Ẹkpebe Mfọnido Jehovah
1 Ke ima ikese ediye usoputịn m̀mê ke ima ikadia inem inem udia, nte emi isinụkke nnyịn ndikọm Jehovah, kpa Ntọn̄ọ kpukpru mfọnido? Mfọnido esie onụk nnyịn ndiyom ndikpebe enye. (Ps. 119:66, 68; Eph. 5:1) Didie ke nnyịn ikeme ndiwụt edu mfọnido?
2 Ẹwụt Mbon Oro Mînịmke ke Akpanikọ Mfọnido: Usụn̄ kiet oro nnyịn ikemede ndikpebe mfọnido Jehovah edi ndinyene udọn̄ ofụri esịt ke idem mbon oro mîtoho ke ufọk mme andinịm ke akpanikọ. (Gal. 6:10) Ndiwụt mfọnido ke ata ata usụn̄ ekeme nditụk nte mmọ ẹsede Mme Ntiense Jehovah ye etop oro nnyịn itan̄ade.
3 Ke uwụtn̄kpọ, ke adan̄aemi ekebetde ke ufọkibọk, ekpri eyenete eren oro ekedide asiakusụn̄ ama etie adiana akanian̄wan oro eketiede nte ke enye ọkọdọn̄ọ akan mbon eken oro ẹkedude do. Ke ini ekekemde ini eyenete emi ndika n̄kokụt abiausọbọ, enye ama ayak n̄wan emi aka ke itie esie. Ke ukperedem, eyenete emi ama afiak edikụt n̄wan emi, isan̄ enye emi ke urua, ndien n̄wan emi ama enen̄ede adara ndikụt enye. Okposụkedi enye mîkamaha ndikpan̄ utọn̄ ke eti mbụk ke mbemiso, enye ọkọdọhọ ke idahaemi imọ imedi idifiọk nte ke Mme Ntiense Jehovah ẹnen̄ede ẹma mbọhọidụn̄ mmọ. Ẹma ẹtọn̄ọ ndinịm ukpepn̄kpọ Bible kpukpru ini ye enye.
4 Ẹwụt Nditọete Nnyịn Mfọnido: Nnyịn n̄ko imekpebe mfọnido Jehovah ke ini nnyịn in̄wamde ekemmọ mme andinịm ke akpanikọ. Ke mme ini afanikọn̄, nnyịn isidi akpa ke otu mme owo oro ẹsidide ẹdin̄wam nditọete nnyịn. Nnyịn imesiwụt ukem edu emi ke ini in̄wamde mbon oro ẹyomde ẹmen mmimọ ẹka mme mbono esop, ke ini ikade ikese mbon n̄kpọnnam, ye ke ini inamde ima nnyịn atara esịm mbon oro nnyịn mîtịmke imehe ke esop.—2 Cor. 6:11-13; Heb. 13:16.
5 Usụn̄ efen oro Jehovah owụtde mfọnido edi ke enye ‘ndima ndidahado.’ (Ps. 86:5) Ke ndikpebe enye, nnyịn imekeme ndiwụt ke imọfọn ido ebe ke ndifen nnọ mbon en̄wen. (Eph. 4:32) Emi anam ebuana nnyịn ye ekemmọ mme andinịm ke akpanikọ ‘ọfọn onyụn̄ eye.’—Ps. 133:1-3.
6 Akwa mfọn Jehovah akpakam anam nnyịn ikwọ itoro Enye inyụn̄ iyọhọ ye idatesịt. Ndien emi ekeme ndinụk nnyịn ndikpebe mfọnido esie ke kpukpru n̄kpọ oro nnyịn inamde.—Ps. 145:7; Jer. 31:12.