Mmanie Ẹnam Uduak Jehovah Mfịn?
1. Ini ewe ke iditọn̄ọ ndikpep Mmanie Ẹnam Uduak Jehovah Mfịn? ndien nso ufọn ke idibọ?
1 Ọtọn̄ọde ke urua October 28, ẹdikpep Mmanie Ẹnam Uduak Jehovah Mfịn? ke Ukpepn̄kpọ Bible Esop. Ẹtịm obufa ediye uduot ekpri n̄wed emi ẹkesiode ke Mbono District “Kpeme Esịt Fo!” man ẹda ẹn̄wam nditọ ukpepn̄kpọ Bible ẹdụk esop Abasi. Ndikpep n̄wed emi ayanam nnyịn inen̄ede ima nte idude ke esop Jehovah oyonyụn̄ an̄wam nnyịn itịm imehe ye akpan n̄kpọutom emi ididade inam n̄kpọ ke an̄wautom.—Ps. 48:13.
2. Didie ke ẹdikpep ediye uduot ekpri n̄wed emi ke esop?
2 Nte Ẹdikpepde N̄wed Emi: Oyom ada ukpepn̄kpọ abahade ini esie ọfọn man ẹneme ukpepn̄kpọ kiet kiet ukem ukem. Ke ofụri ukpepn̄kpọ 28 oro, enye oyokot mbụme emi edide ibuotikọ ukpepn̄kpọ mbemiso ọtọn̄ọde ukpepn̄kpọ kiet kiet. Ekem enye ọyọdọhọ owo emi edikotde ikpehe ekikere okot ntọn̄ọikọ emi odude ke ukpepn̄kpọ oro. Ẹma ẹkot ẹma, enye oyobụp otuowo mbụme emi enye eketịmde ọnọ ntọn̄ọikọ oro. Ekem, ẹyekot mme ikpehe oro ẹwetde n̄kpọ ke ndodobi ubọkn̄wed ke ntọn̄ọ, ẹnyụn̄ ẹneme mme ikpehe emi kiet kiet. Ke ẹma ẹkekot ikpehe oro ẹma, ada ukpepn̄kpọ ọyọdọhọ otuowo ẹtịn̄ nte ikpehe oro ọbọrọde mbụme emi ẹbụpde ke ibuotikọ ukpepn̄kpọ oro. Ediye uduot ekpri n̄wed emi enyene ediwak ndise emi ẹkemede nditịn̄ n̄kpọ mban̄a. Ẹdikot mme akpan itie N̄wed Abasi nte ini ayakde. Mbemiso ada ukpepn̄kpọ ebede odụk ukpepn̄kpọ efen, enye ayanam ndụn̄ọde ke ndibụp mme mbụme emi ẹdude ke utịt page. Edieke ekebe emi ẹkotde “Nam N̄kpọ Emi” odude, enye ọyọdọhọ ẹkot ekebe emi, onyụn̄ ọdọhọ otuowo ẹtịn̄ nte eyen ukpepn̄kpọ Bible edibọde ufọn oto ekikere oro ẹnọde do. Edieke ini odude ke utịt ukpepn̄kpọ usen oro, ada ukpepn̄kpọ ekeme ndida mme ibuotikọ ukpepn̄kpọ oro ẹkenemede nnam ndụn̄ọde. Emi iwọrọke ke nte ẹdidade enye ẹkpep owo n̄kpọ edi emi.
3. Didie ke nnyịn ikeme ndinen̄ede mbọ ufọn nto edikpep ediye uduot ekpri n̄wed emi?
3 Tịm idem ọfọn mbemiso edide mbono esop man enen̄ede ọbọ ufọn oto ukpepn̄kpọ emi. Domo nditiene nsịn uyo ke ukpepn̄kpọ oro. Nte ẹsụk ẹkpepde, kere nte se ẹkpepde edinyenede ufọn ọnọ nditọ ukpepn̄kpọ Bible. Nnyịn ndikpep obufa ediye uduot ekpri n̄wed emi akpakam anam nnyịn ikeme ndin̄wam mbon en̄wen ẹtiene nnyịn ẹnam uduak Abasi man mmọ n̄ko ẹkeme ndidu uwem ke nsinsi.—1 John 2:17.