẹkena baptism. Oro owụt ke mbufa owo 680 ẹkedụk esop kpukpru usen ke ẹbaharede ukem ukem! Nnyịn ikpakam ika iso iyom mme usụn̄ ndinam utom ukwọrọikọ nnyịn ata ọyọhọ ọyọhọ.