Eti Mbụk ke Internet

Ke eyo ifiọk ubotn̄kpọ nnyịn emi, ndusụk owo ẹsibọ ntọt ẹto mme usụn̄ ntọt ilektrọnik, esịnede Internet. Ntre N̄ka ọmọdọn̄ ndusụk nnennen ntọt aban̄ade mme edinịm ke akpanikọ ye mme utom Mme Ntiense Jehovah ke Internet.

Ikpehe Ndutịm Internet nnyịn enyene adres emi http://www.watchtower.org ndien ọdọn̄ọ mme tract, ndiye uduot n̄kpri n̄wed, ye mme ibuotikọ Enyọn̄-Ukpeme ye Awake! ẹmi ẹsatde-sat ke Ikọmbakara, Chinese (Ẹnamde emem), German, Russian, ye Spanish, ọkọrọ ye ke mme usem eken. Mme n̄wed ẹdude ke ikpehe Ndutịm emi ẹmedodu ebe ke mme esop ndien ke ẹda ẹnam n̄kpọ ke utom ukwọrọikọ. Uduak ikpehe Ndutịm nnyịn, idịghe ndida nsio mbufa n̄wed, edi ndinam ntọt odu ọnọ mbon an̄wa ke ndutịm ilektrọnik. Ufọn idụhe owo ndomokiet nditịm ntọt aban̄ade Mme Ntiense Jehovah, mme utom nnyịn, m̀mê mme edinịm ke akpanikọ nnyịn nsịn ke Internet. Ikpehe nnyịn oro ukara ọfiọkde ọnọ owo ekededi nnennen ntọt oro enye oyomde.

Okposụkedi ikpehe nnyịn mînyeneke itie inọ etop ilektrọnik (E-mail), enye asiak mme adres ubọ n̄wed eke mme n̄kọk itieutom ke ofụri ererimbot. Ntem mme owo ẹkeme ndiwet man ẹbọ mme ntọt efen efen m̀mê ẹbọ ọkpọkpọ un̄wam ẹto Mme Ntiense ke n̄kann̄kụk. Nyene ifụre ndibuana adres Internet eke enyọn̄ emi ye owo ekededi emi oyomde nditọn̄ọ ndikpep akpanikọ Bible ntọ ndutịm emi.