“Ndi Tutu Amama Kpukpru Owo Ẹyema Kiet Eken?”
1 Ẹyetan̄a ata eti, edemede-owo-udọn̄, ye inem inem etop ke ofụri ererimbot ke usem 169. Nso idi etop emi? Ndien didie ke ẹdinọ enye?
2 Etop oro aban̄a ima mbọhọidụn̄. Ẹdikụt enye ke Mbụk Obio Ubọn̄ Nọ. 35, emi ibuotikọ edide “Ndi Tutu Amama Kpukpru Owo Ẹyema Kiet Eken?” Mbụk Obio Ubọn̄ emi odụn̄ọde ibio ibio nte mme n̄kpọ ẹtiede idahaemi ke ofụri ererimbot, owụtde ke edi unana ima ke otu mme owo edi akpan ntak ata ekese iduọesịt ye ubiak. Enye anam an̄wan̄a ntak emi ima mbọhọidụn̄ osụhọrede akpan akpan ke eyo nnyịn ye se emi ọwọrọde ọnọ ini iso.
3 Ke ukem ini oro, Mbụk Obio Ubọn̄ Nọ. 35 owụt ke ata ima mbọhọidụn̄ odu ke otu ediwak miliọn owo ẹdude uwem ke ererimbot mfịn. Enye anam ẹdiọn̄ọ mbon oro ẹbuanade ke edifiak ndemede Ido Ukpono Christ eke eset—utuakibuot akpa isua ikie, emi ẹkedade ima mbọhọidụn̄ ẹdiọn̄ọ kpa nte Jesus Christ ekekpepde.—Luke 10:25-37.
4 Mbụk Obio Ubọn̄ Nọ. 35 eberi ye edinam an̄wan̄a nte ofụri ererimbot ke mîbịghike edinamde-nam ima mbọhọidụn̄ ke idak ndutịm Obio Ubọn̄ Abasi ke ubọk Christ. Ẹsịn udọn̄ ẹnọ mbon oro ẹkotde etop emi ndibọ ediye uduot ekpri n̄wed Nso ke Abasi Oyom Oto Nnyịn? nnyụn̄ n̄kpep nte ẹkemede ndikabade ndi ubak ima ima ndutịm ofụri ererimbot emi oro ẹtịn̄de ẹban̄a ọyọhọ ọyọhọ ke Ikọ Abasi.
5 Mmanie Ẹdinọ Etop Emi? Mme Ntiense Jehovah ke ofụri ererimbot ẹyebuana etop ima mbọhọidụn̄ emi ye mme ọdiọn̄ọ, mme mbọhọidụn̄, ye mme iman ke ọfiọn̄ October ye November. Ẹsịn udọn̄ ẹnọ kpukpru mbon oro ẹdotde ẹte ẹbuana ke an̄wan̄wa edideme Mbụk Obio Ubọn̄ Nọ. 35 emi.
6 Akpan utịtmbuba ubịnikọt emi edi ndidemede mme owo udọn̄ ndinyene ukpepn̄kpọ Bible edide ke ediye uduot ekpri n̄wed Oyom m̀mê ke n̄wed Ifiọk. Ke adianade do, ukeme ofụri esịt ke n̄kan̄ mme asan̄autom Jehovah kiet kiet ọyọnọ akwa ikọ ntiense aban̄a Abasi ima, Jehovah, ye Eyen esie, Jesus Christ.