Obufa Ndutịm Mbono Circuit

“Kpeme Mbet Abasi Nyụn̄ Du Uwem” edi ibuotikọ ndutịm mbono circuit usen iba oro editọn̄ọde ke January. (N̄ke 4:4) Enye ọyọsọn̄ọ owụt ntak emi edinịm mbet Abasi mîbiakke owo idem. N̄ko-n̄ko, enye oyowụt nte edinam uduak Abasi adade nduọkodudu ye ata inemesịt ọkọrọ ye idotenyịn ini iso edi.—Matt. 11:28-30; John 13:17.

Mbon oro ẹdiyomde ndina baptism ke mbono ke n̄kopitem nnọ ewụhọ Christ ẹkpenyene ndisian esenyịn oro etiede ibuot, ndien enye ayanam mme ndutịm oro ẹyomde.—Matt. 28:19, 20.

Nneme ayanam an̄wan̄a mme ata usụn̄ ẹmi nnyịn ikemede ndiwụt ima nnọ Abasi ye nditọete nnyịn. (John 13:34, 35; 1 John 5:3) Ẹyesịn mme item oro ẹdemerede owo udọn̄ ẹtode Psalm 19 ye 119 ke ndutịm. Okposụkedi ẹkewetde mme item eke odudu spirit ke mme psalm ẹmi ediwak tọsịn isua ẹmi ẹkebede, nnyịn iyokụt nte mmọ ẹkemede ndinyene ufọn ọkpọkpọ nnọ nnyịn mfịn.

Utịn̄ikọ an̄wa oro esenyịn district edinọde ọdọhọ “Bak Abasi Nyụn̄ Nịm Mbet Esie.” (Eccl. 12:13) Akpatre utịn̄ikọ esenyịn circuit oyowụt nte mme uyen ẹkemede ndibọ se ifọnde ikan nto uwem idahaemi ye ntak emi mmọ ẹkemede ndinyene mbuọtidem ke nsinsi ini iso. Esenyịn district eyeberi ndutịm ke ndibat ediwak ufọn ẹtode edida ima ima “ewụhọ Edidem” ndu uwem. (Jas. 2:8) Ke akpanikọ, emi edi ndutịm mbono oro baba owo kiet mîdiyomke nditaba!