Obufa Ndutịm Mbono Circuit

‘Ndisọn̄ọ Nnyene Usen Jehovah ke Ekikere’ edi ibuotikọ ndutịm mbono circuit usen iba oro editọn̄ọde ke January. (2 Pet. 3:12) Ẹtịm enye ndidemede ekikere oro inyenede nte ini edide usọp usọp. Ibịghike mme andidụn̄ isọn̄ ẹyekụt ubiereikpe Jehovah. Mmanie ẹdibọhọ “akwa usen Abasi, Andikara kpukpru n̄kpọ”? Edidi sụk mbon oro ẹdude ke edidemede ke n̄kan̄ eke spirit ẹmi ẹnyenede usụn̄ uwem “edisana ido ye ke uten̄e Abasi.”—Edi. 16:14; 2 Pet. 3:11.

Baptism edi akpan n̄kpọ man owo ọbọhọ usen Jehovah. (1 Pet. 3:21) Mme asuanetop ẹmi ẹyomde ndina baptism ke mbono emi ẹkpenyene ndisian esenyịn oro etiede ibuot, emi edinamde mme ndutịm ẹyomde.

Nneme ikpehe inan̄ oro, “Orụk Owo Ẹmi Nnyịn Ikpedide,” oyowụt in̄wan̄în̄wan̄ mme edinam ẹmi ẹbuanade ke ndisọn̄ọ nnyene edidi usen Jehovah ke ekikere. Utịn̄ikọ an̄wa oro, “Nam N̄kpọ Ọniọn̄ Ọniọn̄ nte Usen Jehovah Ekperede,” ayanam an̄wan̄a se ọwọrọde ‘ndiyom Jehovah, edinen ido, ye sụn̄sụn̄ ido,’ man owo edi andibọhọ.—Zeph. 2:3.

Mbono circuit ediberi ye utịn̄ikọ iba ẹmi ẹdemerede udọn̄ ẹmi mme esenyịn oro ẹsan̄ade-san̄a ẹdinọde, ẹmi ibuotikọ ẹdide: “Nte Uwem Fo Owụhọ ke Akpanikọ?” ye “Ndinam Ndutịm Mban̄a Ini Iso ye Usen Jehovah ke Ekikere.” Mme utịn̄ikọ ẹmi ẹyenụk nnyịn idụn̄ọde uwem nnyịn inyụn̄ inam ukpụhọde ekededi oro oyomde. Prọfesi Bible ye mme n̄kpọntịbe ererimbot ẹwụt in̄wan̄în̄wan̄ ẹte ke usen Jehovah ekpere. Ndutịm mbono emi eyesịn udọn̄ ọnọ nnyịn ‘ndifara ke idem nnyụn̄ n̄kpeme.’ (1 Pet. 5:8) Nam akpan ndutịm ndidụk usen mbiba.