Ikpọ Mbono—Ini Idara!
1 Ikpọ mbono Mme Ntiense Jehovah ẹdi mme ini akamba idara. Ke se iwakde ikan isua ikie emi ẹkebede, mme mboho emi ẹmetịp ẹsịn ke n̄kọri emi esidade itie ke esop nnyịn. Ọtọn̄ọde ke n̄kpri ntọn̄ọ, nnyịn imokụt uwak edidiọn̄ Jehovah ke utom nnyịn eke ofụri ererimbot. Ke akpa akamba mbono nnyịn eke eyomfịn, ke Chicago, Illinois, ke 1893, ofụri ibat 70 ke otu owo 360 oro ẹkedụkde ẹkena baptism ke idiọn̄ọ uyakidem mmọ nnọ Jehovah. Udịm udịm mbono district “Mme Anam Ikọ Abasi” eke isua oko ama enyene ofụri ibat mme andidụk eke ofụri ererimbot emi ekedide 9,454,055, ndien owo 129,367 ẹkena baptism. Nso utịbe utịbe ntak ndidara!
2 Ọtọn̄ọde ke mme ini Bible, mme mboho ikọt Abasi ẹmenọ n̄wọrọnda usụn̄ ndinọ item otode Jehovah. Ke eyo Ezra ye Nehemiah, mme owo ẹma ẹkpan̄ utọn̄ ẹkop nte ẹkotde Ibet “ọtọn̄ọde ke usiere tutu esịm ufọt uwemeyo.” (Neh. 8:2, 3) Sia ẹketịmde ẹfiọk Ibet ke idaha oro, mme owo emi ẹma ẹnyene “akamba idara.” (Neh. 8:8, 12) Nnyịn n̄ko imokop inemesịt nte ke ikpọ mbono ẹnọ nnyịn eti ifet ndibọ eti item ye udia eke spirit ke “edikem ini” nto Jehovah ebe ke “asan̄autom emi anamde akpanikọ, onyụn̄ enyenede ọniọn̄.” (Matt. 24:45) Sia Jesus ọkọdọhọde ete ke owo enyene ndida “kpukpru ikọ eke ẹwọrọde Abasi ke inua” ndu uwem, ikpọ mbono ẹdi akpan n̄kpọ ẹnọ nsọn̄idem eke spirit nnyịn.—Matt. 4:4.
3 Odot Ofụri Ukeme Oro Ẹsịnde Ndidụk: Kpukpru nnyịn ikpenyene ndinam edi ọkpọkpọ utịtmbuba nnyịn ndidụk ofụri ikpehe Mbono District “Mme Andikpep Ikọ Abasi” eke isua emi. Nnyịn ikpenyene ndinam ndutịm ndibabak nsịm ke usen kiet kiet nnyụn̄ ndu tutu ẹsuana man nnyịn idiana ke nditiene ndọhọ “Amen!” ke akam ediberi. Man inam emi eyedi nnyịn iyanam ukpụhọde ke ndutịm nnyịn. Ndibọ ini nduọkodudu ke utom nnyịn man idụk mbono emi ekeme ndikama ndusụk n̄kpọ-ata. Ana nnyịn isọn̄ọ ida, ikûsịn ifu ke n̄kpọ ndomokiet. Edieke nnyịn iyomde itieidụn̄ ye/m̀mê n̄kpọisan̄, nnyịn ikpenyene ndibabak nnam ndutịm. Ukeme ekededi oro nnyịn inyenede ndisịn oyodot!
4 Ikọt Jehovah idaha okụk idomo mme edidiọn̄ oro ẹtode edidụk mbono. Tịm fiọk mme uwụtn̄kpọ ndusụk mbon oro ẹkebierede ndidụk Mbono Uduak Abasi eke Ofụri Ererimbot eke Mme Ntiense Jehovah ke New York City ke 1958. Eyenete kiet ama etre mbubehe ubọpn̄kpọ esie ke urua iba man ọnọ un̄wam onyụn̄ odụk mbono emi. Eyenete kiet ke Virgin Islands ama anyam isọn̄ esie edide hectare iba man ofụri ubon esie edide owo itiokiet ekeme ndidụk. Ebe ye n̄wan ẹdide n̄kparawa ẹma ẹnyam ubom engine mmọ man ẹkeme ndida nditọ mmọ mbita, emi isua emana odude ke ufọt ọfiọn̄ iba esịm isua itiaba n̄ka mbono emi. Ẹma ẹdọhọ nditọeka iren ita ẹtode California ẹte ke edieke mmọ ẹtrede utom mmọ, ke mmọ idinyọn̄ke idisịm utom oro aba. Nte ededi, oro ikọbiọn̄ọke mmọ ndika mbono oro owo mîkemeke ndifre mi.
5 Jehovah Ọnọ Ọkpọsọn̄ Ukeme Nnyịn Utịp: Jehovah okụt onyụn̄ ọdiọn̄ ukeme ikọt esie. (Heb. 6:10) Nte uwụtn̄kpọ, ke Mbono N̄kọri Ukara Abasi eke 1950, mbon emi ẹkedụkde ẹma ẹkop n̄wọrọnda utịn̄ikọ oro “Obufa Editịm N̄kpọ.” Brọda Frederick Franz ama edemede udọn̄ kpukpru owo ebe ke ndibụp ete: “Nte mbono ofụri ererimbot emi akpama ndifiọk mbubịteyo emi nte ke ndusụk ndidem ini iso eke obufa isọn̄ ẹdu mi ye nnyịn?” Ke se ibede isua 50 ke ukperedem, nnyịn ke ika iso ndikop idatesịt ke n̄kaiso edinam Psalm 45:16 emi an̄wan̄a.
6 Ke ama okodụk mbono district isua oko, okop-inemesịt ibuot ufọk kiet ama ewet mme ikọ ẹtienede mi ete: “Nditọete, mbufo idikemeke ndifiọk udomo oro mbono emi anyan̄ade uwem eketre. Ubon mi ọwọrọ aka akwa obio ke ntak utom, n̄kukụre ndikụt nte idaha eke spirit nnyịn osụhọrede. . . . Nnyịn ikọnọhọ ntịn̄enyịn ke mme mbiomo Christian nnyịn. Nnyịn ima ikam itre ndibuana ke mme mbono esop, itre utom ukwọrọikọ ofụri ofụri. . . . Mbono emi afiak edemede nnyịn, ndien ini kiet efen nnyịn imenịm utịtmbuba eke spirit inyụn̄ itịm idem ndisịm mmọ.”
7 Jehovah ke ọnọ nnyịn udia eke spirit oro nnyịn iyomde. Enye ọnọ uwak udia ke mme mbono nnyịn. Esịtekọm emi nnyịn inyenede ke mme enọ emi ekpenyene ndinam nnyịn itịn̄ se Cornelius eketịn̄de ke ini apostle Peter akakade ekese enye: “Ke emi kpukpru nnyịn idu mi ke iso Abasi, man ikop kpukpru se Jehovah ọdọhọde fi etịn̄.” (Utom 10:33) Yak inam edi utịtmbuba nnyịn ‘ndidu ke iso Abasi’ ke ofụri ikpehe Mbono District “Mme Andikpep Ikọ Abasi” eke isua emi inyụn̄ idara!