Mme Esenyịn Oro Ẹdade Usụn̄—Ada Ukpepn̄kpọ Enyọn̄-Ukpeme
1 Enyọn̄-Ukpeme Ọnọ Ntọt Obio Ubọn̄ Jehovah edi akpan usụn̄ emi “asan̄autom emi anamde akpanikọ, onyụn̄ enyenede ọniọn̄” adade ndinọ udia eke spirit ke “edikem ini.” (Matt. 24:45) Ebiowo emi enịmde Ukpepn̄kpọ Enyọn̄-Ukpeme enyene akpan mbiomo nte andikpep emi enyenede ukeme onyụn̄ enịmde eti uwụtn̄kpọ ke edu uwem Christian.—Rome 12:7; Jas. 3:1.
2 Man ekpep uforo uforo, ana ada Ukpepn̄kpọ Enyọn̄-Ukpeme enen̄ede esịn ukeme ke nditịm idem ke urua kiet kiet. Enye anam ntre ke akam ye ntịn̄enyịn. Ẹkụt ọkpọsọn̄ udọn̄ oro enye enyenede ke esop ke eti ukeme oro esịnde ndida ibuotikọ oro ẹkpepde nsịm nnyịn esịt. Enye owụk ntịn̄enyịn ke mme akpan n̄kpọ oro ẹdude ke ukpepn̄kpọ onyụn̄ an̄wam nnyịn ndikụt nte mmọ ẹnyenede ebuana ye ibuotikọ ukpepn̄kpọ.
3 Ọyọhọ ntịmidem ke n̄kan̄ esie abuana enye ndibem iso nse mme itien̄wed Abasi man ọdiọn̄ọ nte mmọ ẹnyenede ebuana. Enye anam Ikọ Abasi ebe iso ke ndisịn udọn̄ nnọ esop ndida Bible nnam n̄kpọ nte ọfọnde ke ukpepn̄kpọ. Ke ini mme ibọrọ oro esop ọnọde mîtụkke kpukpru akpan n̄kpọ m̀mê ke ini ẹfụmide ndibuan akpan itien̄wed Abasi, enye obụp akpan mbụme efen efen ndisio ntọt oro ndi. Ke usụn̄ emi, enye an̄wam nnyịn ndisịm mme nnennen ubiere inyụn̄ idiọn̄ọ nte ikpadade se ikpepde isịn ke edinam ke uwem nnyịn.
4 Ada Ukpepn̄kpọ Enyọn̄-Ukpeme odomo ndika iso mfori ukeme ukpepn̄kpọ esie. Enye itịn̄ke ikọ awak akaha edi esịn udọn̄ ọnọ nnyịn ndinọ ibọrọ—ke ikọ idem nnyịn, ibio ibio, ye ke usụn̄ emi owụtde akpan n̄kpọ. Enye ekeme nditi nnyịn ke ini ke ini nte ke akpa owo emi ọnọde ibọrọ enyene ndinọ ibio ibio, nnennen ibọrọ ke mbụme oro ẹmịn̄de. Mme udiana ibọrọ oro otuowo ẹnọde ẹkeme ndidụri ntịn̄enyịn n̄wụt nte ẹbuande mme itien̄wed Abasi, ẹsọn̄ọde mme eneni, m̀mê nte ẹkpedade se ẹkpepde ẹsịn ke edinam. Ebede ke ndisịn udọn̄ nnọ ọkpọkpọ ntịmidem ye ntịmidem eke ubon, ada Ukpepn̄kpọ Enyọn̄-Ukpeme edemede udọn̄ kpukpru owo ndibuana.
5 Nte mbon oro ‘Jehovah etemede,’ nnyịn imadara “mme enọ ke owo” (NW), utọ nte mme ada Ukpepn̄kpọ Enyọn̄-Ukpeme, ẹmi “ẹkpade utom ke . . . ukpepn̄kpọ.”—Isa. 54:13; Eph. 4:8, 11; 1 Tim. 5:17.