Ekebe Mbụme
◼ Nte afo emeben̄e idem ọnọ mbabuat n̄kpọntịbe?
Ke ererimbot eyomfịn, “ini ye unọmọ” esiwak ndidiana kiet nnam mbabuat n̄kpọntịbe, esịnede mfịghe edikịm iyịp nsịn ke idem. (Eccl. 9:11) Man ikeme ndiben̄e idem nnọ utọ unọmọ oro, Jehovah ọmọnọ un̄wam ke ediwak usụn̄ ebe ke esop esie, edi enye odori enyịn nnyịn ndinam udeme nnyịn. Se ẹsiakde ke idak emi ẹyen̄wam fi.
• Kama kad Advance Medical Directive/Release eke ndondo emi kpukpru ini.
• Kụt ete ke nditọ fo ẹkama Identity Card eke ndondo emi.
• Dụn̄ọde esịne-esịt Utom Obio Ubọn̄ Nnyịn eke January 1997, odomode ese nte ọkpọkọkde ibuot ye mbiaibọk ye mme ebiereikpe aban̄a usọbọ eyen fo.
• Dụn̄ọde ibuotikọ aban̄ade mbak iyịp ye mme usọbọ oro ẹdade ke ukpụhọ iyịp. (Se ẹtorode: Enyọn̄-Ukpeme, October 1, 1994, page 31; June 1, 1990, page 30-31; March 1, 1989, page 30-31; Awake! eke December 8, 1994, page 23-27; August 8, 1993, page 22-25; November 22, 1991, page 10; ye esịne-esịt Utom Obio Ubọn̄ Nnyịn, September 1992 ye August 1994. Dọn̄ mmọ ke n̄kpọ udọn̄ n̄wed man ekeme ndisọp n̄kụt mmọ.)
• Nen̄ede biere m̀mê afo emekeme ndiyak ẹda masịn oro anamde iyịp asan̄a ke ebiet ọwọrọde ọkpọn̄ idem owo mîdịghe m̀mê afo emekeme ndinyịme mme ibọk ẹmi ẹdọn̄ọde n̄kpatan̄a n̄kpọ iyịp.
• Mbemiso akade ufọkibọk, edieke ekemede, nam mbiowo ẹfiọk man mmọ ẹkeme ndin̄wam nnyụn̄ nsobo ye Kọmiti Unyene Nneme ye Mbon Ufọkibọk (HLC) edieke ẹyomde. Kaban̄a ekpri eyen, dọhọ mbiowo ẹbabak ẹtọt HLC.
Nam Afo Nditre Ndibọ Iyịp An̄wan̄a: Ntọt owụt nte ke ndusụk nditọete iren ye iban ẹsibet tutu ini ebe akaha mbemiso ẹdọhọde mbiaibọk usọbọ nte ke mmimọ iyomke iyịp. Emi ifọnke ye mme ọnọ-usọbọ ndien esịn fi ke itiendịk edidi se ẹkịmde iyịp ẹsịn ke idem. Edieke mbiaibọk ẹfiọkde ẹte ke uwetn̄kpọ emi ẹsịnde ubọk emi afo ọnọde akpan ndausụn̄ ọsọn̄ọ se afo enịmde ke akpanikọ ye se amade, emi ayan̄wam mmọ ndika iso ye unana ubiatini esinyụn̄ awak ndinọ mmọ ekikere efen efen kaban̄a unọ usọbọ emi owo mîsịnke iyịp.
Sia mbabuat n̄kpọntịbe ekemede nditịbe ke ini ekededi, nte ido edide ke ini emi afo mûdorike enyịn, nam mme usio-ukot idahaemi ndikpeme idemfo ye nditọ fo man ẹkûkịm iyịp ẹsịn ke idem.—N̄ke 16:20; 22:3.