Fep Ndibịne ‘Mme Ikpîkpu N̄kpọ’
1 Ọwọrọetop usụn̄ unyene nneme mfịn edi leta ilektrọnik. Okposụkedi okpodotde ndibuana mme ọkpọkpọ ifiọkutom ye ekikere ke usụn̄ emi ye ubon ye mme ufan, nso idi ‘mme ikpîkpu n̄kpọ’ oro ẹkemede ndinyene ebuana ye edida leta ilektrọnik nnam n̄kpọ ye unana mfara ke idem?—N̄ke 12:11, NW.
2 Item Kaban̄a Leta Ilektrọnik: Ndusụk owo ẹsikere ke inen̄ede inyene nneme ye esop Jehovah ke ini mmọ ẹbọde se mmọ ẹkerede nte edide obufa ntọt ebe ke leta ilektrọnik. Emi ekeme ndisịne mme ifiọkutom, ntọt n̄kpọntịbe ke Bethel, ntọt aban̄ade mme afanikọn̄ m̀mê ukọbọ, idem ye ikọ idịbi oro ẹsitịn̄de ke mme Ufọkn̄wed Utom Obio Ubọn̄. Mbon efen ẹsinen̄ede ẹnyene ọkpọsọn̄ udọn̄ ndinọ utọ etop oro ọwọrọ, ye idotenyịn ndidi akpa owo ndiyarade ntọt emi nnọ mme ufan mmọ.
3 Ke ndusụk idaha, ẹsinọ ntọt ye mme ifiọkutom oro mînenke m̀mê oro mîdịghe akpanikọ. Mîdịghe ke ndisịn ukeme nnam idem aduai owo, ndusụk owo ẹkeme ndinọ nsunsu ekikere. Mbon oro ẹsisọpde ẹyarade utọ n̄kpọ ntre isiwakke nditịn̄ se idide akpanikọ. (N̄ke 29:20) Ke ndusụk idaha, idem ke ini mbụk mîdịghe se ẹkpenịmde ke akpanikọ, ẹsika iso ndisuan enye ke ntak ọkpọsọn̄ udọn̄. Utọ ukwan̄ ntọt m̀mê mme ntọt oro ẹtụnde owo usụn̄ mi ẹdi “mbukpo n̄ke,” emi mîsịnke udọn̄ inọ edinyene ata uten̄e Abasi.—1 Tim. 4:6, 7.
4 Edieke afo ọnọde owo ukwan̄ ntọt, afo emetiene enyene nduduọhọ ke mfụhọ m̀mê ndutịme oro ntọt emi ekemede ndida ndi. Ke ini David ọkọbọde ntọt oro mîkedịghe akpanikọ nte ke ẹma ẹwot kpukpru nditọ esie, enye ama “awai edisịne-n̄kpọ esie” ke mfụhọ. Nte ededi, ke nditịn̄ akpanikọ, eyen esie kiet kpọt akakpa. Oro ekenen̄ede edi n̄kpọ mfụhọ, edi ntọt oro mîkedịghe akpanikọ do ama anam David etetịm okop mfụhọ. (2 Sam. 13:30-33) Ke akpanikọ nnyịn idiyomke ndinam n̄kpọ ekededi oro edinamde eyenete nnyịn ekededi otụn usụn̄ m̀mê oro edinamde idem emem mmọ.
5 Usụn̄ Oro Abasi Emekde: Ti ete ke Ete nnyịn eke heaven enyene usụn̄ unyene nneme oro enye emekde, kpa “asan̄autom emi anamde akpanikọ, onyụn̄ enyenede ọniọn̄.” “Asan̄autom” oro enyene mbiomo ndibiere utọ ntọt oro ẹnọde mbonufọk mbuọtidem, ọkọrọ ye “edikem ini” oro ẹkpenọde enye. Ẹnọ udia eke spirit emi ke esop ukara Abasi kpọt. Kpukpru ini nnyịn ikpenyene ndidori enyịn ndibọ ntọt oro ẹkemede ndiberi edem nto usụn̄ oro Abasi emekde, idịghe ndibọ nto mme owo oro ẹdade Intanet ẹnam n̄kpọ.—Matt. 24:45.
6 Ndutịm Intanet: Nnyịn imenyene Ndutịm Intanet: www.watchtower.org. Ndutịm emi ekem ndinam ntọt odu ọnọ kpukpru owo. Ufọn idụhe owo, kọmiti, m̀mê esop ekededi nditọn̄ọ Ndutịm Intanet ndida nsuan ntọt mban̄a Mme Ntiense Jehovah. Ndusụk owo ẹsion̄o se isịnede ke mme n̄wed nnyịn ye kpukpru itie N̄wed Abasi ye ofụri itie ndụn̄ọde oro ẹdude ẹnọ ẹsan̄a ke ndutịm unọ etop ilektrọnik ẹsọk mme owo, idem ẹnọde mme n̄kpọ ẹban̄ade mbono ke etịbe. Edide ẹnọ ke okụk m̀mê ke mfọn, edu edision̄o nnyụn̄ nsuan mme n̄wed N̄ka Enyọn̄-Ukpeme ke ndutịm unọ etop ilektrọnik edi edibiat ibet unen edisio n̄wed. Ke adan̄aemi ndusụk owo ẹkemede ndida emi nte utom oro ẹnamde ẹnọ nditọete, owo inọhọ unyịme ndien ẹkpenyene nditre edinam emi.
7 Ndida eti ubiere ye eti ibuot nnam n̄kpọ ke ini inyenede nneme ke ndutịm unọ etop ilektrọnik ayanam ekikere nnyịn ọyọhọ ye “uto inyene ye uyai.”—N̄ke 24:4.