Mme Ete ye Eka—Ẹsịn Nti Ido ke Esịt Nditọ Mbufo
1 Owo idahada nti ido imana, m̀mê owo ndinyene mmọ ke mbuari. Akan oro, ndisịn nti ido ke esịt nditọwọn̄ ada ini. ‘Ndisịn ke esịt’ ọwọrọ “ndisian nsịtnsịt” m̀mê “ndinam odụk nsịtnsịt.” Oyom mme ete ye eka ẹnyene iwụk man mmọ “ẹkama [nditọ mmọ] ke ntụnọ ye ke item Ọbọn̄.”—Eph. 6:4.
2 Ẹtọn̄ọ ke Uyen: Ukeme ata n̄kpri nditọ ndikpep nnyụn̄ nnam mbufa n̄kpọ edi n̄wọrọnda. Okposụkedi esiwakde ndisọn̄ ikpọ owo ndikpep mbufa usem, nditọwọn̄ oro mîsịmke isua uka ufọkn̄wed kan̄a ẹkeme ndikpep usem iba m̀mê ita ke ukem ini. Ẹkûkere ke nditọ mbufo ẹkpri ẹkaha ndikọri nti ido. Edieke ẹbakde ẹtọn̄ọ ẹnyụn̄ ẹkade iso ke ndida akpanikọ Bible nnọ item, etisịm ini emi eyenọwọn̄ ọyọhọde isua ifan̄, ekikere esie ediyọhọ ye ifiọk oro edinamde enye ọwọrọ “ọniọn̄ ọbọ edinyan̄a.”—2 Tim. 3:15.
3 Ẹnam Utom An̄wautom Edi Ido: Eti ido kiet oro ẹkpesịnde ke esịt eyenọwọn̄ ke mme ntọn̄ọ ntọn̄ọ isua edi edikwọrọ eti mbụk Obio Ubọn̄ Abasi kpukpru ini. Ediwak ete ye eka ẹsitọn̄ọ emi ebe ke ndida nditọ mmọ n̄ka utom ukwọrọikọ eke ufọk ke ufọk ke adan̄aemi nditọ ẹdide nsek. Mme ete ye eka ndibuana kpukpru ini ke utom edinọ ikọ ntiense an̄wam nditọ mmọ ndikọri esịtekọm ye ifịk nnọ utom ukwọrọikọ. Mme ete ye eka ẹkeme ndiwụt nditọ nte ẹkpebuanade ke ndinọ ikọ ntiense ke ikpehe an̄wautom kiet kiet.
4 Ndisịn enyịn̄ ke Ufọkn̄wed Utom Ukara Abasi an̄wam nditọwọn̄ n̄ko. Enye ekpep mmọ nti edu ukpepn̄kpọ ye nte ẹkpekotde n̄wed ye mbufiọk. Mmọ ẹkpep ndineme mban̄a Bible, ndinam mme mfiakn̄ka, ndinyụn̄ nnịm mme ukpepn̄kpọ Bible. Utọ ukpep emi ekeme ndinụk mmọ ndisiak usụn̄ nnyụn̄ nnyanade mbịne mme akpan ifetutom. Ediwak mbon Bethel ye mme isụn̄utom ke idatesịt ẹsiti mme ntọn̄ọ ntọn̄ọ isua mmọ ke ufọkn̄wed ẹnyụn̄ ẹda enye nte enọ oro akan̄wamde mmimọ ndikọri nti ido.
5 Nnyịn itie nte mbat-eso ke ubọk Akwa Obot-Eso, Jehovah. (Isa. 64:8) Adan̄a nte mbat-eso ememde, ntre ke etịm emem utom ndibot enye. Adan̄a nte enye asatde, ntre ke etịm ọsọn̄ utom ndibot. Ntre ke edi ye mme owo. Ke ini mmọ ẹdide nditọwọn̄, mmọ ẹtịm ẹmem ndinen̄ede—ndien nte ẹkpride ẹkan, ntre ke enen̄ede ọfọn. Mme isua uyen mmọ ẹdi mme isua n̄kọri, emi ẹdibọde ukpep kaban̄a eti m̀mê idiọk. Nte mme ete ye eka oro ẹkerede ẹban̄a, ẹbabak ẹsịn nti ido kaban̄a utom Christian ke esịt nditọ mbufo.