Ẹka Iso Ndibọ Ufọn Nto Enyọn̄-Ukpeme ye Awake!
Idahaemi ẹma ẹketre editobo magazine Enyọn̄-Ukpeme ye Awake! ke post ọfis mi, oyoyom ukeme man ikụt ke nnyịn ye mbon oro ikwọrọde ikọ inọ itabake nsiondi ndomokiet.
Ọkpọkpọ Magazine: Ke ini ọkpọkpọ editobo fo okụrede, dọhọ ẹdian magazine efen efen ke ibat oro afo esibọde ke itie unọ magazine. Mme ete ye eka ẹkpenyene ndibọ mme magazine oro ẹwakde ẹkem man mme andibuana kiet kiet ke ubon ẹnyene eke idemmọ. Ndiwet enyịn̄ fo ke ọkpọkpọ magazine idiyakke ẹdue ẹnịm enye ke an̄wautom. Ke ini mme magazine ẹdide ẹdibehe, nditọete oro ẹsede ẹban̄a mmọ ẹyesọsọp ẹnam kpukpru nsiondi ẹdu ke Ufọkmbono Obio Ubọn̄.
Mme Afan̄ Magazine: Mme asuanetop ẹkpenyene ndidomo ndisiak afan̄ magazine ye kpukpru mbon oro ẹnyenede udọn̄ emi ẹyomde ndibọ nsiondi kiet kiet. Ndida mme magazine emi nsọk mmọ ke idem nnyịn ọyọnọ nnyịn ifet ndikọri udọn̄ oro mmọ ẹwụtde nnyụn̄ ntọn̄ọ mme ukpepn̄kpọ Bible.—Se Utom Obio Ubọn̄ Nnyịn eke October 1998, page 8.
Mbon Oro Ẹnyenede San̄asan̄a Udọn̄: Edieke owo owụtde ata udọn̄ edi odụn̄de ke efakutom oro owo mîbahakede inọ owo, ẹkeme ndinam ukpụhọde man enye ekeme ndibọ mme magazine ebe ke post ọfis. Edieke owo oro enen̄erede enyene udọn̄ ke ndibọ mme magazine odụn̄de ke efakutom esop edi owo ikemeke ndida magazine nsọk enye ke afan̄ magazine, neme ye Kọmiti Utom Esop. Edieke mmọ ẹnyịmede, ẹkeme ndinam editobo nnọ owo oro enyenede udọn̄ do. Ẹkeme ndida babru editobo (M-1 ye M-101) nnam editobo emi.
Nnyịn imekeme ndinịm nte ke Jehovah ayaka iso ọdiọn̄ kpukpru ukeme oro nnyịn isịnde ke ndida Enyọn̄-Ukpeme ye Awake! ntan̄a Obio Ubọn̄ emi.