Ndikpep N̄wed Tuak Ibuot nọ Abasi

Ẹtịm n̄wed Tuak Ibuot nọ Ata Abasi Kierakiet man ẹda ẹkpep n̄kpọ ye mbufa owo ke mmọ ẹma ẹkekụre ukpepn̄kpọ ke n̄wed Ifiọk. Nnyịn ndikpep n̄wed emi ke Ukpepn̄kpọ N̄wed Esop eyetịm nnyịn idem ndida enye nnam n̄kpọ ke an̄wautom oyonyụn̄ an̄wam ndinam ima ye esịtekọm oro inyenede inọ Jehovah ye esop esie otụn̄ọ. Didie ke nnyịn ikeme ndibọ ufọn ọyọhọ ọyọhọ nto edikpep n̄wed Tuak Ibuot nọ Abasi?

Ndinịm Ukpepn̄kpọ: Sia nnyịn idinemede ibuot kiet kiet kpukpru urua, oyoyom mme esenyịn ukpepn̄kpọ n̄wed ẹda ini ẹnam n̄kpọ nte owụtde eti ibuot. Mmọ ikpabiatke ini ikaha ke mme ntọn̄ọ ntọn̄ọ ikpehe ekikere man ẹyak ekese ini odu ọnọ mme ikpehe ekikere oro ẹnen̄erede ẹdọn̄ọ mme akpan n̄kpọ, emi ẹwakde ndidu ke utịt utịt ibuot ukpepn̄kpọ. Editịn̄ ibio ibio mban̄a ekebe ndụn̄ọde ke utịt ukpepn̄kpọ kiet kiet ayan̄wam mbon oro ẹdụkde nditi mme akpan n̄kpọ oro ẹkenemede.

N̄kpọ nte mbahade iba ke otu mme ibuotn̄wed oro ẹdude ke n̄wed Tuak Ibuot nọ Abasi ẹdọn̄ọ mme mbụme oro ẹsịkde ẹwet ndida ntie n̄kere nnyụn̄ nneme mban̄a. Ẹkeme ndikụt uwụtn̄kpọ kiet ke page 48-49. Iyomke ẹkot mme utọ mbụme emi ke ini ẹkotde mme ikpehe ekikere. Ke ini enemede mmọ ye otu ukpepn̄kpọ, esenyịn ekpenyene ndinam ẹkot mme itie N̄wed Abasi oro ẹsiakde ẹsịn onyụn̄ eneme mmọ nte ini ayakde.

Ndibem Iso Ntịm Idem: Nditịm idem mfọn mfọn nnọ ukpepn̄kpọ emi abuana se ikande edidụri udịm ke mme ibọrọ. Ndinen̄ede ntie n̄kere mme itie N̄wed Abasi oro ẹsiakde ẹsịn ayan̄wam nnyịn nditịm ibọrọ nnyịn nnyụn̄ ntịm esịt nnyịn. (Ezra 7:10) Kpukpru nnyịn imekeme ndisịn udọn̄ nnọ kiet eken ke ini inọde ibọrọ, ke nditre nditịn̄ kpukpru se idude ke ikpehe ekikere edi iyakde mbon en̄wen ẹtiene ẹsịn uyo.—Rome 1:11, 12.

Ukpepn̄kpọ nnyịn ke n̄wed Tuak Ibuot nọ Abasi ayan̄wam nnyịn ndisan̄a n̄kpere Jehovah oyonyụn̄ etịm nnyịn idem ndin̄wam mbon esịt akpanikọ ẹdi ẹdidiana ye nnyịn ke ndituak ibuot nnọ Enye. (Ps. 95:6; Jas. 4:8) Kpukpru nnyịn ikpakam ibọ ufọn ọyọhọ ọyọhọ ito eti ndutịm eke spirit emi.