Mbufo Ẹnyene Esịtekọm
1 Okposụkedi nnyịn idude ke “ndiọkeyo,” nnyịn imenyene ediwak ntak ndikọm Jehovah. (2 Tim. 3:1) N̄kponn̄kan ke otu ntak emi edi ọsọn̄urua enọ Eyen esie oro enye ọkọnọde ke ibuot nnyịn. (John 3:16) Ke adianade do, ke adan̄aemi mbon oro ẹdude ke nsunsu ido ukpono ẹdude ke akan̄ eke spirit, nnyịn imenyene akpakịp udia eke spirit. (Isa. 65:13) Nnyịn idi ubak otu nditọete ofụri ererimbot ndien imenyene ifet ndibuana ke aduai-owo-idem utom editat utuakibuot akpanikọ. (Isa. 2:3, 4; 60:4-10, 22) Didie ke nnyịn ikeme ndiwụt esịtekọm oro inyenede inọ Jehovah kaban̄a akpakịp edidiọn̄ oro enye an̄wan̄ade ọnọ nnyịn?—Col. 3:15-17.
2 Idara Idara Utom Ofụri Esịt: Ke ini etịn̄de aban̄a edinọ enọ, apostle Paul ekewet ete: “Abasi amama owo eke ọnọde ke inemesịt.” (2 Cor. 9:7) Edumbet emi enyene n̄kpọ ndinam n̄ko ye utom oro inamde inọ Abasi. Ifiopesịt oro inyenede inọ akpanikọ, idatesịt nnyịn ke mme mbono esop Christian, ifịk nnyịn ke an̄wautom, ye inemesịt nnyịn ke ndinam uduak Abasi, ẹsiwụt esịtekọm oro nnyịn inyenede.—Ps. 107:21, 22; 119:14; 122:1; Rome 12:8, 11.
3 Ke Israel eset, Ibet ikasiakke akpan udomo oro ẹdinọde ndusụk enọ. Andituak ibuot kiet kiet ama ekeme ndiwụt esịtekọm esie ke ndinọ nte ‘ekemde ye ufọn eke Jehovah ọfọnde’ ye enye. (Deut. 16:16, 17) Ukem ntre mfịn, esịtekọm oyonụk nnyịn ndinam se ikemede ke utom ukwọrọikọ Obio Ubọn̄ ye edinam mme mbet nte mme idaha nnyịn ẹyakde. Ndusụk owo ẹsida ini nduọkodudu ke utom m̀mê ini utre n̄wed ndinam ini oro mmọ ẹsịnde ke an̄wautom okpon, idem ẹnamde utom usiakusụn̄ unọ un̄wam. Ndi afo emekeme nditat utom ukwọrọikọ fo ke ini emi?
4 Ẹnọ Abasi Ekọm Etieti: Akpan usụn̄ emi nnyịn iwụtde esịtekọm oro inyenede inọ Jehovah edi ke akam. (1 Thess. 5:17, 18) Ikọ Abasi esịn udọn̄ ọnọ nnyịn ‘ndinọ Abasi ekọm etieti.’ (Col. 2:7) Idem ke ini nnyịn inen̄erede inana ini m̀mê idude ke mfịghe, nnyịn ikpenyene ndisịn ekọm ke akam nnyịn ke usen ke usen. (Phil. 4:6) Ih, ebede ke utom ukwọrọikọ ọkọrọ ye akam, nnyịn ikpakam ‘iwak ndinọ Abasi ediwak ekọm.’—2 Cor. 9:12.